കോളയാട് ഗ്രാമപഞ്ചായത്തില്‍ പ്രീമെട്രിക് ഹോസ്റ്റല്‍ ഒരുങ്ങുന്നു
കോളയാട്: ഗ്രാമപഞ്ചായത്ത് ചെമ്പുകാവ് കോളനിയില്‍ പെണ്‍കുട്ടികള്‍ക്കുള്ള പ്രീമെട്രിക് ഹോസ്റ്റല്‍ ഒരുങ്ങുന്നു. പട്ടികവര്‍ഗ വികസന വകുപ്പിന് കീഴില്‍ നിര്‍മ്മിക്കുന്ന ഹോസ്റ്റലിന്റെ നിര്‍മ്മാണ പ്രവൃത്തി പുരോഗമിക്കുകയാണ്. 4.2 കോടി രൂപ ചെലവിലാണ് നിര്‍മ്മാണം.
2021 ലാണ് നിര്‍മ്മാണ പ്രവൃത്തി ആരംഭിച്ചത്. താമസിക്കാനുള്ള മുറികള്‍, ബാത്‌റൂമുകള്‍, അടുക്കള, മെസ്സ് ഹാള്‍, സ്റ്റഡി ഹാള്‍ എന്നിവ ഉള്‍പ്പെട്ട മൂന്ന് നില കെട്ടിടമാണ് പണിതത്. 60 കുട്ടികള്‍ക്കുള്ള സൗകര്യമാണ് ഒരുക്കുക. കേരള ഇലക്ട്രിക്കല്‍ ആന്‍ഡ് അലീഡ് എഞ്ചിനീയറിംഗ് കമ്പനി (കെ ഇ എല്‍) ക്കാണ് നിര്‍മ്മാണ പ്രവൃത്തി നല്‍കിയത്.
പട്ടികവര്‍ഗ വികസന വകുപ്പിന് കീഴില്‍ കോളയാട് ഗ്രാമപഞ്ചായത്തില്‍ നിലവില്‍ പെണ്‍കുട്ടികളുടെ ഒരു പ്രീമെട്രിക് ഹോസ്റ്റല്‍ പ്രവര്‍ത്തിക്കുന്നുണ്ട്. ഇത് കൂടാതെ മയ്യില്‍, വെളിമാനം, ഇരിട്ടി, വയത്തൂര്‍, ആറളം, നടുവില്‍ എന്നിവിടങ്ങളിലും പ്രീമെട്രിക് ഹോസ്റ്റലുണ്ട്.
നടുവിലില്‍ ആണ്‍കുട്ടികള്‍ക്കുള്ള ഹോസ്റ്റലാണ്. പ്രവര്‍ത്തനം ആരംഭിക്കുന്നതോടെ വകുപ്പിന് കീഴിലെ ജില്ലയിലെ എട്ടാമത്തെ പ്രീമെട്രിക് ഹോസ്റ്റലാകും ചെമ്പുകാവിലേത്.
