പോസ്റ്റ് ഓഫീസ് സേവിംഗ്സ് അക്കൗണ്ടുകളില്‍ മൂന്ന് മാറ്റങ്ങള്‍; ഓരോ അക്കൗണ്ട് ഉടമയും അറിഞ്ഞിരിക്കേണ്ടവ
രാജ്യത്തെ സുരക്ഷിതമായ നിക്ഷേപ പദ്ധതിയാണ് പോസ്റ്റ് ഓഫീസ് നിക്ഷേപങ്ങള്‍. ജനപ്രിയമായ നിക്ഷേപ പദ്ധതി കൂടിയാണ് ഇത്. കാരണം, ഉയര്‍ന്ന പലിശയും കേന്ദ്ര സര്‍ക്കാരിന്റെ സുരക്ഷയും ആളുകളെ പോസ്റ്റ് ഓഫീസ് നിക്ഷേപങ്ങളിലേക്ക് ആകര്‍ഷിക്കുന്നു.
പോസ്റ്റ് ഓഫീസ് സേവിംഗ്സ് അക്കൗണ്ടില്‍ സുപ്രധാനമായ മാറ്റങ്ങള്‍ കൊണ്ടുവന്നിരിക്കയാണ് സര്‍ക്കാര്‍. പോസ്റ്റ് ഓഫീസ് സേവിംഗ്സ് അക്കൗണ്ട് സ്കീം, 2023 എന്നാണ് ഇത് അറിയപ്പെടുന്നത്. ഓരോ അക്കൗണ്ട് ഉടമയും അറിഞ്ഞിരിക്കേണ്ട ഈ മൂന്ന് മാറ്റങ്ങളെ കുറിച്ച്‌ അറിയാം
അക്കൗണ്ട് ഉടമകളുടെ എണ്ണത്തില്‍ മാറ്റം
പോസ്റ്റ് ഓഫീസ് സേവിംഗ്സ് അക്കൗണ്ടില്‍, ജോയിന്റ് അക്കൗണ്ട് ഉടമകളുടെ പരമാവധി എണ്ണം രണ്ട് ആയിരുന്നു. ഇത് പുതിയ ഭേദഗതിയോടെ മൂന്നായി ഉയര്‍ത്തിയിട്ടുണ്ട്.
അക്കൗണ്ടില്‍ നിന്നുള്ള പിൻവലിക്കലുകള്‍
പോസ്റ്റ് ഓഫീസ് സേവിംഗ്സ് അക്കൗണ്ടില്‍ നിന്നും പണം പിൻവലിക്കുന്നതിന്, പാസ്ബുക്ക് ഹാജരാക്കി പണം പിൻവലിക്കാനുള്ള അപേക്ഷ ഫോം 2 ആയിരുന്നു. ഇനി മുതല്‍ ഇത് ഫോം 3 ആക്കി സര്‍ക്കാര്‍ മാറ്റിയിട്ടുണ്ട്
നിക്ഷേപങ്ങളുടെ പലിശ
അക്കൗണ്ടിലെ ഏറ്റവും കുറഞ്ഞ തുകയ്ക്ക്, പ്രതിവര്‍ഷം 4 ശതമാനം നിരക്കില്‍ പലിശ നല്‍കും. പലിശ കണക്കാക്കി ഓരോ വര്‍ഷാവസാനവും അക്കൗണ്ടില്‍ ക്രെഡിറ്റ് ചെയ്യപ്പെടും.
ഇത് പ്രകാരം, ഒരു അക്കൗണ്ട് ഉടമ മരണപ്പെട്ടാല്‍, അക്കൗണ്ട് ക്ലോസ് ചെയ്ത മാസത്തിന് മുൻപുള്ള മാസാവസാനം മാത്രമേ അയാളുടെ അക്കൗണ്ടിലെ പലിശ നല്‍കൂ.
