കിഡ്നി സ്റ്റോൺ രോ​ഗികളുടെ എണ്ണത്തിൽ വൻവർധന,ജീവിതശൈലിയും പ്രധാനകാരണം

വൃക്കയിൽ കല്ലുള്ള രോ​ഗികളിലും ക്രോണിക് കിഡ്നി രോ​ഗത്തിനുള്ള സാധ്യത കൂടുന്നതായി പഠനത്തിൽ പറയുന്നുണ്ട്. മില്ലേനിയൽസ്(1981-നും 1996-നും ഇടയിൽ ജനിച്ചവർ), ജെൻ സി( 1997-നും 2012-നും ഇടയിൽ ജനിച്ചവർ) വിഭാ​ഗക്കാർക്കിടയിൽ വൃക്കയിൽ കല്ലുള്ളവരുടെ എണ്ണവും കൂടുകയാണെന്നും പഠനം പറയുന്നു.

ഇരുപതുകളിലും മുപ്പതുകളിലുമൊക്കെ ഉള്ളവർക്കിടയിൽ വൃക്കരോ​ഗികളുടെ എണ്ണം കൂടുന്നുവെന്നത് കരുതലോടെ സമീപിക്കേണ്ട കാര്യമാണെന്ന് വിദ​ഗ്ധർ പറയുന്നു. വൃക്കയിൽ കല്ലുള്ളവരുടെ എണ്ണം വർധിക്കുന്നതിനു പിന്നിൽ ജനിതകഘടകങ്ങൾക്കൊപ്പം തന്നെ ജീവിതശൈലിയും കാരണമാണെന്നാണ് വിദ​ഗ്ധരുടെ വാദം. മതിയായി വെള്ളം കുടിക്കാതിരിക്കുക, സംസ്കരിച്ച ഭക്ഷണങ്ങൾ ധാരാളമായി ഉപയോ​ഗിക്കുക, ഉദാസീനമായ ജീവിതശൈലി പിന്തുടരുക തുടങ്ങിയവയൊക്കെ വൃക്കരോ​ഗങ്ങൾ വർധിപ്പിക്കാനിടയാക്കുന്ന കാരണങ്ങളാണ്.

ഉപ്പും പഞ്ചസാരയും ധാരാളമായി അടങ്ങിയ ഭക്ഷണങ്ങളുടെ ഉപയോ​ഗത്തിലും നിയന്ത്രണം വേണം. ഈ ഭക്ഷണപദാർഥങ്ങൾ മൂത്രത്തിലെ ധാതുക്കളിൽ അസന്തുലിതാവസ്ഥയുണ്ടാക്കാം. പകരം പഴങ്ങളും പച്ചക്കറികളും മുഴുധാന്യങ്ങളും ആഹാരരീതിയിൽ ധാരാളമായി ഉൾപ്പെടുത്തണം.

• പ്രമേഹരോഗികള്‍
• അമിതമായ രക്തസമ്മര്‍ദമുള്ളവര്‍
• പാരമ്പര്യമായി വൃക്കരോഗമുള്ള കുടുംബത്തില്‍ ജനിച്ചവര്‍ പ്രായമായവര്‍ തുടങ്ങിയവര്‍ക്ക് വൃക്കരോഗം വരാനുള്ള സാധ്യത വളരെ കൂടുതലാണ്.

വൃക്കരോഗത്തിന്റെ പ്രധാന ലക്ഷണങ്ങള്‍

• വിട്ടുമാറാത്ത ക്ഷീണം
• ഉന്‍മേഷക്കുറവ്
• തളര്‍ച്ച
• മൂത്രത്തില്‍ നുരയും പതയും കാണുക
• മൂത്രത്തിന് നിറവ്യത്യാസം ഉണ്ടാവുക
• മൂത്രത്തില്‍ രക്തം കാണുക
• കാലുകള്‍ നീരുവന്ന് വീര്‍ക്കുക
• രാത്രിയില്‍ ഉറക്കം കുറയുകയും പകല്‍ ഉറക്കം കൂടുകയും ചെയ്യുക
• വിളര്‍ച്ച
• വിശപ്പില്ലായ്മ തുടങ്ങിയവയാണ് വൃക്കരോഗത്തിന്റെ പ്രധാന ലക്ഷണങ്ങള്‍. ഈ ലക്ഷണങ്ങള്‍ കണ്ടാല്‍ ഉടന്‍ തന്നെ വൃക്കരോഗവിദഗ്ധന്റെ സേവനം ഉപയോഗപ്പെടുത്തണം.

വൃക്കരോഗത്തെ പ്രതിരോധിക്കാനുള്ള മാര്‍ഗങ്ങള്‍

• പ്രമേഹരോഗികള്‍ രക്തത്തില്‍ ഗ്ലൂക്കോസിന്റെ അളവ് ക്രമീകരിക്കുക.
• രക്തസമ്മര്‍ദം കൂടുതലുള്ളവര്‍ അത് നിയന്ത്രിക്കുക
• പൊണ്ണത്തടി കുറയ്ക്കുക
• ദിവസവും നന്നായി വെള്ളം കുടിക്കുക
• ഭക്ഷണത്തില്‍ ഉപ്പിന്റെ അളവ് കുറയ്ക്കുക
• പുകവലി ഉപേക്ഷിക്കുക.
• വ്യായാമം നിത്യജീവിതത്തിന്റെ ഭാഗമാക്കുക