അമ്മയുടെ അനുവാദത്തോടെ 13കാരിയെ പീഡിപ്പിച്ചെന്ന കേസ്; യുവാവും പെൺസുഹൃത്തുമടക്കം മൂന്നുപേർ അറസ്റ്റിൽ
കാട്ടാക്കട: പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച കേസിൽ കുട്ടിയുടെ അമ്മയുൾപ്പെടെ മൂന്നുപേരെ കാട്ടാക്കട പോലീസ് അറസ്റ്റുചെയ്തു. നെയ്യാർഡാം ഇടവാച്ചൽ കുഞ്ചു നിവാസിൽ അഖിൽ ദേവ് (25), ഇയാളുടെ പെൺ സുഹൃത്ത് മൂങ്ങോട് വിനീഷാ ഭവനിൽ വിനീഷ(24) എന്നിവരും കുട്ടിയുടെ അമ്മയുമാണ് അറസ്റ്റിലായത്.
എറണാകുളത്ത് ഹോസ്റ്റലിൽ താമസിക്കുന്ന തമിഴ്‍നാട് സ്വദേശിയായ യുവതിയുടെ 13 കാരിയായ മകളെ അമ്മയുടെ അനുവാദത്തോടെ വിവിധയിടങ്ങളിൽ കൊണ്ടുപോയി പീഡിപ്പിച്ചതായാണ് കേസ്. എറണാകുളത്ത് ട്രെയിനിൽ വച്ചാണ് അഖിൽദേവ് കുട്ടിയുടെ അമ്മയെ പരിചയപ്പെടുന്നത്.
തുടർന്ന് പെൺകുട്ടിയെ എറണാകുളത്തെ ലോഡ്ജിൽ കൊണ്ടുപോയി പീഡിപ്പിച്ചു. പിന്നീട് അമ്മയ്ക്ക് പണം നൽകി കാട്ടാക്കടയെത്തിച്ച് ലോഡ്ജിൽ പാർപ്പിച്ച് കുട്ടിയെ പീഡിപ്പിച്ചു.
ഇവിടെ നിന്നു കുട്ടിയെ പെൺ സുഹൃത്തായ വിനീഷയുടെ വീട്ടിലെത്തിച്ചു. ഇവിടെ കഴിയവേ വിനീഷയുടെ അമ്മയ്ക്ക് സംശയംതോന്നി പോലീസിൽ വിവരം അറിയിച്ചതോടെയാണ് സംഭവം പുറത്തറിഞ്ഞത്. പ്രതികളെ കാട്ടാക്കട കോടതിയിൽ ഹാജരാക്കി റിമാൻഡ് ചെയ്തു.
