മിലിട്ടറി കാന്റീനിൽ നിന്ന് ലഭിക്കുന്ന മദ്യം സൂപ്പർമാർക്കറ്റിൽ; 138 കുപ്പി മദ്യം എക്സൈസ് പിടികൂടി
ഇളമണ്ണൂർ : മിലിട്ടറി കാന്റീനിൽ നിന്ന് മാത്രം ലഭിക്കുന്ന മദ്യം സൂപ്പർമാർക്കറ്റിൽ നിന്ന് പിടികൂടി. മുൻ സൈനികനായ ഇളമണ്ണൂർ ശ്രീചിത്തിരയിൽ രമണനെയാണ് (64) മദ്യവുമായി അടൂർ എക്സൈസ് സർക്കിൾ ഇൻസ്പെക്ടർ ബി.അൻഷാദിൻ്റെ നേതൃത്വത്തിലുള്ള സംഘം അറസ്റ്റ് ചെയ്തത്.
ഇദ്ദേഹത്തിൻ്റെ ഉടമസ്ഥതയിലുള്ള ശ്രീ ചിത്തിര സൂപ്പർ മാർക്കറ്റിൽ നിന്ന് 750 മില്ലി ലിറ്ററിൻ്റെ പത്ത് കുപ്പിയും രമണൻ്റെ ഭാര്യയുടെ ഉടമസ്ഥതയിലുള്ള വീട്ടിൽ നിന്ന് 128 കുപ്പി മദ്യവുമാണ് കണ്ടെടുത്തത്. മിലിട്ടറി കാൻ്റീനിൽ മാത്രം വിൽപ്പന നടത്തുന്ന മദ്യമാണ് ഇവിടെ നിന്ന് പിടികൂടിയതെന്ന് എക്സൈസ് സംഘം പറഞ്ഞു.
സ്ഥിരമായി ഇവിടെ മദ്യവിൽപ്പന നടത്തുന്നുവെന്ന വിവരം ലഭിച്ചതിനെ തുടർന്നാണ് ഞായറാഴ്ച വൈകിട്ട് പരിശോധന നടത്തിയത്. സൂപ്പർ മാർക്കറ്റിൽ നിന്ന് മദ്യം കണ്ടെത്തിയതിന് ശേഷം നടത്തിയ ചോദ്യം ചെയ്യലിലാണ് മാവിളയിൽ ആൾത്താമസമില്ലാത്ത വീട്ടിൽ മദ്യ ശേഖരമുണ്ടെന്ന് രമണൻ എക്സൈസിനോട് പറഞ്ഞത്.
