സംശയാസ്പദമായരീതിയില്‍ രണ്ട് കാറുകള്‍, കണ്ടെടുത്തത് എം.ഡി.എം.എ; നാലുപേര്‍ പിടിയില്‍
കാലടി(എറണാകുളം): രാസലഹരിയുമായി യുവതി ഉള്‍പ്പെടെ നാലുപേരെ കാലടി പോലീസ് അറസ്റ്റ് ചെയ്തു. നെടുവന്നൂര്‍ പെരുമ്പാട്ട് വീട്ടില്‍ മുഹമ്മദ് ഷിഹാബുദ്ദീന്‍ (28), കോട്ടായി അന്‍ഡേത്ത് വീട്ടില്‍ അഖില്‍ (24), എന്‍.എ.ഡി. നൊച്ചിമ ചേനക്കര വീട്ടില്‍ ഫൈസല്‍ (35), ചൊവ്വര പട്ടൂര്‍കുന്ന് തച്ചപ്പിള്ളി വീട്ടില്‍ അനഘ (18) എന്നിവരാണ് അറസ്റ്റിലായത്.
വെള്ളിയാഴ്ച ഉച്ചകഴിഞ്ഞ് പോലീസ് പട്രോളിങ്ങിനിടെ ശ്രീമൂലനഗരം കല്ലുംകൂട്ടം ഭാഗത്ത് സംശയാസ്പദമായ രീതിയില്‍ രണ്ട് കാറുകള്‍ നിര്‍ത്തിയിട്ടത് പരിശോധിച്ചപ്പോഴാണ് മയക്കുമരുന്ന് കണ്ടെത്തിയത്. കാറിന്റെ ഡാഷ്‌ബോര്‍ഡില്‍ നിന്നും 8.10 ഗ്രാം എം.ഡി.എം.എ കണ്ടെടുത്തു.
ഇന്‍സ്‌പെക്ടര്‍ എന്‍.എ. അനൂപ്, എസ്.ഐ. മാരായ ഹരീഷ്, ജെ. റോജോമോന്‍, എസ്.സി.പി.ഒ.മാരായ ജയന്തി, ഷൈജു, സി.പി.ഒ.മാരായ രെജിത്ത്, ഷിജോ പോള്‍, ധനേഷ് എന്നിവരാണ് സംഘത്തില്‍ ഉണ്ടായിരുന്നത്.
