മുൻ മന്ത്രി സിറിയക് ജോൺ അന്തരിച്ചു
കോഴിക്കോട്‌ : മുൻ മന്ത്രിയും കോൺഗ്രസ് നേതാവുമായ സിറിയക് ജോൺ (90) അന്തരിച്ചു. 1982-83 കാലഘട്ടത്തിൽ കരുണാകരൻ മന്ത്രിസഭയിലെ കൃഷിവകുപ്പ് മന്തിയായിരുന്നു. കൽപ്പറ്റ മണ്ഡലത്തിൽ നിന്ന് ഒരു തവണയും തിരുവമ്പാടി മണ്ഡലത്തിൽ നിന്ന് മൂന്ന്‌ തവണയും എം.എൽ.എ ആയിട്ടുണ്ട്‌. കോൺഗ്രസിൽ നിന്ന് തെറ്റി എൻ.സി.പി.യിലേക്ക് പോയ സിറിയക് ജോൺ സംസ്ഥാന പ്രസിഡൻറ് പദവിയിലേക്കു വരെ ഉയർന്നിരുന്നു. 2007ൽ തിരികെ കോൺഗ്രസിലെത്തി.
സഹകരണമേഖല സംഘടനാ രംഗത്ത് വളരെനാൾ പ്രവർത്തിച്ച സിറിയക് ജോൺ താമരശ്ശേരി സർവീസ് സഹകരണ ബാങ്ക് പ്രസിഡൻറ്, കേരള സംസ്ഥാന മാർക്കടിംഗ് സഹകരണാ ഫെഡറേഷൻ പ്രസിഡന്റ്, ഇന്ത്യൻ റബ്ബർ ബോർഡംഗം എന്നീ നിലകളിലും പ്രവർത്തിച്ചു. കെ.പി.സി.സി അംഗം, കെ.പി.സി.സി എക്‌സിക്യൂട്ടീവ് അംഗം, കർഷക കോൺഗ്രസ് സംസ്ഥാന പ്രസിഡന്റ്, എൻ.സി.പി സംസ്ഥാന പ്രസിഡന്റ് എന്നീ പദവികളും വഹിച്ചിരുന്നു. ഭാര്യ: അന്നക്കുട്ടി. മകൻ: മനോജ്‌ പി. സിറിയക്.
