താത്‌പര്യമറിഞ്ഞ് പഠിക്കാം ജോലിനേടാം: ജില്ലയിൽ കരിയർ ഗൈഡൻസ് കേന്ദ്രങ്ങൾ ഒരുങ്ങുന്നു
കണ്ണൂർ : വിദ്യാർഥികൾക്ക് കഴിവും താത്‌പര്യവും തിരിച്ചറിഞ്ഞ് ഉന്നതവിദ്യാഭ്യാസ മേഖല തിരഞ്ഞെടുക്കാം. രാജ്യത്തിനകത്തും വിദേശത്തുമുള്ള കോഴ്‌സുകളുടെ വിവരങ്ങളറിഞ്ഞ് പഠിക്കാനും ജോലിസാധ്യത കണ്ടെത്താനും വിദ്യാർഥികളെ സഹായിക്കാൻ കണ്ണൂരിൽ കരിയർ ഗൈഡൻസ് കേന്ദ്രങ്ങൾ വരുന്നു.
ജില്ലാ എംപ്ലോയ്‌മെന്റ് എക്സ്‌ചേഞ്ചിന് കീഴിലാണ് കേന്ദ്രങ്ങൾ പ്രവർത്തിക്കുക. ഇതിനായി പയ്യന്നൂർ കണ്ടങ്കാളിയിൽ 13 സെന്റ് സ്ഥലം കണ്ടെത്തിയിട്ടുണ്ട്. മാർച്ച് മാസത്തിനുശേഷം നിർമാണം തുടങ്ങി ഒരുവർഷത്തിനകം പൂർത്തീകരിക്കാനാണ് ആലോചന.
കരിയർ ഗൈഡൻസ് കേന്ദ്രങ്ങൾ വഴി വിദ്യാർഥികൾക്ക് സൗജന്യമായാണ് സേവനങ്ങൾ നൽകുക. 4000 ചതുരശ്രയടിയിൽ രണ്ടുനിലകളിലായാണ് കെട്ടിടം പണിയുക. ഇവിടെ എം.എസ്‌സി. സൈക്കോളജി യോഗ്യതയുള്ള കരിയർ കൗൺസലർമാരെ നിയമിക്കും. പ്രധാനമായും രാജ്യത്തും വിദേശത്തുമുള്ള ഉന്നതവിദ്യാഭ്യാസ സ്ഥാപനങ്ങളിൽ പ്രവേശനം നേടാനുള്ള പരിശീലനം, അഭിരുചി പരീക്ഷ നടത്തി കോഴ്‌സ് തിരഞ്ഞെടുക്കാൻ സഹായിക്കുക, കൗൺസലിങ്‌ എന്നിവയാണ് ഇതിലൂടെ ലക്ഷ്യമിടുന്നത്.
സ്കോളർഷിപ്പ്, പ്രവേശനപരീക്ഷ എന്നിവയെക്കുറിച്ചുള്ള വിവരങ്ങൾ നൽകും. ഇതിനുപുറമെ യു.പി.എസ്.സി., ഐ.ബി.പി.എസ്., പി.എസ്.സി. മത്സരപരീക്ഷകൾക്കുള്ള പരിശീലനവും നൽകും. സിവിൽ സർവീസ് പരീക്ഷയ്ക്കും മറ്റും തയ്യാറെടുക്കുന്ന വിദ്യാർഥികൾക്ക് ഉപയോഗിക്കാവുന്ന ലൈബ്രറിയും ഇവിടെയൊരുക്കും. കരിയർ സംബന്ധമായ പ്രസിദ്ധീകരണങ്ങളുമുണ്ടാകും. സെന്ററിന്റെ നേതൃത്വത്തിൽ വിദ്യാഭ്യാസ സ്ഥാപനങ്ങളിൽ സെമിനാർ, കരിയർ ഗൈഡൻസ് ക്ലാസ് എന്നിവയും സംഘടിപ്പിക്കും.
സംസ്ഥാനത്താകെ ഏഴ്‌ കേന്ദ്രങ്ങൾ
സംസ്ഥാനത്ത് പേരാമ്പ്ര, ചിറ്റൂർ, കായംകുളം, നെയ്യാറ്റിൻകര, പാലോട്, കൊട്ടാരക്കര, തൃപ്പൂണിത്തുറ എന്നിവിടങ്ങളിലാണ് നിലവിൽ കരിയർ ഗൈഡൻസ് കേന്ദ്രങ്ങൾ പ്രവർത്തിക്കുന്നത്. ചേലക്കര, കരമന എന്നിവിടങ്ങളിൽ ഇതിനായുള്ള നിർമാണപ്രവർത്തനങ്ങൾ തുടങ്ങിയിട്ടുണ്ട്. ഏത് ജില്ലകളിലുള്ളവർക്കും കേന്ദ്രങ്ങളുടെ സേവനം ഉപയോഗപ്പെടുത്താം.പ്രവർത്തിക്കുക പയ്യന്നൂർ കണ്ടങ്കാളിയിൽ
ലക്ഷ്യം വിജ്ഞാന സമ്പദ്‌വ്യവസ്ഥ
രാജ്യത്തും വിദേശത്തമുള്ള അനുയോജ്യമായ കോഴ്‌സുകൾ കണ്ടെത്തി തൊഴിലവസരമൊരുക്കി അറിവിനെ സാമ്പത്തികരംഗത്ത് പ്രയോജനപ്പെടുത്തുകയാണ് ലക്ഷ്യം. കൃത്യമായ പഠനത്തിലൂടെയും ശാസ്ത്രീയ പരിശീലനത്തിലൂടെയും അവരുടെ കഴിവിനനുസരിച്ച് പഠനമേഖല കണ്ടെത്തി നൽകും. സ്വകാര്യസ്ഥാപനങ്ങൾ 10,000 രൂപ മുതൽ വാങ്ങി നൽകുന്ന സേവനങ്ങളാണ് ഇതിലൂടെ വിദ്യാർഥികൾക്ക് സൗജന്യമായി ലഭിക്കുക.
രമേശൻ കുനിയിൽ ജില്ലാ എംപ്ലോയ്‌മെന്റ് ഓഫീസർ ഇൻ ചാർജ്‌
