സ്മാർട്ഫോണുകൾ അപ്രത്യക്ഷമാവുമോ? ‘എ.ഐ പിന്‍’ പുറത്തിറക്കി ഹ്യുമേന്‍
ബ്രിട്ടീഷ് അമേരിക്കന്‍ ഡിസൈനറും ഹ്യുമേന്‍ എ.ഐ എന്ന എ.ഐ കമ്പനിയുടെ സഹസ്ഥാപകനും ചെയര്‍മാനുമായ ഇമ്രാന്‍ ചൗദ്രി ആറ് മാസങ്ങള്‍ക്ക് മുമ്പ് ടെഡില്‍ (TED) സംസാരിക്കവെ ഒരു ഉപകരണം അവതരിപ്പിക്കുകയുണ്ടായി സ്‌ക്രീനുകളില്ലാത്ത ഒരു പുത്തന്‍ സാങ്കേതിക വിദ്യ. സ്മാര്‍ട്‌ഫോണുകള്‍ ഉള്‍പ്പടെ വിവിധ ഉപകരണങ്ങളെ ഈ ലോകത്ത് നിന്ന് അപ്രത്യക്ഷമാക്കിയേക്കാവുന്ന ഒരുഗ്രന്‍ സാങ്കേതിക വിദ്യ. മാസങ്ങള്‍ക്കിപ്പുറം ഹ്യുമേന്‍ ആ സാങ്കേതിക വിദ്യ ഔദ്യോഗികമായി അവതരിപ്പിച്ചിരിക്കുന്നു ‘എ.ഐ പിന്‍’ എന്നാണ് അതിനെ വിളിക്കുന്നത്.
ആപ്പിളിലെ ഡിസൈനര്‍മാരായിരുന്ന ഇമ്രാന്‍ ചൗദ്രിയും ബെത്തനി ബോജിയോര്‍നോയും ചേര്‍ന്നാണ് ഹ്യുമേന്‍ എ.ഐ എന്ന സ്റ്റാര്‍ട്ട് അപ്പിന് തുടക്കമിട്ടത്. ഇപ്പോള്‍ അവതരിപ്പിച്ചിരിക്കുന്ന എ.ഐ പിന്‍ സ്മാര്‍ട്‌ഫോണിനെ പകരം വെക്കുന്ന സാങ്കേതിക വിദ്യയാണെന്ന് ഹ്യുമേന്‍ പറയുന്നു.
ഈ ഉപകരണത്തിന് ഡിസ്‌പ്ലേയുണ്ടാവില്ല. പകരം ഒരു നീല പ്രൊജക്ടര്‍ ആണുള്ളത്. ഉപഭോക്താക്കള്‍ക്ക് ശബ്ദനിര്‍ദേശങ്ങളിലൂടെയും കൈകളുടെ ചലനത്തിലൂടെയും ഈ ഉപകരണം നിയന്ത്രിക്കാം.
എ.ഐ സാങ്കേതിക വിദ്യകളുടെ സഹായത്തോടെ നിര്‍മിച്ച ഈ ഉപകരണം എക്ലിപ്‌സ്, ലൂണാര്‍, ഇക്വിനോക്‌സ് എന്നീ മൂന്ന് കളര്‍ ഓപ്ഷനുകളിലാണ് പുറത്തിറക്കിയിരിക്കുന്നത്. 699 ഡോളറാണ് ഇതിന് വില (ഏകദേശം 58212 രൂപ) 25 ഡോളറിന്റെ (2082 രൂപ) പ്രതിമാസ സബ്‌സ്‌ക്രിപ്ഷനും ഉണ്ട്.
എന്താണ് എ.ഐ പിന്‍?രണ്ട് ഭാഗങ്ങളാണ് ഈ ഉപകരണത്തിനുള്ളത്- ഒരു കംപ്യൂട്ടറും ഒരു ബാറ്ററി ബൂസ്റ്ററും. കംപ്യൂട്ടറിനുള്ളിലെ ചെറിയ ബാറ്ററിയ്ക്ക് വേണ്ട ഊര്‍ജം നല്‍കുകയാണ് ബൂസ്റ്ററിന്റെ ജോലി. ഒരു ദിവസം മുഴുവന്‍ ഇത് ഉപയോഗിക്കാം. ബാറ്ററി ബൂസ്റ്ററിനെ വസ്ത്രത്തിനുള്ളിലും കംപ്യൂട്ടറിനെ പുറത്തുമായാണ് സ്ഥാപിക്കുക. കാന്തിക ശക്തി ഉപയോഗിച്ചാണ് ഇവ രണ്ടും വസ്ത്രത്തിനപ്പുറവും ഇപ്പുറവുമായി ചേര്‍ത്തുവെക്കുക. ഒന്നിലധികം ബാറ്ററികള്‍ മാറ്റി ഉപയോഗിക്കുകയും ചെയ്യാം.
ശബ്ദനിര്‍ദേശങ്ങളിലൂടെ പ്രവര്‍ത്തിക്കുന്ന ഉപകരണമാണെങ്കിലും ഏതെങ്കിലും വേക്ക് അപ്പ് വേഡിന് വേണ്ടി എല്ലാ സമയവും അവ നമ്മുടെ ശബ്ദം കേട്ടുകൊണ്ടിരിക്കില്ല. ഉദാഹരണത്തിന് ഹേയ് ഗൂഗിള്‍ എന്ന വേക്ക് അപ്പ് വേഡ് ഉപയോഗിച്ചാണ് ഗൂഗിള്‍ അസിസ്റ്റന്റ് ഉപയോഗിച്ച് തുടങ്ങുന്നത്. ഈ കമാന്റ് കേള്‍ക്കുന്നതിനായി ഗൂഗിള്‍ അസിസ്റ്റന്റ് നിങ്ങളുടെ ശബ്ദം കേട്ടുകൊണ്ടിരിക്കുന്നുണ്ടാവും. അത്തരം ഒരു രീതി എ.ഐ പിന്‍ എന്ന ഉപകരണത്തിനില്ല എന്നാണ് കമ്പനി മേധാവികള്‍ പറയുന്നത്.
ശബ്ദം, സ്പര്‍ശനം, വിരലുകളുടെ ചലനം, ലേസര്‍ ഇങ്ക് ഡിസ്‌പ്ലേ എന്നിവിയലൂടെയാണ് ഈ ഉപകരണവുമായി ഉപഭോക്താവ് സംവദിക്കുന്നത്. ടി മൊബൈല്‍ നെറ്റ് വര്‍ക്കുമായി ബന്ധപ്പിച്ചുള്ള സ്വന്തം കണക്ടിവിറ്റിയും ഇതില്‍ ഒരുക്കിയിട്ടുണ്ട്. ക്വാല്‍കോം സ്‌നാപ്ഡ്രാഗണ്‍ ചിപ്പ് ആണ് ഇതില്‍ ഉപയോഗിച്ചിരിക്കുന്നത്.
പ്രധാന കംപ്യൂട്ടറില്‍ ഒരു അള്‍ട്രൈ വൈഡ് ആര്‍ജിബി ക്യാമറയും മോഷന്‍ സെന്‍സറുകളും നല്‍കിയിട്ടുണ്ട്. ഒപ്പം മൈക്കും സ്പീക്കറും ഉണ്ട്.
എന്തെല്ലാം ആണ് എ.ഐ പിന്നിന്റെ ഉപയോഗം?.
ഒരുതരത്തില്‍ അലെക്‌സ, ഗൂഗിള്‍ അസിസ്റ്റന്റ് എന്നിവ അടിസ്ഥാനമാക്കി പ്രവര്‍ത്തിക്കുന്ന സ്മാര്‍ട് സ്പീക്കറുകളെ പോലെയാണ് എ.ഐ പിന്നിന്റെ പ്രവര്‍ത്തനം. ഒപ്പം അധികമായി ഒരു ലേസര്‍ പ്രൊജക്ടര്‍ ഡിസ്‌പ്ലേയുമുണ്ടെന്ന് മാത്രം.
ഡിസ്‌പ്ലേയുടെ അഭാവം പരിഹരിക്കുക ഈ പ്രൊജക്ടറാണ്. നിങ്ങളുടെ കൈയ്യിലാണ് എ.ഐ പിന്‍ വിവരങ്ങള്‍ പ്രൊജക്ട് ചെയ്ത് പ്രദര്‍ശിപ്പിക്കുക. ഉപകരണത്തിന് മുമ്പില്‍ കൈപത്തി വിടര്‍ത്തി വെക്കുന്നതോടെ ഡിസ്‌പ്ലേ പ്രൊജക്ട് ചെയ്യും. ഉദാഹരണത്തിന് ഇഷ്ടപ്പെട്ട ഒരു പാട്ട് പ്ലേ ചെയ്യാനുള്ള നിര്‍ദേശം ശബ്ദനിര്‍ദേശമായി നല്‍കിയാല്‍ എ.ഐ പിന്‍ പാട്ട് പ്ലേ ചെയ്യും. ഈ മൂസിക് പ്ലെയര്‍ സ്‌ക്രീന്‍ കാണണം എങ്കില്‍ ഉപകരണത്തിന് നേരെ കൈപത്തി വിടര്‍ത്തി വെച്ചാല്‍ മതി. ശേഷം കൈയ്യിന്റെയും വിരലുകളുടേയും ചലനത്തിലൂടെ പ്ലെയര്‍ നിയന്ത്രിക്കാനാവും.
അതുപോലെ ചോദ്യങ്ങള്‍ക്കുള്ള മറുപടി ശബ്ദമായി മറുപടി നല്‍കുകയും ചെയ്യും. മറ്റുള്ളവര്‍ക്ക് സന്ദേശങ്ങള്‍ അയക്കാനും, സന്ദേശങ്ങള്‍ വായിക്കാനും ഈ ഉപകരണത്തിലൂടെ സാധിക്കും.
ഒരു വോയ്‌സ് ട്രാന്‍സിലേറ്റര്‍ ഉപകരണമായും എ.ഐ പിന്‍ ഉപയോഗിക്കാനാവും. മറ്റ് ഭാഷകളില്‍ സംസാരിക്കുമ്പോള്‍ ഈ ഉപകരണം ഉപയോഗിച്ച് ആ ഭാഷ തര്‍ജ്ജമ ചെയ്ത് കേള്‍ക്കാനും അതുവഴി അവര്‍ പറയുന്നത് മനസിലാക്കാനും സാധിക്കും.
ക്യാമറ ഉപയോഗിച്ച് വസ്തുക്കള്‍ തിരിച്ചറിയാനും ആ വസ്തുക്കളുമായി ബന്ധപ്പെട്ട വിവരങ്ങള്‍ അന്വേഷിക്കാനും എഐ പിന്നിലൂടെ സാധിക്കും. ഒപ്പം ഫോട്ടോകള്‍ എടുക്കാനും, ആക്ഷന്‍ ക്യാമറയെ പോലെ വീഡിയോ പകര്‍ത്താനും കഴിയും.
എ.ഐ പിന്‍ ഉപയോഗിച്ച് പകര്‍ത്തിയ ചിത്രങ്ങളും വീഡിയോകളും, മ്യൂസിക് പ്ലെര്‍, ഫോണ്‍ കോളുകള്‍, സന്ദേശങ്ങള്‍ എന്നിവ കാണാനും മറ്റുമായി ഹ്യുമേന്‍ സെന്റര്‍ എന്ന പേരില്‍ ഒരു പ്ലാറ്റ്‌ഫോം ഒരുക്കിയിട്ടുണ്ട്. ഈ പ്ലാറ്റ്‌ഫോമില്‍ ലോഗിന്‍ ചെയ്തുവേണം എഐ പിന്‍ ഉപയോഗിക്കാന്‍.
