കണിച്ചാർ: ശ്രീ സുബ്രഹ്മണ്യ സ്വാമി ക്ഷേത്ര തൈപ്പൂയ്യ ഉത്സവം ഫെബ്രുവരി ആറു മുതൽ 11 വരെ ഭക്തിസാന്ദ്രമായ ചടങ്ങുകളോടെയും വിവിധ കലാ-സംസ്കാരിക പരിപാടികളോടെയും നടക്കും. 5 ആം ദിവസം ദീപകാഴ്ചകൾ, നിശ്ചലദൃശ്യങ്ങൾ, വർണ്ണ കുടകൾ തുടങ്ങി വാദ്യമേളങ്ങളുടെ അകമ്പടിയോടു കൂടി പുറപ്പെടുന്ന താലപ്പൊലി ഘോഷയാത്രയും ഉണ്ടാവും.

കണിച്ചാർ: 40 വർഷത്തെ കോൺഗ്രസ് ഭരണത്തിന് തടയിട്ട് എൽ.ഡി.എഫ് പിടിച്ചെടുത്ത കണിച്ചാർ പഞ്ചായത്ത് ഉപതിരഞ്ഞെടുപ്പിൽ എൽ.ഡി.എഫിന് മിന്നും ജയം. പഞ്ചായത്തിന്റെ സമസ്ത മേഖലകളിലും അടിസ്ഥാന സൗകര്യങ്ങളിലൂന്നി മികവാർന്ന ഭരണം കാഴ്ച വെച്ച പഞ്ചായത്ത് പ്രസിഡന്റ് ആന്റണി സെബാസ്റ്റ്യനും ഭരണസമിതിക്കുമുള്ള അംഗീകാരം കൂടിയാണ് എൽ.ഡി.എഫ് സ്ഥാനാർഥി രതീഷ് പൊരുന്നന്റെ 199 വോട്ട് ഭൂരിപക്ഷത്തോടെയുള്ള വിജയം.

പോൾ ചെയ്ത 888 വോട്ടുകളിൽ 536 വോട്ടുകൾ എൽ.ഡി.എഫ് നേടിയപ്പോൾ യു.ഡി.എഫ് സ്ഥാനാർഥി സിന്ധു ചിറ്റേരിക്ക് 337 വോട്ടുകളാണ് ലഭിച്ചത്. എൻ.ഡി.എ സ്ഥാനാർഥി സിന്ധു പവിക്ക് 11 വോട്ടുകളേ നേടാനായുള്ളൂ. യു.ഡി.എഫ് റിബൽപി.സി.റിനീഷിന് മൂന്ന് വോട്ടുകൾ ലഭിച്ചപ്പോൾ അപര സ്ഥാനാർഥി സിന്ദുവിന് ഒരു വോട്ട് ലഭിച്ചു.

13 സീറ്റുകളിൽ ഏഴ് സീറ്റ് നേടിയാണ് എൽ.ഡി.എഫ് പഞ്ചായത്ത് ഭരണം പിടിച്ചത്.ഇതിൽ ഒരാൾ സർക്കാർ ജോലി ലഭിച്ചതിനാൽ രാജിവെച്ച ഒഴിവിലേക്കാണ് ഉപതിരഞ്ഞെടുപ്പ് നടന്നത്. കഴിഞ്ഞ തവണ ലഭിച്ചതിനേക്കാൾ 129 വോട്ടുകൾ ഇത്തവണ എൽ.ഡി.എഫ് സ്ഥാനാർഥി നേടി.

കൊളക്കാട് : കണിച്ചാർ പഞ്ചായത്ത് ഭരണം എൽ. ഡി. എഫ് നിലനിർത്തുമോ, അതല്ല യു. ഡി. എഫ് തിരിച്ചു പിടിക്കുമോ എന്നറിയാൻ ഇനി മണിക്കൂറുകൾ മാത്രം. പഞ്ചായത്തിലെ ചെങ്ങോം വാര്‍ഡില്‍ ഇന്ന് നടന്ന ഉപതിരഞ്ഞെടുപ്പില്‍ 76.4% പോളിംഗ് നടന്നുവെന്നാണ് പ്രാഥമിക കണക്കുകൾ. 1162 വോട്ടര്‍മാരില്‍ 888 പേര്‍ ഓടപ്പുഴ ഗവ. എല്‍.പി. സ്‌കൂളിലെ പോളിംഗ് ബൂത്തില്‍ വോട്ട് ചെയ്യാനെത്തി. എല്‍. ഡി. എഫിലെ രതീഷ് പൊരുന്നന്‍, യു.ഡി .എഫിലെ സിന്ധു ചിറ്റേരി, എന്‍.ഡി.എയുടെ സിന്ധു പവി എന്നിവരാണ് പ്രധാന സ്ഥാനാർഥികൾ. കോൺഗ്രസ് റിബൽ പി.സി.റിനീഷ്, അപര സ്ഥാനാർഥി സിന്ധു എന്നിവരും മത്സര രംഗത്തുണ്ട്. എല്‍.ഡി.എഫിന് ഏഴും യു. ഡി. എഫിന് ആറും അംഗങ്ങളാണ് ഉണ്ടായിരുന്നത് . സര്‍ക്കാര്‍ ജോലി ലഭിച്ചതിനെ തുടര്‍ന്ന് എല്‍.ഡി. എഫ് അംഗം വി.കെ.ശ്രീകുമാര്‍ രാജിവെച്ചതോടെയാണ് തിരഞ്ഞെടുപ്പ് വേണ്ടി വന്നത്. ഈ വാര്‍ഡിലെ വിജയം ഇരു മുന്നണിക്കും നിര്‍ണായകമാണ്. വോട്ടെണ്ണല്‍ ബുധനാഴ്ച രാവിലെ 10ന് തൊണ്ടിയിൽ സെയ്ന്റ് ജോൺസ് യു.പി.സ്‌കൂളില്‍ നടക്കും.എൽ. ഡി. എഫ് വിജയിച്ചാൽ പഞ്ചായത്ത് ഭരണം ആന്റണി സെബാസ്റ്റ്യന് നിലനിർത്താം. മറിച്ചാണെങ്കിൽ നഷ്ടപ്പെട്ട ഭരണം യു.ഡി.എഫിനൊപ്പമാവും. 11 മണിയോടെ ഫലം അറിയാനാവും.