Social

വാട്സാപ്പില്‍ പുതിയ തട്ടിപ്പ്, ഇത്തവണ സൂക്ഷിക്കേണ്ടത് യു.എസ് കോഡ്

Published

1 year ago

August 28, 2023

NH newsdesk

Share our post

വാട്സാപ്പ് ഉപയോക്താക്കളെ ആശങ്കയിലാഴ്ത്തി രാജ്യാന്തര നമ്പറുകള്‍ ഉപയോഗിച്ചുകൊണ്ടുള്ള സ്പാം കോള്‍ തട്ടിപ്പ് പുതിയ രൂപത്തില്‍ വീണ്ടും സജീവമാകുന്നു. രണ്ട് മാസം മുൻപ് വരെ രാജ്യാന്തര നമ്പറുകളില്‍നിന്നുള്ള സ്പാം കോളുകള്‍ ലക്ഷക്കണക്കിന് ഇന്ത്യക്കാരുടെ ഉറക്കം കെടുത്തിയിരുന്നു. ഏതാണ്ട് ഇതിന് സമാനമായ തട്ടിപ്പാണ് ഇപ്പോള്‍ വീണ്ടും റിപ്പോര്‍ട്ട് ചെയ്യപ്പെട്ടിരിക്കുന്നത്.

അ‌മേരിക്കൻ കോഡുകളുള്ള നമ്പറുകളില്‍നിന്നാണ് കോളുകളും മെസേജുകളും എത്തുന്നത് എന്നതാണ് ഇത്തവണത്തെ വ്യത്യാസം. ഉന്നത ഉദ്യോഗസ്ഥരെന്ന വ്യാജേനയാണ് ഈ നമ്പറുകളില്‍നിന്ന് വിളിക്കുന്ന ആളുകള്‍ സംസാരിക്കുന്നതെന്ന് IANS റിപ്പോര്‍ട്ട് ചെയ്യുന്നു. ”ഈ മെസേജ് കണ്ടാല്‍ ഉടൻ എനിക്ക് മറുപടി നല്‍കുക, നന്ദി” തുടങ്ങിയ രീതിയിലുള്ള സന്ദേശങ്ങളും ആളുകള്‍ക്ക് എത്തുന്നുണ്ട്.

തന്റെ മേലധികാരിയാണ് എന്ന് ആളുകളെ വിശ്വസിപ്പിക്കുന്ന വിധത്തില്‍ ജോലിക്കാര്‍ക്കാണ് ഇത്തരം മെസേജുകള്‍ എത്തുന്നത് എന്നതാണ് ഇതില്‍ ശ്രദ്ധേയമായിട്ടുള്ള കാര്യം. ജോര്‍ജിയയിലെ അറ്റ്‌ലാന്റയുടെ +1 (404), ഇല്ലിനോയിയിലെ ചിക്കാഗോയുടെ +1 (773) എന്നീ കോഡുകളുള്ള അമേരിക്കൻ നമ്പറുകളില്‍ നിന്നാണ് വ്യാജ കോളുകളും മെസേജുകളും റിപ്പോര്‍ട്ട് ചെയ്യപ്പെട്ടിരിക്കുന്നത്. അ‌ടുത്തിടെ ഇന്ത്യയല്‍ അ‌നുഭവപ്പെട്ട സ്പാം കോള്‍ സ്കാമിന്റെ മറ്റൊരു പതിപ്പാണ് ഇത് എന്നാണ് കരുതപ്പെടുന്നത്.

നിലവില്‍ ഇന്ത്യയിലെ വാട്സാപ്പ് ഉപയോക്താക്കള്‍ക്ക് ഈ നമ്പറുകളില്‍നിന്ന് സ്പാം കോളുകള്‍ എത്തിയതായി റിപ്പോര്‍ട്ട് ചെയ്യപ്പെട്ടിട്ടില്ല. എങ്കിലും ഓണ്‍ലൈൻ തട്ടിപ്പുകളുടെ വിളനിലമായ ഇന്ത്യയിലെ വാട്സാപ്പ് ഉപയോക്താക്കളും ഇത്തരം രാജ്യാന്തര നമ്പറുകളില്‍നിന്നുള്ള കോളുകള്‍ സൂക്ഷ്മതയോടെ കൈകാര്യം ചെയ്യേണ്ടതുണ്ട്. രാജ്യാന്തര നമ്പറുകളില്‍നിന്നുള്ള കോളുകള്‍ സ്വീകരിക്കുമ്പോള്‍ ജാഗ്രത പാലിക്കണം എന്ന കേന്ദ്ര നിര്‍ദ്ദേശം ഇപ്പോഴും പ്രസക്തമാണ് എന്ന് ഈ വാട്സാപ്പ് സ്പാം കോള്‍ തട്ടിപ്പ് റിപ്പോര്‍ട്ടുകള്‍ സൂചിപ്പിക്കുന്നു.

ഇത്തരം വ്യാജ നമ്പറുകളില്‍നിന്നുള്ള സ്പാം കോളുകള്‍ ആളുകളുടെ അ‌ക്കൗണ്ടിലെ പണം മോഷ്ടിക്കുകയോ, സ്വകാര്യവിവരങ്ങള്‍ ചോര്‍ത്തിയെടുത്ത് പണം തട്ടുകയോ, വില്‍ക്കുകയോ ചെയ്യുന്നതിലേക്ക് നയിക്കുന്നു. അ‌ജ്ഞാത നമ്പറുകളില്‍നിന്നുള്ള കോളുകളും മെസേജുകളും കൈകാര്യം ചെയ്യുമ്പോള്‍ സ്മാര്‍ട്ട്ഫോണ്‍ ഉപയോക്താക്കള്‍, പ്രത്യേകിച്ച്‌ വാട്സാപ്പ് ഉപയോക്താക്കള്‍ ഏറെ ജാഗ്രത പുലര്‍ത്തണം.

മെറ്റയുടെ ഉടമസ്ഥതയിലുള്ള വാട്സാപ്പ് ഇന്ത്യയില്‍ ഏകദേശം 500 ദശലക്ഷത്തിലധികം ആളുകള്‍ ഉപയോഗിക്കുന്നുണ്ട് എന്നാണ് കണക്ക്. ഉപയോക്താക്കളുടെ ഈ ബാഹുല്യം തട്ടിപ്പുകാര്‍ക്ക് ചാകരയാകാറുണ്ട്.

തട്ടിപ്പിലേക്ക് നയിക്കുന്ന വ്യാജ ലിങ്കുകള്‍ വാട്സാപ്പലൂടെ വളരെ വേഗം പ്രചരിപ്പിക്കാനും അ‌തുവഴി ആളുകളുടെ വിവരങ്ങള്‍ ചോര്‍ത്താനും തട്ടിപ്പുകാര്‍ക്ക് കഴിയുന്നു. ഇതിന് പുറമേ ആകര്‍ഷകമായ പാര്‍ട്ട്ടൈം/ഫുള്‍ടൈം ജോലി അ‌വസരങ്ങള്‍ വാഗ്ദാനം ചെയ്തുകൊണ്ടുള്ള തട്ടിപ്പുകളും വാട്സാപ്പില്‍ സജീവമാണ്. അ‌തിനാല്‍ ഉപയോക്താക്കള്‍ ഇവയുടെ അ‌പകടം മനസിലാക്കിക്കൊണ്ടു വേണം വാട്സാപ്പ് കൈകാര്യം ചെയ്യാൻ.

ഇന്ത്യയില്‍ സ്പാം കോള്‍ തട്ടിപ്പുകള്‍ രൂക്ഷമാകുകയും കേന്ദ്ര സര്‍ക്കാര്‍ അ‌ടക്കം വിഷയത്തില്‍ ഇടപെടുകയും ചെയ്തപ്പോള്‍, സ്പാം കോളുകള്‍ തടയാൻ എഐ, മെഷീൻ ലേണിങ് എന്നീ സാങ്കേതിക വിദ്യകള്‍ ഉപയോഗിക്കും എന്ന് വാട്സാപ്പ് പ്രഖ്യാപിച്ചെങ്കിലും കാര്യമായ ഫലം ഉണ്ടായില്ല. തുടര്‍ന്നും നിരവധി പേര്‍ക്ക് സ്പാം കോളുകള്‍ എത്തിയിരുന്നു.

മലേഷ്യ (+60), ഇന്തോനേഷ്യ (+62), കെനിയ (+254), എത്യോപ്യ (+251), വിയറ്റ്‌നാം (+84) തുടങ്ങിയ വിവിധ രാജ്യങ്ങളിലെ നമ്പറുകളില്‍ നിന്നാണ് ഇന്ത്യയിലെ വാട്സ്‌ആപ്പ് ഉപയോക്താക്കള്‍ക്ക് തട്ടിപ്പ് കോളുകള്‍ എത്തിയിരുന്നത്. എന്നാല്‍ ഈ രാജ്യങ്ങളിലെ കോഡുകള്‍ ഉപയോഗിക്കുന്നു എങ്കിലും ഇത് യഥാര്‍ഥത്തില്‍ ആ രാജ്യങ്ങളില്‍നിന്ന് എത്തുന്ന കോളുകള്‍ ആയിരിക്കില്ല എന്നാണ് അ‌ധികൃതരുടെ നിഗമനം. ഇത്തരം ഓണ്‍ലൈൻ തട്ടിപ്പുകളില്‍ ഇരയാകാതിരിക്കാൻ ഓണ്‍ലൈൻ പണമിടപാടുകളിലും ഉപയോക്താക്കള്‍ ഏറെ ശ്രദ്ധിക്കണം എന്നാണ് അ‌ധികൃതര്‍ മുന്നറിയിപ്പ് നല്‍കുന്നത്.

വാട്സാപ്പ് കോള്‍ വഴിയോ സന്ദേശമായോ വാഗ്ദാനങ്ങള്‍ എത്തിയാല്‍ അ‌തില്‍ വീഴരുത്. പരിചയമില്ലാത്ത ഇൻര്‍നാഷണല്‍ നമ്പറില്‍ നിന്ന് തുടര്‍ച്ചയായി കോളുകള്‍ എത്തുന്നുണ്ടെങ്കില്‍ അ‌തിനോട് പ്രതികരിക്കാതിരിക്കുന്നതിനൊപ്പം ആ നമ്പര്‍ ബ്ലോക്ക് ചെയ്യുന്നതും നന്നായിരിക്കും.

Share our post

Social

വാട്ട്സാപ്പിൽ കിടിലൻ അപ്ഡേറ്റ്, ഇനി ടൈപ്പ് ചെയ്ത് പാതിവഴിയിലായ മെസേജുകൾ നഷ്ടപ്പെടില്ല

Published

1 week ago

November 15, 2024

NH newsdesk

Share our post

സമീപ വർഷങ്ങളിൽ, ആളുകൾ ആശയവിനിമയം നടത്തുന്ന രീതി മെച്ചപ്പെടുത്താൻ ലക്ഷ്യമിട്ട് വാട്ട്‌സ്ആപ്പ് നിരവധി അപ്‌ഡേറ്റുകൾ കൊണ്ടുവന്നിട്ടുണ്ട്. ഡിസപ്പിയറിങ് മെസേജ്, മൾട്ടി-ഡിവൈസ് സപ്പോർട്ട് എന്നിവ അതിൽ ചിലതുമാത്രം. അതിലേക്കിതാ ഒന്നുകൂടി. മെസേജ് ഡ്രാഫ്റ്റ്സ്. ടൈപ്പ് ചെയ്ത് പാതിവഴിയിലായ സന്ദേശങ്ങൾ നഷ്ടപ്പെടില്ല എന്നതാണ് ഈ പുത്തൻ അപ്ഡേറ്റിന്റെ പ്രത്യേകത. യൂസർ എക്സ്പീരിയൻസും ആശയവിനിമയത്തിലെ കാര്യക്ഷമതയും ഉറപ്പുവരുത്തുക എന്നതാണ് പുത്തൻ അപ്ഡേറ്റിലൂടെ വാട്ട്സാപ്പ് ഉദ്ദേശിച്ചിരിക്കുന്നത്.

പകുതി ടൈപ്പ് ചെയ്ത സന്ദേശങ്ങൾ സംരക്ഷിക്കുന്നതിനും പിന്നീടവ കണ്ടെത്തുന്നതിനുമുള്ള സൗകര്യമാണ് വാട്ട്സാപ്പ് ഉപയോക്താക്കൾക്കുമുന്നിൽ അവതരിപ്പിച്ചിരിക്കുന്നത്. ഒരു ചാറ്റിൽ ഒരിക്കൽ ടൈപ്പ് ചെയ്ത് പകുതിയാക്കിയ സന്ദേശം പിന്നീട് ഒരവസരത്തിൽ പൂർത്തിയാക്കാൻ പുതിയ അപ്ഡേറ്റ് വഴി ഉപയോക്താവിന് സാധിക്കും. അതും വളരെ എളുപ്പത്തിൽ. അപൂർണമായ സന്ദേശം ഡ്രാഫ്റ്റ് എന്ന ലേബലിൽ ചാറ്റ് ലിസ്റ്റിന്റെ മുകൾ ഭാഗത്ത് ഓട്ടോമാറ്റിക്കായി കാണാനാവും. അപൂർണമായസന്ദേശമാണെന്ന് പെട്ടന്ന് തിരിച്ചറിയാൻ ഇതുവഴി സാധിക്കും.

മെസേജ് ഡ്രാഫ്റ്റ് സംവിധാനം ഇപ്പോൾ ആഗോളതലത്തിൽ ലഭ്യമാക്കിയിട്ടുണ്ട്. എല്ലാ ആൻഡ്രോയ്ഡ് ഐ.ഒ.എസ് ഉപയോക്താക്കൾക്കും ഒരുപോലെ ഈ അപ്ഡേറ്റ് ഇപ്പോൾ ഉപയോഗിച്ചുതുടങ്ങാം. ഇതിനായി സ്വന്തം വാട്ട്‌സ്ആപ്പ് ആപ്പ് അപ്‌ഡേറ്റ് ചെയ്താൽ മാത്രം മതി.

പ്രവർത്തനക്ഷമത മെച്ചപ്പെടുത്തുന്നതിനും ഉപയോക്താക്കളുടെ സമയം ലാഭിക്കുന്നതിനും അവരുടെ അനുഭവം കാര്യക്ഷമമാക്കുന്നതിനുമുള്ള നിരന്തരമായ ശ്രമങ്ങളുടെ ഭാഗമാണ് ഈ അപ്ഡേറ്റ് എന്ന് വാട്ട്‌സ്ആപ്പ് വ്യക്തമാക്കി. പൂർത്തിയാകാത്ത സന്ദേശങ്ങൾ എളുപ്പത്തിൽ കണ്ടെത്താവുന്ന രീതിയിൽ ക്രോഡീകരിക്കുന്നതിലൂടെ, ദൈനംദിന ആശയവിനിമയത്തിനുള്ള കൂടുതൽ സൗകര്യപ്രദമായ ഉപകരണമായി വാട്ട്സാപ്പിനെ മാറ്റാനാണ് കമ്പനി ഉദ്ദേശിക്കുന്നത്.

Share our post

Social

വാട്സ്ആപ്പ് വീഡിയോ കോളിന്റെ ക്ലാരിറ്റി പോകുന്നതിന് പരിഹാരവുമായി വാട്സ്ആപ്പ്

Published

3 weeks ago

November 4, 2024

NH newsdesk

Share our post

സോഷ്യല്‍ മീഡിയ പ്ലാറ്റ്ഫോമായ വാട്സ്ആപ്പ് വീഡിയോ കോളിംഗിനായി ആളുകള്‍ ഏറെ ആശ്രയിക്കുന്ന ആപ്പുകളിലൊന്നാണ്. രാത്രി പോലുള്ള ലോ-ലൈറ്റ് സാഹചര്യങ്ങളില്‍ വാട്സ്ആപ്പിലെ വീഡിയോ കോളിംഗിന്റെ ക്ലാരിറ്റി കുറയുന്നതായി പലര്‍ക്കും പരാതിയുണ്ട്. എന്നാല്‍ ഇതിനൊരു പരിഹാരമായി ‘ലോ-ലൈറ്റ് മോഡ്’ വാട്സ്ആപ്പ് അവതരിപ്പിച്ചിരിക്കുകയാണ്. ഈ ഫീച്ചര്‍ എങ്ങനെയാണ് വാട്സ്ആപ്പില്‍ സെറ്റ് ചെയ്യുകയെന്ന് നോക്കാം.

വാട്സ്ആപ്പ് ഈയടുത്താണ് ലോ-ലൈറ്റ് മോഡ് അവതരിപ്പിച്ചത്. വെളിച്ചം കുറവുള്ള സാഹചര്യങ്ങളില്‍ വീഡിയോ കോളിംഗിന്റെ ക്ലാരിറ്റി കൂട്ടുവാനായുള്ള ഫീച്ചറാണിത്. വീഡിയോ കോളിംഗില്‍ ഫില്‍ട്ടറുകളും ബാക്ക്ഗ്രൗണ്ട് ഓപ്ഷനുകളും അവതരിപ്പിച്ചതിന്റെ തുടര്‍ച്ചയായാണ് ഈ ഫീച്ചര്‍ വാട്‌സ്ആപ്പ് അവതരിപ്പിച്ചത്.

എങ്ങനെ ലോ-ലൈറ്റ് മോഡ് സെറ്റ് ചെയ്യാം

വാട്സ്ആപ്പ് തുറന്ന് വീഡിയോ കോള്‍ ആരംഭിക്കുക. ഇതിന് ശേഷം വീഡിയോ ഫീഡ് ഫുള്‍സ്‌ക്രീനാക്കി മാറ്റുക. സ്‌ക്രീനിന്റെ വലതുമൂലയില്‍ കാണുന്ന ‘ബള്‍ബ്’ ഐക്കണില്‍ ക്ലിക്ക് ചെയ്യുകയാണ് അടുത്തതായി ചെയ്യേണ്ടത്. ഈ ബള്‍ബ് ഐക്കണില്‍ ടാപ്പ് ചെയ്താല്‍ ലോ-ലൈറ്റ് മോഡ് ഓണാക്കാം. വീണ്ടും ബള്‍ബ് ഐക്കണില്‍ ടാപ്പ് ചെയ്താല്‍ ഈ ഫീച്ചര്‍ ഓഫ് ചെയ്യാനും സാധിക്കും. എന്നാല്‍ സ്ഥിരമായി ലോ-ലൈറ്റ് മോഡ് എനാബിള്‍ ചെയ്ത് വയ്ക്കാനാവില്ല. നിങ്ങള്‍ വിളിക്കുന്ന ഓരോ കോളിനും പ്രത്യേകമായി ഈ ഫീച്ചര്‍ എനാബിള്‍ ചെയ്യേണ്ടതുണ്ട്.

വാട്സ്ആപ്പിന്റെ ഐഒഎസ്, ആന്‍ഡ്രോയ്ഡ് വേര്‍ഷനുകളില്‍ ലോ-ലൈറ്റ് മോഡ് ഇപ്പോള്‍ ലഭ്യമാണ്. എന്നാല്‍ വിന്‍ഡോസ് ഡെസ്‌ക്ടോപ്പ് ആപ്പില്‍ ഈ ഫീച്ചര്‍ പ്രത്യക്ഷപ്പെട്ടിട്ടില്ല. വീഡിയോ കോളുകളില്‍ ബ്രൈറ്റ്നസ് കൂട്ടുക മാത്രമാണ് കുറഞ്ഞ ലൈറ്റുള്ള സാഹചര്യങ്ങളില്‍ ഏക പോംവഴി. എന്തായാലും ലോ-ലൈറ്റ് മോഡിലൂടെ വീഡിയോ കോളിംഗ് കൂടുതല്‍ ആകര്‍ഷകമാക്കാനുള്ള ശ്രമത്തിലാണ് വാട്സ്ആപ്പ്.

Share our post

Social

വാട്‌സ്ആപ്പില്‍ വീണ്ടും പുത്തന്‍ ഫീച്ചറുകള്‍

Published

1 month ago

October 12, 2024

NH newsdesk

Share our post

വാട്‌സ്ആപ്പില്‍ വീണ്ടും പുത്തന്‍ ഫീച്ചറുകള്‍ എത്തിയിരിക്കുകയാണ്. 20 വ്യത്യസ്ത നിറങ്ങളിലും 22 ടെക്സ്ചറുകളുമുള്ള ചാറ്റ്-സ്പെസിഫിക് തീമുകളാണ് അണിയറയില്‍ ഒരുങ്ങുന്നത്. സ്പാം മെസേജുകള്‍ ബ്ലോക്ക് ചെയ്യാനുള്ള ഫീച്ചറിന് തൊട്ട് പിന്നാലെയാണ് അടുത്ത അപ്ഡേറ്റ്. ചാറ്റുകളില്‍ തനതായ തീമുകള്‍ ഉപയോഗിച്ച് സംഭാഷണങ്ങള്‍ പ്രൈവറ്റ് ആക്കാന്‍ ഈ പുതിയ ഫീച്ചര്‍ സഹായിക്കുമെന്നാണ് വാട്സ്ആപ്പ് അപ്ഡേറ്റുകള്‍ ഫോളോ ചെയ്യുന്ന വാബീറ്റ്ഇന്‍ഫോ റിപ്പോര്‍ട്ട് ചെയ്യുന്നത്.

ചാറ്റ് തീം ഫീച്ചര്‍, ബീറ്റ വേര്‍ഷനിലാണ് ആദ്യം പരീക്ഷിക്കുന്നത്. ഇത് ആക്സസ് ചെയ്യാന്‍ ഗൂഗിള്‍ പ്ലേ സ്റ്റോറില്‍ നിന്ന് ആന്‍ഡ്രോയിഡ് 2.24.21.34 വാട്‌സ്ആപ്പ് ബീറ്റ ഇന്‍സ്റ്റാള്‍ ചെയ്യുകയാണ് ആദ്യം വേണ്ടത്. തിരഞ്ഞെടുക്കപ്പെട്ട ബീറ്റ ടെസ്റ്റര്‍മാര്‍ക്ക് മാത്രമേ ഈ ഫീച്ചര്‍ ഇപ്പോള്‍ ലഭ്യമാകുകയുള്ളു. ഇവരുടെ പ്രതികരണത്തിന്റെ അടിസ്ഥാനത്തിലാവും ഈ ഫീച്ചര്‍ വിപുലമായി വാട്സ്ആപ്പ്
അവതരിപ്പിക്കുക.

റിയല്‍-ടൈം വോയ്സ് മോഡിലൂടെ മെറ്റ എഐയുമായി സംസാരിച്ച് ഫോട്ടോ എഡിറ്റ് ചെയ്യാന്‍ പറ്റുന്ന ഫീച്ചര്‍ വാട്‌സ്ആപ്പ് അടുത്തിടെ അവതരിപ്പിച്ചിരുന്നു. ചിത്രങ്ങളിലെ ബാക്ക്ഗ്രൗണ്ടും അനാവശ്യ ഭാഗങ്ങളും ഒഴിവാക്കാന്‍ ഇതിലൂടെ സാധിക്കും. ഈ ഫീച്ചറും കൈവിരല്‍ത്തുമ്പില്‍ ഉടന്‍ തന്നെ എത്തുമെന്നാണ് പ്രതീക്ഷ. ഒരു ചിത്രം കൊടുത്താല്‍ അതെന്താണെന്ന് മെറ്റ വിശദീകരിക്കുന്ന ഫീച്ചറും അണിയറയില്‍ ഒരുങ്ങുന്നുണ്ട്. സ്പാം മെസേജുകള്‍ ബ്ലോക്ക് ചെയ്യാനുള്ള ഫീച്ചറും ബീറ്റ ടെസ്റ്റര്‍മാര്‍ക്ക് ലഭിക്കും.

Share our post