പേരാവൂർ : ഇരിട്ടി സഹകരണ റൂറൽ ബാങ്ക് പേരാവൂർ ശാഖയുടെ പുതിയ ഓഫീസ് ദാരോത്ത് ബിൽഡിംങ്ങിൽ പ്രവർത്തനം തുടങ്ങി. നിയമസഭ സ്പീക്കർ എൻ.ഷംസീർ ഉദ്ഘാടനം ചെയ്തു. സണ്ണി ജോസഫ് എം.എൽ.എ അധ്യക്ഷനായി. പി. പുരുഷോത്തമൻ ലോക്കർ ഉദ്ഘാടനവും വി.രാമകൃഷ്ണൻ ആദ്യ നിക്ഷേപ സ്വീകരണവും ടി.ജി.രാജേഷ് ആദ്യ വായ്പ വിതരണവും കെ.സുധാകരൻ കമ്പ്യൂട്ടർ സ്വിച്ച് ഓണും നിർവഹിച്ചു. പഞ്ചായത്ത് പ്രസിഡൻറുമാരായ പി.പി.വേണുഗോപാലൻ, സി.ടി.അനീഷ്, ജില്ലാ പഞ്ചായത്തംഗം ജൂബിലി ചാക്കോ, ബേബി സോജ, റജീന സിറാജ്, ജയശ്രീ, വി.ജി.പദ്മനാഭൻ തുടങ്ങിയവർ സംസാരിച്ചു.

പേരാവൂർ: ടൗണിൽ വ്യാപാര സംഘടനകൾ ആഹ്വാനം ചെയ്യുന്ന ഹർത്താലുകൾക്ക് സമയക്രമീകരണം ഏർപ്പെടുത്തണമെന്ന് താലൂക്കാസ്പത്രി റോഡിലെ ഓട്ടോത്തൊഴിലാളികൾ ആവശ്യപ്പെട്ടു. ടൗണിലെത്തുന്ന ഉപഭോക്താക്കളെയും വ്യാപാര സ്ഥാപനങ്ങളെ ആശ്രയിച്ച് കഴിയുന്ന ജീവനക്കാർ, ഓട്ടോ-ടാക്സി തൊഴിലാളികൾ എന്നിവരെയും പെട്ടെന്നുള്ള ഹർത്താലുകൾ ബാധിക്കുന്നുണ്ട്. ഇതൊഴിവാക്കാൻ സംയുക്ത വ്യാപാര സംഘടനകൾ ഉചിതമായ തീരുമാനമെടുക്കണമെന്നും ഓട്ടോത്തൊഴിലാളികൾ നിവേദനത്തിലൂടെ ആവശ്യപ്പെട്ടു. വ്യാപാരി വ്യവസായി ഏകോപന സമിതി, വ്യാപാരി വ്യവസായി സമിതി , യുണൈറ്റഡ് മർച്ചൻറ്സ് ചേംബർ എന്നീ സംഘടനകൾക്ക് ഓട്ടോത്തൊഴിലാളികൾ നിവേദനം നല്കി.

പേരാവൂർ : എഴുത്തുകാരൻ ഷുക്കൂർ പെടയങ്ങോട് സ്വന്തം നാട്ടിൽ തുടങ്ങിയ വരാന്ത ചായപ്പീടിക പുസ്തകച്ചർച്ച പരിപാടി ‘സഞ്ചരിക്കുന്ന ‘വരാന്തയായി മാറുന്നു. ഇക്കുറി മണത്തണ അയോത്തുംചാലിൽ ഷുക്കൂർ എത്തിയത് സി. എം സുനിൽകുമാറിന്റെ ‘വീട്ടിലെ ഊണ് ‘ എന്ന ചെറിയൊരു തനി നാടൻ ഹോട്ടലിൽ. ഷുക്കൂറിന്റെ വരാന്ത സുനിലിന്റെയും വരാന്ത യായി. ആദ്യമായി ചർച്ച ചെയ്തത് ഷനോജ്.ആർ. ചന്ദ്രന്റെ കഥകൾ. പുതു തലമുറ കഥാകൃത്തുകളിൽ ശ്രദ്ധേയനായ ഷനോജ് ആലപ്പുഴ ചമ്പക്കുളം സ്വദേശിയാണ്. അയോത്തുംചാലിലെ വരാന്തയിൽ ആലപ്പുഴയിൽ നിന്ന് ഷനോജും എത്തി. കാലൊടിഞ്ഞ പുണ്യാളൻ ഉൾപ്പെടെയുള്ള കഥകളെ കുറിച്ച് വായനക്കാരുടെ അഭിപ്രായങ്ങൾ കേട്ടു. കഥാകൃത്തുമായി സംവാദവുമുണ്ടായി. പൊതുപ്രവർത്തകനായ ഷിജിത്ത് വായന്നൂർ ചർച്ചക്ക് തുടക്കം കുറിച്ചു. തുടർന്ന് ഡാലിയ ജോണി, അർസൽ അസിബിൻ മുഹമ്മദലി, ശിവദർശന എന്നിവരും കഥകളെക്കുറിച്ച് വിലയിരുത്തി സംസാരിച്ചു. ഷുക്കൂർ പെടയങ്ങോട് ചർച്ച നിയന്ത്രിച്ചു. എഴുത്തുകാരായ വിനോയ് തോമസ്, വി.കെ. ജോസഫ്, ജിജേഷ് ഭാസ്കർ, ചിത്രകാരൻ ജോയ് ചാക്കോ, നാടക പ്രവർത്തകൻ രാജേഷ് മണത്തണ, സാംസ്‌കാരിക പ്രവർത്തകരായ പി. ശിവദാസൻ, മഞ്ജു ലക്ഷ്മി, എൻ. ശൈലജ, പി. പി വ്യാസ്ഷാ, ജോസ് ചേരിയിൽ തുടങ്ങിയവരും സംവാദത്തിൽ പങ്കെടുത്തു. സുനിൽ.പി. ഉണ്ണി, ദിലീപ് എന്നിവരുടെ പാട്ടുകളോടെയാണ് പരിപാടി തുടങ്ങിയത്. അയോത്തുംചാലിലെയും സമീപ പ്രദേശങ്ങളിലെയും നിരവധി പേർ വരാന്തയിൽ എത്തിയിരുന്നു. ഏപ്രിൽ മാസം വീണ്ടും ചർച്ച ഇതേ ഹോട്ടലിൽ സംഘടിപ്പിക്കുമെന്ന് ഷുക്കൂർ അറിയിച്ചു.