Kannur

കുടിക്കാനും നനയ്ക്കാനും വെള്ളത്തിന് ക്ഷാമം

Published

9 months ago

March 7, 2024

NH newsdesk

Share our post

കണ്ണൂർ : കനത്ത വേനലിൽ ജില്ലയിൽ പലയിടത്തും കുടിവെള്ളക്ഷാമം തുടങ്ങി. വരൾച്ച കൃഷിയെയും ബാധിക്കുന്നുണ്ട്. മലയോരത്ത് പുഴകളിലും തോടുകളിലും കുളങ്ങളിലും കിണറുകളിലും ജലനിരപ്പ് മുൻവർഷത്തെ അപേക്ഷിച്ച് കൂടുതൽ താഴ്ന്നു. കുടിവെള്ളക്ഷാമം പരിഹരിക്കാനുള്ള നടപടികൾ ആരംഭിക്കുകയാണ് തദ്ദേശ സ്ഥാപനങ്ങൾ.

ചപ്പാരപ്പടവ് മേഖലയിൽ

ചപ്പാരപ്പടവ്, കടന്നപ്പള്ളി-പാണപ്പുഴ, എരമം-കുറ്റൂർ പഞ്ചായത്തുകളിൽ ശുദ്ധജലലഭ്യതക്കുറവ് ജനങ്ങളെ ദുരിതത്തിലാക്കുന്നു. പെരുവണ, കല്യാണപുരം, ചെങ്ങറ, വെള്ളരിയാനം, കുറ്റൂർ, കോയിപ്ര, പെരുമ്പടവ്, കക്കറ തുടങ്ങിയ സ്ഥലങ്ങൾ ശുദ്ധജലക്ഷാമത്തിലേക്ക് നീങ്ങുകയാണ്.

ശ്രീകണ്ഠപുരത്ത്

കാഞ്ഞിരക്കൊല്ലി, വഞ്ചിയം വനത്തിലെ നീരുറവകളും വറ്റി. ആദിവാസികൾ ഇത്തരം നീരുവകളിൽനിന്നാണ് പൈപ്പിട്ട് വെള്ളമെടുത്തിരുന്നത്. വയലുകളിൽ വേനലിൽ നടത്താറുള്ള പച്ചക്കറിക്കൃഷികളും ജലക്ഷാമംമൂലം പ്രതിസന്ധിയിലാണ്. നിടിയേങ്ങ, ചേപ്പറമ്പ്, മലപ്പട്ടം, കരയത്തുംചാൽ മേഖലകളിൽ കുടിവെള്ളക്ഷാമം രൂക്ഷമാണ്. നിടിയേങ്ങ സ്വാമിമഠം, ചുഴലി ഭഗവതിക്ഷേത്രം എന്നിവയുടെ പരിസരങ്ങളിലെ വീടുകളിലെ കിണറുകളെല്ലാം വറ്റി. ടാങ്കറിൽ കുടിവെള്ളമെത്തിക്കാനുള്ള നടപടികൾ ശ്രീകണ്ഠപുരം നഗരസഭയിൽ അടുത്തദിവസം ആരംഭിക്കും.

കീഴല്ലൂർ പഞ്ചായത്തിൽ

പല ഭാഗങ്ങളിലും കുടിവെള്ളക്ഷാമമുണ്ട്. ജലവിതരണത്തിന് ഉടൻ നടപടിയുണ്ടാകുമെന്ന് പഞ്ചായത്ത് അധികൃതർ അറിയിച്ചു. ജൽജീവൻമിഷൻ പദ്ധതിയുടെ പ്രവൃത്തി പഞ്ചായത്തിൽ വേഗത്തിൽ പുരോഗമിക്കുന്നുണ്ട്. എല്ലാ വാർഡുകളിലും പൈപ്പിടൽ നടക്കുന്നു. കീഴല്ലൂർ അണക്കെട്ടിൽ നിന്നുള്ള പമ്പിങ്‌ നിർത്തിവെച്ചിട്ട് ഒരുവർഷത്തിലേറെയായി.

ചിറക്കലിൽ

വീട്ടുകിണറുകളിലെ ജലനിരപ്പ് താഴ്ന്നുതുടങ്ങി. ചിറക്കൽ പഞ്ചായത്തിൽ കീരിയാട്, ബാലൻകിണർ, കാട്ടാമ്പള്ളി, കോട്ടക്കുന്ന് എന്നീ വാർഡുകളിലാണ് കുടിവെള്ളക്ഷാമമുണ്ടാകാറ്. ജലജീവൻ പദ്ധതി യുടെ പൈപ്പ്‌ലൈൻ പണി ചിറക്കൽ പഞ്ചായത്തിൽ 23 വാർഡുകളിലും തീർന്നെങ്കിലും കമ്മിഷൻ ചെയ്തിട്ടില്ല.

കാട്ടാമ്പള്ളി രാഘവനഗർ കോളനിയിലെ മൂന്ന് പൊതുകിണറുകളിൽ രണ്ടെണ്ണത്തിലെ ചെളി നീക്കിക്കൊണ്ടിരിക്കുന്നു. എല്ലാ വാർഡുകളിലുമുള്ള പൊതുകിണറുകളിലെ ചളി നീക്കാൻ പദ്ധതിയുണ്ട്.

ചെറുപുഴയിൽ

കുടിവെള്ള സ്രോതസ്സുകളിലും ജലം വറ്റിത്തുടങ്ങി. പ്രധാന ജലസ്രോതസ്സായ കാര്യങ്കോട് പുഴയുടെ പല ഭാഗങ്ങളിലും ഇടമുറിഞ്ഞ് തുടങ്ങി. ചെറുതോടുകളിലും വെള്ളമില്ലാതായി. കാർഷികവിളകളെ ചൂട് വല്ലാതെ ബാധിക്കുന്നുണ്ട്.

കേളകം, കണിച്ചാർ

രണ്ട്‌ പഞ്ചായത്തിലും ജലക്ഷാമമുണ്ട്. ജലസ്രോതസ്സുകളെല്ലാം വറ്റാൻ തുടങ്ങി. വീട്ടുകിണറുകൾ മിക്കതും വറ്റി. ഇരുപഞ്ചായത്തുകളിലൂടെയും കടന്നുപോകുന്ന ബാവലി, ചീങ്കണ്ണി പുഴകളിലും വെള്ളം വറ്റിത്തുടങ്ങിയത് ഇവയെ ആശ്രയിച്ചുള്ള കുടിവെള്ള പദ്ധതികളെ ബാധിക്കുന്നുണ്ട്. പുഴകളിൽ തടയണകൾ നിർമിച്ചും കുടിവെള്ളം വിതരണംചെയ്തുമാണ് പഞ്ചായത്തുകൾ പ്രശ്നത്തെ നേരിടുന്നത്.

രാമന്തളി

പഞ്ചായത്തിൽപ്പെട്ട ഏഴിമല, പരുത്തിക്കാട്, ചിറ്റടി, കക്കംപാറ, എട്ടിക്കുളം പ്രദേശങ്ങളിൽ വർഷങ്ങളായി രൂക്ഷമായ കുടിവെള്ളപ്രശ്നമുണ്ട്‌. ഇപ്പോൾ ഭൂരിഭാഗം വീടുകളിലും ജല അതോറിറ്റിയുടെ ഗാർഹിക കണക്ഷനുണ്ട്. എന്നാൽ രണ്ടുദിവസം കൂടുമ്പോഴാണ് പമ്പിങ്‌ എന്ന പ്രശ്നമുണ്ട്.

പാനൂർ നഗരസഭയിൽ

പാനൂർ, പെരിങ്ങളം, കരിയാട് മേഖലകളിലെ വിവിധ പ്രദേശങ്ങളിൽ കുടിവെള്ളക്ഷാമമുണ്ട്. എലാങ്കോട് പാറയ്ക്ക് താഴെ പ്രദേശം, വൈദ്യർപീടിക, പാനൂർ ടൗണിനടുത്ത കല്ലുകൊത്ത് പറമ്പ് പ്രദേശം, കരിയാട് മുക്കാളിക്കര, പടന്നക്കര ഭാഗങ്ങളിൽ കൂവപ്പാട്, കമ്പനിക്കുന്ന്, പെരിങ്ങളം കുന്നും മൊയിലോംഭാഗം, കോമത്ത്, പൊക്കിണക്കുന്ന്, അവയാട്ട് പ്രദേശങ്ങളിൽ പ്രശ്നം രൂക്ഷമാണ്.

എലാങ്കോട് പാറയ്ക്ക് താഴെ പ്രദേശത്ത് അമൃത്‌കുടീർ പദ്ധതിയിൽ ജലവിതരണപദ്ധതിയുടെ നടപടികൾ തുടങ്ങി. നഗരസഭയിൽ കുടിവെള്ളവിതരണത്തിനുള്ള ടെൻഡർ നടപടികൾ തുടങ്ങിയതായി ചെയർമാൻ വി.നാസർ പറഞ്ഞു

പെരിങ്ങോം-വയക്കര

പെരിങ്ങോം-വയക്കര പഞ്ചായത്തിൽ കുടിവെള്ളക്ഷാമം രൂക്ഷമായി. വാഹനങ്ങളിൽ വെള്ളമെത്തിക്കാനുള്ള നടപടി സ്വീകരിക്കുന്നുണ്ട്. കൊല്ലാട പുഴയോരത്തുള്ള പ്രദേശത്താണ് ജലക്ഷാമം രൂക്ഷമായത്. പാടിയോട്ടുചാൽ, വങ്ങാട്, കൊല്ലാട, ഇരട്ടകുളം പ്രദേശങ്ങളിൽ ക്ഷാമമുണ്ട്. കുപ്പോൾ കോളനിയിൽ 40 കുടുംബങ്ങൾക്കുള്ള ജലവിതരണപദ്ധതി തുടങ്ങി.

Share our post

Kannur

നഗര പ്രദേശങ്ങളിലെ സാമ്പത്തിക വികസനം ത്വരിതപ്പെടുത്തും: മുഖ്യമന്ത്രി

Published

5 hours ago

November 25, 2024

NH newsdesk

Share our post

നഗരവത്കരണത്തിൻ്റെ സാധ്യതകളും പ്രശ്നങ്ങളും ഉൾക്കൊണ്ട് നഗര പ്രദേശങ്ങളിലെ സാമ്പത്തിക വികസനം ത്വരിതപ്പെടുത്തുകയാണ് ലക്ഷ്യമെന്ന് മുഖ്യമന്ത്രി പിണറായി വിജയൻ പറഞ്ഞു. തലശ്ശേരി നഗരസഭയുടെ പുതിയ ഓഫീസ് കെട്ടിടം ഉദ്ഘാടനം ചെയ്യുകയായിരുന്നു. അദ്ദേഹം. 2011 ലെ കണക്കുകൾ പ്രകാരം കേരളത്തിലെ ജനസംഖ്യയുടെ 47 ശതമാനമാണ് നഗരജനസംഖ്യ. 2035 ഓടെ അത് 93 ശതമാനത്തിലേക്ക് എത്തിച്ചേരുമെന്നാണ് പഠനങ്ങൾ സൂചിപ്പിക്കുന്നത്. ആ നിലയ്ക്കു നോക്കിയാൽ അതിവേഗത്തിൽ നഗരവത്കരിക്കപ്പെടുന്ന ഒരു സംസ്ഥാനമാണ് കേരളം. വ്യാവസായിക മുന്നേറ്റത്തിന് തദ്ദേശ സ്വയംഭരണ സ്ഥാപനങ്ങൾക്ക് വലിയ പങ്കുവഹിക്കാനാകും. ഇതിന്റെ ഭാഗമായി സൂക്ഷ്മ ചെറുകിട ഇടത്തരം സംരംഭങ്ങളെ വൻതോതിൽ പ്രോത്സാഹിപ്പിക്കാനുള്ള പരിപാടികൾ ആവിഷ്കരിക്കണം.

സംരംഭങ്ങൾക്ക് ആവശ്യമായ അടിസ്ഥാന സൗകര്യങ്ങൾ ഒരുക്കണമെന്നും മുഖ്യമന്ത്രി പറഞ്ഞു.നഗരവത്കരണം അതിവേഗത്തിൽ നടപ്പാക്കുമ്പോൾ ഏറ്റെടുക്കേണ്ട പ്രധാന വെല്ലുവിളികളാണ് മാലിന്യസംസ്‌കരണവും പരിസ്ഥിതി സംരക്ഷണവും. നഗരഭരണ സ്ഥാപനങ്ങളിലെ ഖര-ദ്രവ മാലിന്യനിർമ്മാർജനത്തിനു പൂർണവും ഫലപ്രദവുമായ കേന്ദ്രീകൃത – വികേന്ദ്രീകൃത മാർഗ്ഗങ്ങൾ ആവിഷ്‌കരിച്ചു നടപ്പാക്കണം. തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തിൽ ചവറുവലിച്ചെറിയൽ വിമുക്ത സംസ്ഥാനമാക്കി കേരളത്തെ മാറ്റാനാണ് സർക്കാർ ശ്രമിക്കുന്നത്. തദ്ദേശ സ്വയംഭരണ സ്ഥാപനങ്ങളിൽ സ്ഥിരം ഗ്രീൻ ഓഡിറ്റിങ് സമിതികൾ രൂപീകരിച്ചും ഗ്രീൻ സർട്ടിഫിക്കേഷൻ നടപ്പാക്കിയും പച്ചത്തുരുത്തുകൾ രണ്ടായിരം ഏക്കറിലേക്കു വ്യാപിപ്പിച്ചും നാടിനെ ഹരിതാഭമാക്കിത്തീർക്കുകയാണ്.സുസ്ഥിരമായ പരിസ്ഥിതി വികസന ലക്ഷ്യങ്ങൾ നഗരസഭയുടെ പ്രവർത്തനത്തിന്റെ ഭാഗമായി മാറണം.

ഹരിതഗൃഹ വാതകങ്ങളുടെ ബഹിർഗമനം കുറയ്ക്കാനാകണം. കാർബൺ ന്യൂട്രൽ കേരളം എന്ന ലക്ഷ്യത്തിലേക്ക് എത്തിച്ചേരാനുതകുന്ന പ്രവർത്തനങ്ങളിലും പങ്കാളികളാകണം. ജൈവവൈവിധ്യ സംരക്ഷണം ഒരു അജണ്ടയായിത്തന്നെ തദ്ദേശ സ്വയംഭരണ സ്ഥാപനങ്ങൾ ഏറ്റെടുക്കണം. ഇതിന്റെ ഭാഗമായി നീർത്തട വികസന പദ്ധതികൾ രൂപപ്പെടുത്തണം. അങ്ങനെ ബഹുമുഖമായ ഇടപെടലുകളിലൂടെ നാടിന്റെ ജൈവവൈവിധ്യത്തെ സംരക്ഷിക്കാനും കാലാവസ്ഥാ വ്യതിയാനത്തെ ചെറുക്കാനും ശ്രദ്ധ ചെലുത്തണമെന്നും മുഖ്യമന്ത്രി പറഞ്ഞു. വ്യാവസായിക മുന്നേറ്റത്തിൽ തദ്ദേശ സ്വയംഭരണ സ്ഥാപനങ്ങൾക്കു വലിയ പങ്കുവഹിക്കാനാകും. ഇതിന്റെ ഭാഗമായി സൂക്ഷ്മ – ചെറുകിട – ഇടത്തരം സംരംഭങ്ങളെ വൻതോതിൽ പ്രോത്സാഹിപ്പിക്കാനുള്ള പരിപാടികൾ ആവിഷ്‌കരിക്കണം. സംരംഭങ്ങൾക്കാവശ്യമായ അടിസ്ഥാന സൗകര്യങ്ങൾ ഒരുക്കുന്നതിലും നൈപുണ്യമുള്ള തൊഴിലാളികളുടെ ലഭ്യത ഉറപ്പാക്കുന്നതിലും പ്രത്യേക ശ്രദ്ധ ചെലുത്തണം. അതിനുതകും വിധമുള്ള പ്രത്യേക പരിശീലന പരിപാടികളും ക്യാമ്പയിനുകളും സംഘടിപ്പിക്കണം.

തദ്ദേശീയ സംരംഭകരെ പ്രോത്സാഹിപ്പിക്കണം. പുതിയ ആശയങ്ങളെ ഉത്പാദനോന്മുഖമായി പരിവർത്തിപ്പിക്കുന്നതിനുള്ള പരിപാടികൾ സംഘടിപ്പിക്കുകയും വേണം. നൈപുണ്യ പരിശീലന പരിപാടികളിൽ വനിതകൾക്കും ദുർബല വിഭാഗങ്ങൾക്കും പ്രാതിനിധ്യം ഉറപ്പാക്കുകയും വേണം. നൂതന ലോകത്ത് ഉയർന്നുവരുന്ന വർക് ഫ്രം ഹോം പോലെയുള്ള തൊഴിൽ സംസ്‌കാരങ്ങൾക്കനുസരിച്ച് തൊഴിലാളികൾക്ക് പിന്തുണ നൽകുന്ന ഇടപെടലുകളും തദ്ദേശ സ്വയംഭരണ സ്ഥാപനങ്ങളുടെ ഭാഗത്തു നിന്നുണ്ടാകണം. ഇത്തരം പ്രവർത്തനങ്ങൾക്ക് എല്ലാവിധ പിന്തുണയും സർക്കാരിന്റെ ഭാഗത്തു നിന്നുമുണ്ടാകുമെന്നും മുഖ്യമന്ത്രി പറഞ്ഞു.വാണിജ്യപരമായി വലിയ ചരിത്രമുള്ള നാടാണ് തലശ്ശേരി. ഇത് ഉപയോഗപ്പെടുത്തി വിവിധ മേഖലകളിൽ മൂലധന നിക്ഷേപം വർദ്ധിപ്പിക്കാനും സംരംഭകത്വ വികസനം ഉറപ്പാക്കാനും കഴിയണം. സംസ്ഥാന സർക്കാർ ഇതിനുതകും വിധം പദ്ധതികൾ ആവിഷ്കരിച്ച് നടപ്പാക്കി വരികയാണ്.തലശ്ശേരിയുടെ മുഖച്ഛായയിൽ മാറ്റങ്ങൾ വരുത്താൻ പറ്റുന്ന വിധത്തിൽ വിദഗ്ധസംഘത്തെ ഉപയോഗിച്ച് കൃത്യമായ മാസ്റ്റർ പ്ലാനോടെ നീങ്ങണം. നൈപുണ്യം തൊഴിലാളികൾക്ക് പ്രത്യേക പരിശീല പരിപാടികളും ക്യാമ്പയിനുകളും സംഘടിപ്പിക്കണം.

പൊതുജനങ്ങൾ സർക്കാർ ഓഫീസുകൾ കയറിയിറങ്ങുന്ന അവസ്ഥ ഒഴിവാക്കാനുള്ള പരിശ്രമങ്ങളുമായാണ് സർക്കാർ മുന്നോട്ടുപോകുന്നത്. ഇ-ഗവേണൻസ് സംവിധാനങ്ങളെ ശക്തമാക്കുന്നതും ഓൺലൈൻ സേവനങ്ങളും വാതിൽപ്പടി സേവനങ്ങളും ലഭ്യമാക്കുന്നതും ഇതിന്റെ ഭാഗമാണ്. നിലവിൽ 900 ത്തോളം സേവനങ്ങളാണ് ഓൺലൈനായി ലഭ്യമാക്കുന്നത്. തദ്ദേശ സ്വയംഭരണ സ്ഥാപനങ്ങളുടെ സേവനങ്ങൾ ലഭ്യമാക്കുന്നതിന് കെ-സ്മാർട്ട് പദ്ധതിക്ക് തുടക്കം കുറിച്ചിട്ടുണ്ട്. പൊതുസേവനങ്ങളുടെ കാര്യത്തിൽ സർക്കാരിന്റെ സമീപനത്തിന്റെ അന്തഃസത്ത ഉൾക്കൊണ്ടുകൊണ്ട് മുന്നോട്ടുപോകാൻ ജീവനക്കാർ തയ്യാറാകണം. സേവനങ്ങൾ ജനങ്ങളുടെ അവകാശമാണ്. ജീവനക്കാരും ഉദ്യോഗസ്ഥരുമെല്ലാം ജനങ്ങളുടെ സേവകരാണെന്ന ബോധ്യം എല്ലാവർക്കും ഉണ്ടാകണം. സത്യസന്ധതയോടെ ആത്മാർത്ഥതയോടെ ജോലി ചെയ്യുന്ന ജീവനക്കാരെ സർക്കാർ സംരക്ഷിക്കും. അഴിമതിക്കാരോട് വിട്ടുവീഴ്ച ഉണ്ടാവുകയുമില്ലന്നും മുഖ്യമന്ത്രി വ്യക്തമാക്കി.

നിയമസഭാ സ്പീക്കർ അഡ്വ. എ.എൻ. ഷംസീർ അധ്യക്ഷനായി. തലശ്ശേരിയിൽ പൈതൃക ടൂറിസത്തിന്റെ സാധ്യതകൾ ഉപയോഗപ്പെടുത്തി മുന്നോട്ടു പോകുകയാണെന്ന് ലക്ഷ്യമെന്ന് സ്പീക്കർ പറഞ്ഞു.എക്സിക്യൂട്ടീവ് എഞ്ചിനീയർ പി രാഗേഷ് റിപ്പോർട്ട് അവതരിപ്പിച്ചു. കെട്ടിടം പണി പൂർത്തീകരിച്ചവർക്കുള്ള ഉപഹാര സമർപ്പണം മുഖ്യമന്തി നിർവഹിച്ചു.എഴുത്തുകാരിയും നഗരസഭാ കൗൺസിലറുമായ പി. പ്രമീളടിച്ചറുടെ പുതിയ നോവൽ കാലാന്തരങ്ങൾ പരിപാടിയിൽ പ്രകാശനം ചെയ്തു.തലശ്ശേരി നഗരസഭ ചെയർപേഴ്സൺ കെ എം ജമുനാറാണി ടീച്ചർ, വൈസ് ചെയർമാൻ എം.വി.ജയരാജൻ, പൊതുമരാമത്ത് സ്റ്റാൻ്റിംങ്ങ് കമ്മിറ്റി ചെയർമാൻ സി.സോമൻ, നഗരസഭാംഗം ഫൈസൽ പുനത്തിൽ, തലശ്ശേരി നഗരസഭ സെക്രട്ടറി എൻ.സുരേഷ്കുമാർ, മുൻ ചെയർമാൻമാർ, രാഷ്ട്രീയ സാമൂഹിക സാംസ്കാരിക രംഗത്തെ പ്രമുഖർ തുടങ്ങിയവർ സംസാരിച്ചു. തുടർന്ന് നഗരസഭാ കൗൺസിലർമാർ ഒരുക്കിയ

Share our post

Kannur

വൺ ടൈം രജിസ്ട്രേഷൻ ക്യാമ്പ്

Published

6 hours ago

November 25, 2024

NH newsdesk

Share our post

ജില്ലാ എംപ്ലോയ്മെന്റ് എക്സ്ചേഞ്ചിനോടനുബന്ധിച്ചുള്ള എംപ്ലോയബിലിറ്റി സെന്ററിന്റെ ആഭിമുഖ്യത്തിൽ പയ്യന്നൂർ ബ്ലോക്ക് ഓഫീസിലെ എംപ്ലോയ്‌മെന്റ് ഇൻഫർമേഷൻ ആൻഡ് അസിസ്റ്റൻസ് ബ്യൂറോയിൽ നവംബർ 27ന് രാവിലെ പത്ത് മുതൽ ഉച്ചയ്ക്ക് ഒന്ന് വരെ സ്വകാര്യ സ്ഥാപനങ്ങളിലേക്കുള്ള ജോലി ഒഴിവുകൾ ലഭിക്കുന്നതിനായി വൺ ടൈം രജിസ്ട്രേഷൻ ക്യാമ്പ് നടത്തും. 250 രൂപയാണ് രജിസ്ട്രേഷൻ ഫീസ്. 50 വയസ്സ് വരെ പ്രായമുള്ളവർക്ക് പങ്കെടുക്കാം. ഉദ്യോഗാർഥികൾക്ക് ഇമെയിൽ ഐഡിയും ഫോൺ നമ്പറും ഉണ്ടായിരിക്കണം. ആധാർ/ വോട്ടേഴ്സ് ഐ.ഡി/ പാസ്പോര്ട്ട് / പാൻ കാർഡും പാസ്പോർട്ട് സൈസ് ഫോട്ടോയും ഹാജരാക്കണം. യോഗ്യരായ ഉദ്യോഗാർഥികൾക്ക് എംപ്ലോയബിലിറ്റി സെന്ററിന്റെ ആജീവനാന്ത രജിസ്ട്രേഷൻ നടത്തി തുടർന്നു നടക്കുന്ന എല്ലാ ഇന്റർവ്യൂവിലും പങ്കെടുക്കാം.ഫോൺ- 0497 2707610, 6282942066

Share our post

Kannur

ആവേശമായി പേരാവൂർ മിഡ്‌നൈറ്റ് മാരത്തൺ

Published

7 hours ago

November 25, 2024

newshunt admin

Share our post

പേരാവൂർ: യു.എം.സി പേരാവൂർ യൂണിറ്റ് സംഘടിപ്പിച്ച രണ്ടാമത് നരിതൂക്കിൽ ഗോൾഡ് ആൻഡ് ഡയമണ്ട്‌സ് പേരാവൂർ മിഡനൈറ്റ് മാരത്തൺ മലയോരത്ത് ആവേശമായി. ആയിരത്തിലധികം കായികതാരങ്ങൾ മത്സരിച്ച മാരത്തൺ ശനിയാഴ്ച രാത്രി 11ന് പേരാവൂർ ഡി.വൈ.എസ്.പി കെ.വി.പ്രമോദൻ ഫ്‌ളാഗ് ഓഫ് ചെയ്തു.

പുരുഷ വിഭാഗത്തിൽ പാലക്കാട് അത്‌ലറ്റിക്ക് അക്കാദമി ടീമും വനിതാ വിഭാഗത്തിൽ എം.എൻ.കെ. പാലക്കാടും ജേതാക്കളായി. എറണാകുളം ടീം, ക്യാപ്റ്റൻ അക്കാദമി ചെറുപുഴ എന്നിവ പുരുഷ വിഭാഗത്തിലും പേരാവൂർ അത്‌ലറ്റിക് അക്കാദമി, ക്യാപ്റ്റൻ അക്കാദമി ചെറുപുഴ എന്നിവ വനിതാ വിഭാഗത്തിലും യഥാക്രമം രണ്ടും മൂന്നും സ്ഥാനങ്ങളിലെത്തി.

60 വയസ് കഴിഞ്ഞ പുരുഷ വിഭാഗത്തിൽ പത്രോസ് പുളിക്കൽ, എൻ.മാത്യു, ഇ.ജെ.ജോസഫ്,, പി.ടി.ജോർജ് എന്നിവരടങ്ങുന്ന ടീമും 50 കഴിഞ്ഞ വനിതകളുടെ വിഭാഗത്തിൽ കെ.ശ്യാമള, തമ്പായി, സി.ബിന്ദു, എൻ.പ്രമീള എന്നിവരുടെ ടീമും ജേതാക്കളായി.

പഞ്ചായത്ത് പ്രസിഡന്റ് പി.പി.വേണുഗോപാലൻ, പഞ്ചായത്തംഗങ്ങളായ എം.ശൈലജ, റജീന സിറാജ്എന്നിവർ സമ്മാനങ്ങൾ വിതരണം ചെയ്തു. സൈമൺ മേച്ചേരി, ഷിനോജ് നരിതൂക്കിൽ, കെ.എം.ബഷീർ, വി.കെ.രാധാകൃഷ്ണൻ, വി.കെ.വിനേശൻ, ഒ.ജെ.ബെന്നി, ദിവ്യസ്വരൂപ്, പ്രവീൺ കാറാട്ട്, എ.പി.സുജീഷ്, ഒ.മാത്യു എന്നിവർ നേതൃത്വം നല്കി.

Share our post