കൂട്ടുപുഴയിൽ ബൈക്കിൽ കടത്തുകയായിരുന്ന 105 ഗ്രാം എം.ഡി.എം.എ പിടികൂടി
കൂട്ടുപുഴ : എക്സൈസ് ചെക്ക്പോസ്റ്റ് എക്സൈസ് ഇൻസ്‌പെക്ടർ പി.അനീഷ് മോഹനും പാർട്ടിയും നടത്തിയ വാഹന പരിശോധനയിൽ ബൈക്കിൽ കടത്തുകയായിരുന്ന 105 ഗ്രാം എം.ഡി.എം.എ പിടികൂടി. കോഴിക്കോട് മേടപറമ്പിൽ കുണ്ടുങ്ങൽ ഹുസ്നി മുബാറക്ക് (28) എന്നയാളെ അറസ്റ്റ് ചെയ്ത് കേസെടുത്തു.
മാർക്കറ്റിൽ പത്ത് ലക്ഷത്തിലേറെ രൂപ വില വരുന്ന സിന്തറ്റിക് മയക്കുമരുന്നാണ് ഇയാളിൽ നിന്നും പിടികൂടിയത്. ടിയാനെ ചോദ്യം ചെയ്തതിൽ കോഴിക്കോട് ഭാഗത്തെ കോളേജുകളിലും മറ്റും വിദ്യാർത്ഥികൾക്ക് ലഹരി മരുന്ന് എത്തിക്കുന്ന മൊത്ത വില്പനക്കാരനാണ് പ്രതി എന്ന് എക്സൈസ് അധികൃതർ പറഞ്ഞു.
ഇയാൾക്കെതിരെ മുൻപ് കോഴിക്കോട് ജില്ലയിൽ നർക്കോട്ടിക്ക് കേസ് നിലവിലുണ്ട്. പാർട്ടിയിൽ പ്രിവന്റീവ് ഓഫീസർമാരായ എ.അസീസ്, ടി.വി.കമലാക്ഷൻ, പ്രിവന്റീവ് ഓഫീസർ(ഗ്രേഡ്) ടി.ഖാലിദ്, കെ.കെ.ബിജു എന്നിവരും പങ്കെടുത്തു.
