കണ്ണൂർ: അകന്നു കഴിയുന്ന ഭാര്യയെ ഓട്ടോയിടിച്ചിട്ട ശേഷം പെട്രോൾ ഒഴിച്ച് കൊല്ലാൻ ശ്രമിച്ച സംഭവത്തിൽ ഭർത്താവ് പിടിയിൽ. മാവിലായി കുന്നുമ്പ്രത്തെ വി.എൻ സുനിൽ കുമാറിനെ (51)യാണ് കണ്ണൂർ ടൗൺ പോലീസ് അറസ്റ്റു ചെയ്തത്. ഇന്നലെ വൈകുന്നേരം 6.10 മണിക്ക് ജോലി കഴിഞ്ഞ് വീട്ടിലേക്ക് പോകവെ ഭാര്യ എളയാവൂർ സൗത്തിലെ പി വി പ്രിയയെ (43)യാണ് എളയാവൂർ പയക്കോട്ടത്തിനടുത്ത് വെച്ച് പ്രതി കൊല്ലാൻ ശ്രമിച്ചത്. ഓട്ടോറിക്ഷ കൊണ്ടിടിച്ച് നിലത്തു വീണ യുവതിയെ പ്രതി കയ്യിൽ കരുതിയ പെട്രോൾ ഒഴിച്ച് ലൈറ്റർ എടുത്ത് തീവെക്കാൻ ശ്രമിക്കുകയായിരുന്നു. ലൈറ്റർ തട്ടി മാറ്റി യുവതി ഓടിരക്ഷപ്പെടുകയായിരുന്നു. തുടർന്ന് ടൗൺ പോലീസിൽ പരാതി നൽകി. കേസെടുത്ത പോലീസ് പ്രതിയെ പിടികൂടുകയായിരുന്നു. ടൗൺ എസ്ഐ ദീപ്തിയുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.

തളിപ്പറമ്പ്‌: പരിയാരവും പെരിങ്ങോം–വയക്കരയും സമ്പൂർണ വായനശാലാ പഞ്ചായത്തുകളായി. പരിയാരത്ത് വി ശിവദാസൻ എംപിയും പെരിങ്ങോം–വയക്കരയിൽ ജസ്റ്റിസ് കെ ചന്ദ്രുവും പ്രഖ്യാപനം നടത്തി. പരിയാരത്ത് കലക്ടർ അരുൺ കെ വിജയൻ, ജസ്‌റ്റിസ്‌ കെ ചന്ദ്രു, പീപ്പിൾസ്‌ മിഷൻ ഫോർ സോഷ്യൽ ഡവലപ്‌മെന്റ്‌ കൺവീനർ ടി കെ ഗോവിന്ദൻ, ബ്ലോക്ക്‌ പഞ്ചായത്ത്‌ പ്രസിഡന്റ്‌ സി എം കൃഷ്‌ണൻ, ലൈബ്രറി കൗൺസിൽ ജില്ലാ പ്രസിഡന്റ്‌ മുകുന്ദൻ മഠത്തിൽ, സംസ്ഥാന എക്‌സിക്യൂട്ടീവ്‌ അംഗം എം കെ രമേശ്‌കുമാർ, വി സി അരവിന്ദാക്ഷൻ എന്നിവർ മുഖ്യാതിഥികളായി. പഞ്ചായത്ത്‌ പ്രസിഡന്റ്‌ ടി ഷീബ അധ്യക്ഷയായി. വൈസ്‌ പ്രസിഡന്റ്‌ പി ബാബുരാജൻ, സ്ഥിരംസമിതി അധ്യക്ഷരായ ആർ ഗോപാലൻ, ടി പി രജനി, ബ്ലോക്ക്‌ പഞ്ചായത്ത്‌ അംഗം ഇ സി മല്ലിക, പി ജനാർദനൻ, പി വി സജീവൻ, എ വി രതീഷ്‌, അഷ്‌റഫ്‌ കൊട്ടോല, പി.വി പ്രസീത, കെ വി മധു എന്നിവർ സംസാരിച്ചു. അങ്കണവാടി വർക്കർക്കുള്ള സംസ്ഥാന പുരസ്‌കാരം നേടിയ പുഷ്‌പവല്ലിയെ ചടങ്ങിൽ ആദരിച്ചു. സംഘാടകസമിതി ചെയർമാൻ ടി.വി ജയകൃഷ്‌ണൻ സ്വാഗതവും കെ വി മിനി നന്ദിയും പറഞ്ഞു. പെരിങ്ങോം-–വയക്കര പഞ്ചായത്ത് സമ്പൂർണ ലൈബ്രറി പ്രഖ്യാപനം ജസ്റ്റിസ് കെ ചന്ദ്രു നിർവഹിച്ചു. പ്രസിഡന്റ് വി എം ഉണ്ണിക്കൃഷ്ണൻ അധ്യക്ഷനായി. ഡോ. വി. ശിവദാസൻ എംപി, ഫോക്‌ലോർ അക്കാദമി സെക്രട്ടറി എ.വി അജയകുമാർ, വൈസ് പ്രസിഡന്റ് ബിന്ദു രാജൻകുട്ടി, സുഭാഷ് അറുകര എന്നിവർ സംസാരിച്ചു.

കണ്ണൂർ: കണ്ണപുരത്ത് ബി.ജെ.പി റോഡരികിൽ സ്ഥാപിച്ച കൊടിമരം വീണ്ടും കണ്ണപുരം പൊലിസ് നീക്കം ചെയ്തു. ബുധനാഴ്ച രാവിലെ ഒൻപതു മണിയോടെയാണ് കൊടിമരം നീക്കിയത്. മറ്റ് രാഷ്ട്രീയ പാർട്ടികളുടെ കൊടിതോരണങ്ങളും അഴിച്ച് മാറ്റി ബി ജെ പി സ്ഥാപക ദിനത്തിൽ കണ്ണപുരം ചൈനാക്ലേ റോഡിന് സമീപം ബി. ജെ. പി സ്ഥാപിച്ച കൊടിയും കൊടിമരവും കണ്ണപുരം പോലീസ് അഴിച്ച് മാറ്റിയത് ഏറെ വിവാദങ്ങൾക്ക് വഴിവെച്ചിരുന്നു. ഇതേ തുടർന്ന് കണ്ണപുരം പോലീസ് സ്റ്റേഷനിലേക് ബി.ജെ.പിമാർച്ച് നടത്തുകയും ചെയ്‌തിരുന്നു. വീണ്ടും ചൈനാക്ലേ റോഡിൽ കൊടി പുനസ്ഥാപിക്കുകയും ചെയ്തിരുന്നു.