തിരുവനന്തപുരം: വ്യവസായ സംരംഭങ്ങൾക്ക് പ്രവർത്തനത്തിന് ബുദ്ധിമുട്ടുണ്ടാക്കുന്ന നിയമങ്ങളും ചട്ടങ്ങളും ഭേദഗതി ചെയ്യാൻ സർക്കാർ തീരുമാനിച്ചു. വ്യവസായ സ്ഥാപനങ്ങളിൽ ഇടയ്ക്കിടെ ഉദ്യോഗസ്ഥർ പരിശോധനനടത്തുന്നത് ഒഴിവാക്കി. ഉദ്യോഗസ്ഥർക്ക് ആവശ്യമുള്ള വിവരങ്ങൾ സംരംഭകൻ സാക്ഷ്യപത്രമായി നൽകിയാൽ മതിയെന്നാണ് പുതിയ വ്യവസ്ഥ.

13 വകുപ്പുകളുമായി ബന്ധപ്പെട്ട 12 നിയമങ്ങളും 12 ചട്ടങ്ങളുമാണ് ഭേദഗതിചെയ്യുന്നത്. കൂടാതെ മൂന്ന് പുതിയ നിയമങ്ങളും കൊണ്ടുവരും. വ്യവസായം, തൊഴിൽ, തദ്ദേശ സ്വയംഭരണം, ലീഗൽ മെട്രോളജി, എക്‌സൈസ്, വനം, ഭൂഗർഭജലം, രജിസ്‌ട്രേഷൻ, കൃഷി, ഇലക്‌ട്രിക്കൽ ഇൻസ്പെക്ടറേറ്റ്, പരിസ്ഥിതി, പൊതുഭരണം, റവന്യു വകുപ്പുകളിലെ നിയമങ്ങളും ചട്ടങ്ങളുമാണ് മാറ്റുന്നത്. ഇതിനുള്ള കരട് ബില്ല് തയ്യാറാക്കി നിയമവകുപ്പിന് സമർപ്പിച്ചു.

ദേശീയ നിയമ സർവകലാശാല മുൻവൈസ് ചാൻസലർ ഡോ. കെ.സി. സണ്ണി അധ്യക്ഷനായ സമിതിയുടെ ശുപാർശ പരിഗണിച്ചാണ് നടപടി. രാത്രി ഒമ്പതുമുതൽ രാവിലെ ആറുവരെ സ്ത്രീകളെ ജോലിക്ക് നിയോഗിക്കുന്നുണ്ടെങ്കിൽ അക്കാര്യം നിയമന ഉത്തരവ് നൽകുന്ന ഘട്ടത്തിൽ വ്യക്തമാക്കണമെന്നാണ് പുതിയ വ്യവസ്ഥ. ഇതിന് അവരുടെ സമ്മതം വാങ്ങണം.

ചെറിയ തർക്കങ്ങളും പിഴയും കോടതിയിലെത്തുന്നത് ഒഴിവാക്കാനും വ്യവസ്ഥയുണ്ട്. വ്യവസായ സംരംഭങ്ങൾക്ക് കോടതി വഴി പിഴചുമത്തുന്നത് ഒഴിവാക്കി. വകുപ്പിലെ ഭരണവിഭാഗത്തിന് ഇതിനുള്ള അധികാരം നൽകി. ഇതിൽ പരാതിയുണ്ടെങ്കിൽ സർക്കാരിന് അപ്പീൽനൽകാനുള്ള വ്യവസ്ഥ ഉൾപ്പെടുത്തി. പിഴ ഈടാക്കാനുള്ള കോടതി വ്യവഹാരവും ഒഴിവാക്കി. പകരം ഏത് പിഴയും റവന്യു റിക്കവറിയിലൂടെ പിരിച്ചെടുക്കുന്ന വ്യവസ്ഥ ഉൾപ്പെടുത്തി.

മറ്റ് പ്രധാന മാറ്റങ്ങൾ

* വ്യവസായ സംരംഭങ്ങളുടെ രജിസ്‌ട്രേഷൻ കാലാവധി ഒരുവർഷത്തിൽനിന്ന് അഞ്ചുവർഷമാക്കും.

* വ്യവസായ സംരംഭങ്ങളുടെ കെട്ടിടങ്ങൾക്കുള്ള പ്ലാൻ നിശ്ചിത സമയത്തിനുള്ളിൽ അംഗീകരിക്കണം. ഇല്ലെങ്കിൽ അനുമതി ലഭിച്ചതായി കണക്കാക്കാം.

* തദ്ദേശ സ്ഥാപനങ്ങളുടെ അനുമതി ലഭിക്കേണ്ട വ്യവസായ സംരംഭങ്ങളുടെ പട്ടിക കാലോചിതമായി പുതുക്കി നിശ്ചയിച്ചു.

* പൊതു അവധിദിനങ്ങൾ ഏതൊക്കെയാണെന്ന് തൊഴിലുടമയും തൊഴിലാളികളും വകുപ്പ് ഉദ്യോഗസ്ഥന്റെ സാനിധ്യത്തിൽ മുൻകൂട്ടി നിശ്ചയിക്കണം.

* ഫാക്ടറികളുടെ മലിനീകരണം സംബന്ധിച്ച് തദ്ദേശസ്ഥാപനങ്ങൾ നടത്തുന്ന പരിശോധനയുടെ ചെലവ് വ്യവസായ സ്ഥാപനങ്ങളിൽനിന്ന് ഈടാക്കാൻ പാടില്ല.

* സംരംഭകർക്ക് പറയാനുള്ളത്‌ കേൾക്കാതെ ഫാക്ടറികൾ, തൊഴിൽകേന്ദ്രങ്ങൾ, യന്ത്രയൂണിറ്റുകൾ തുടങ്ങിയ സ്ഥാപനങ്ങളുടെ അനുമതി റദ്ദാക്കാൻ തദ്ദേശസ്ഥാപനങ്ങൾക്ക് അധികാരമില്ല.

* ജലമലിനീകരണം തടയൽ അതോറിറ്റി, മലിനീകരണ നിയന്ത്രണ അതോറിറ്റി എന്നിവയുടെ ചെയർമാന്മാരായി വിരമിച്ച ജുഡീഷ്യൽ ഓഫീസർക്കും നിയമനം നൽകാം.