ഗണിതശാസ്ത്രത്തിലെ മാസ്റ്റേഴ്സ്, ഡോക്ടറൽ പഠനങ്ങൾക്കായി, ഡിപ്പാർട്ട്മെൻറ് ഓഫ് അറ്റോമിക് എനർജിയുടെ കീഴിലുള്ള, നാഷണൽ ബോർഡ് ഫോർ ഹയർ മാത്തമാറ്റിക്സ് (എൻ.ബി.എച്ച്.എം.) നൽകുന്ന സ്കോളർഷിപ്പുകൾക്ക് അർഹത നിർണയിക്കുന്ന സ്കോളർഷിപ്പ് റിട്ടൺ ടെസ്റ്റിന് അപേക്ഷിക്കാം.

2024-ലെ മാസ്റ്റേഴ്സ് സ്കോളർഷിപ്പ്, ഡോക്ടറൽ സ്കോളർഷിപ്പ് എന്നിവയ്ക്കാണ് അപേക്ഷ ക്ഷണിച്ചിരിക്കുന്നത്. അതിന്റെ ആദ്യഘട്ടമാണ് എഴുത്തുപരീക്ഷ. രണ്ടാംഘട്ടം, ആദ്യഘട്ട പരീക്ഷ അടിസ്ഥാനമാക്കി ഷോർട്ട് ലിസ്റ്റ് ചെയ്യപ്പെടുന്നവർക്കുള്ള അഭിമുഖമാണ്. രണ്ടു ഘട്ടങ്ങളിലെയും മികവ് പരിഗണിച്ചായിരിക്കും അന്തിമ തിരഞ്ഞെടുപ്പ്. അപേക്ഷകരുടെ അക്കാദമിക് മികവും തിരഞ്ഞെടുപ്പിൽ പരിഗണിച്ചേക്കാം.

രണ്ടു സ്കോളർഷിപ്പുകൾക്കും ഒരു പരീക്ഷയാണുള്ളത്. അപേക്ഷനൽകുമ്പോൾ ഏതെങ്കിലും ഒരു സ്കോളർഷിപ്പിലേക്കോ അതോ രണ്ടിലേക്കുമോ പരിഗണിക്കപ്പെടണമെന്ന് വ്യക്തമാക്കണം.

സ്കോളർഷിപ്പ് തുക

എം.എസ്‌സി. സ്കോളർഷിപ്പിന് തിരഞ്ഞെടുക്കപ്പെടുന്നവർക്ക് രണ്ടുവർഷത്തേക്ക് പ്രതിമാസം 8000 രൂപ സ്കോളർഷിപ്പ് ലഭിക്കും.

പി.എച്ച്.ഡി. ഗവേഷണത്തിന് പ്രതിമാസം 37,000 രൂപ നിരക്കിൽ രണ്ടുവർഷവും തൃപ്തികരമായ പുരോഗതി, മികവ് എന്നിവയ്ക്കു വിധേയമായി, തുടർന്നുള്ള രണ്ടുവർഷത്തേക്ക് 42,000 രൂപ നിരക്കിൽ ലഭിക്കും. എൻ.ബി.എച്ച്.എം. തീരുമാനത്തിനു വിധേയമായി അതിനുശേഷം ഒരു വർഷത്തേക്കുകൂടി സ്കോളർഷിപ്പ് കാലയളവ് നീട്ടിയേക്കാം.

പ്രതിവർഷ കണ്ടിൻജൻസി ഗ്രാൻറ്് 40,000 രൂപയും വീട്ടുവാടകബത്തയും ലഭിക്കും. മറ്റേതെങ്കിലും സ്കോളർഷിപ്പിനൊപ്പം മാസ്റ്റേഴ്സ്/ഡോക്ടറൽ സ്കോളർഷിപ്പ് സ്വീകരിക്കാനാകില്ല.

പരീക്ഷ

ജനവരി 20-ന് രാവിലെ 10.30 മുതൽ ഉച്ചയ്ക്ക് 1.30 വരെ നടത്തുന്ന പരീക്ഷയ്ക്ക് പ്രത്യേക സിലബസ് ഇല്ല. ബന്ധപ്പെട്ട മേഖലയിലെ പഠനങ്ങൾക്കുവേണ്ട വിഷയാധിഷ്ഠിത അറിവ് പരീക്ഷ വഴി വിലയിരുത്തും.

മുൻവർഷങ്ങളിലെ ചോദ്യപ്പേപ്പറുകൾ www.imsc.res.in/~nbhm/qp/ -ൽ ലഭിക്കും. കൊച്ചി, കോഴിക്കോട്, തിരുവനന്തപുരം എന്നിവയാണ് കേരളത്തിലെ പരീക്ഷാകേന്ദ്രങ്ങൾ.

അപേക്ഷ

അപേക്ഷ www.nbhmexams.in/ വഴി സാധാരണ അപേക്ഷാ ഫീസോടെ നവംബർ 30 വരെ നൽകാം. ഒരു സ്കോളർഷിപ്പിന് അപേക്ഷിക്കുന്നവർ 400 രൂപയും രണ്ട് സ്കോളർഷിപ്പിന്‌ അപേക്ഷിക്കുന്നവർ 600 രൂപയും അടയ്ക്കണം. 2023 ഡിസംബർ ഒന്നിന് അപേക്ഷിക്കുന്നവർക്കുള്ള അപേക്ഷാ ഫീസ് യഥാക്രമം 500 രൂപ, 750 രൂപ ആണ്. ഡിസംബർ രണ്ടുമുതൽ ഡിസംബർ 10 രാത്രി 11.59 വരെ അപേക്ഷിക്കാൻ അപേക്ഷാ ഫീസ്, യഥാക്രമം 750 രൂപ, 1000 രൂപ എന്നിങ്ങനെയാണ്.

സ്ഥാപനങ്ങൾ

ഈ സ്കോർ പരിഗണിച്ച് പിഎച്ച്.ഡി., ഇൻറഗ്രേറ്റഡ് പിഎച്ച്.ഡി. പ്രോഗ്രാം പ്രവേശനം നൽകുന്ന സ്ഥാപനങ്ങൾ: ഹരിഷ് ചന്ദ്ര റിസർച്ച് ഇൻസ്റ്റിറ്റ്യൂട്ട്, അലഹാബാദ് ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് എജുക്കേഷൻ ആൻഡ് റിസർച്ച് (ഐസർ) – ബർഹാംപുർ, മൊഹാലി, പുണെ, തിരുവനന്തപുരം കേരള സ്കൂൾ ഓഫ് മാത്തമാറ്റിക്സ്, കോഴിക്കോട് നാഷണൽ ഇൻസ്റ്റിറ്റ്യൂട്ട് ഓഫ് സയൻസ് എജുക്കേഷൻ ആൻഡ് റിസർച്ച് (നൈസർ), ഭുവനേശ്വർ ദി ഇൻസ്റ്റിറ്റ്യൂട്ട് ഓഫ് മാത്തമാറ്റിക്കൽ സയൻസസ്, ചെന്നൈ.

വിവരങ്ങൾക്ക്: www.imsc.res.in/~nbhm/

യോഗ്യത

നിലവിൽ മാത്തമാറ്റിക്സിലെ മാസ്റ്റേഴ്സ് പ്രോഗ്രാമിൽ എൻറോൾ ചെയ്തവർ, 2024-25ൽ അതിൽ എൻറോൾ ചെയ്യാൻ ഉദ്ദേശിക്കുന്നവർ, മാത്തമാറ്റിക്സിൽ പിഎച്ച്.ഡി.ക്ക്‌ ഇതിനകം പ്രവേശനം നേടിയവർ, 2025 ജനുവരിക്കകം പ്രവേശനം നേടാൻ ഉദ്ദേശിക്കുന്നവർ എന്നിവർക്ക് അപേക്ഷിക്കാം. മാത്തമാറ്റിക്സിന്റെ നിർവചനത്തിൽ മാത്തമാറ്റിക്സ്, സ്റ്റാറ്റിസ്റ്റിക്സ്, അപ്ലൈഡ് മാത്തമാറ്റിക്സ്, മാത്തമാറ്റിക്കൽ സയൻസസ് തുടങ്ങിയവ ഉൾപ്പെടും. രണ്ടുവർഷ മാസ്റ്റേഴ്സ്, അഞ്ചുവർഷ ഇൻറഗ്രേറ്റഡ് മാസ്റ്റേഴ്സ് പ്രോഗ്രാമിന്റെ അവസാന രണ്ടുവർഷം, ഇന്റഗ്രേറ്റഡ് പിഎച്ച്.ഡി. പ്രോഗ്രാമിന്റെ ആദ്യ രണ്ടുവർഷം തുടങ്ങിയവ മാസ്റ്റേഴ്സ് പ്രോഗ്രാമുകളായി കണക്കാക്കും. ആറുവർഷത്തെ ഇൻറഗ്രേറ്റഡ് എം.എഡ്. കോഴ്സും മാസ്റ്റേഴ്സ് പ്രോഗ്രാമായി പരിഗണിക്കും.

ഡോക്ടറൽ/മാസ്റ്റേഴ്സ് സ്കോളർഷിപ്പ് അപേക്ഷകർക്ക് മുമ്പ് എൻ.ബി.എച്ച്.എം. ഡോക്ടറൽ/മാസ്റ്റേഴ്സ് സ്കോളർഷിപ്പ് ലഭിച്ചിരിക്കരുത്.