ഉസിലംപെട്ടി, ആണ്ടിപ്പട്ടി, തേനി; ബോഡിനായ്ക്കന്നൂരില്‍ നിന്ന് ആദ്യ തീവണ്ടി ഇന്ന് പുറപ്പെടും
കേരള അതിര്‍ത്തിയായ ബോഡിനായ്ക്കന്നൂര്‍ റെയില്‍വേ സ്റ്റേഷനില്‍നിന്ന് ആദ്യ ട്രെയിന്‍ വ്യാഴാഴ്ച രാത്രി 8.30-ന് യാത്ര തിരിക്കും. ട്രെയിന്‍ നമ്പര്‍ 20602 മധുര-എം.ജി.ആര്‍. ചെന്നൈ സെന്‍ട്രല്‍ എക്‌സ്പ്രസാണ് ബോഡിനായ്ക്കന്നൂരില്‍ നിന്ന് പുറപ്പെടുന്നത്. കേന്ദ്രമന്ത്രി ഡോ. എല്‍.മുരുകന്‍ ഫ്‌ലാഗ് ഓഫ് ചെയ്യും.
ബ്രോഡ്‌ഗേജ് ആക്കിയതോടെയാണ് ഇവിടെ റെയില്‍വേ സ്റ്റേഷന്‍ അനുവദിച്ചത്. ഇതോടെ, ഇത് ഇടുക്കിയില്‍ നിന്ന് ഏറ്റവും അടുത്തുള്ള റെയില്‍വേ സ്റ്റേഷനായി. ട്രെയിന്‍ നമ്പര്‍ 06702 തേനി-മധുര അണ്‍റിസേര്‍വ്ഡ് സ്‌പെഷ്യല്‍ ട്രെയിന്‍ രാത്രി 8.45-ന് പുറപ്പെടുമെന്നും ദക്ഷിണ റെയില്‍വേ വൃത്തങ്ങള്‍ അറിയിച്ചു.
ഇടുക്കി ജില്ലയിലെ പൂപ്പാറയില്‍ നിന്ന് 35 കിലോമീറ്റര്‍ സഞ്ചരിച്ചാല്‍ ബോഡിനായ്ക്കനൂര്‍ റെയില്‍വേ സ്റ്റേഷനിലെത്താം. മറയൂരില്‍ നിന്ന് 47 കിലോമീറ്റര്‍ സഞ്ചരിച്ചാല്‍ ഉദുമലൈപ്പേട്ട റെയില്‍വേ സ്റ്റേഷനിലെത്താം. ഇടുക്കിയുടെ രണ്ടു ഭാഗത്തും തമിഴ്‌നാട് അതിര്‍ത്തികളില്‍ റെയില്‍പാതകള്‍ യാഥാര്‍ഥ്യമായി ഇടുക്കി ജില്ലക്കാര്‍ക്കും വിനോദസഞ്ചാരികള്‍ക്കും ശബരിമല തീര്‍ഥാടകര്‍ക്കും പുതിയ സര്‍വീസുകള്‍ ഉപകാരപ്രദമാകും.
ബോഡിമെട്ടുതൊട്ട് തേനിവരെയുള്ള 15 കിലോമീറ്റര്‍ ഇപ്പോള്‍ ബ്രോഡ്‌ഗേജാണ്. ബോഡിമെട്ടില്‍ നിന്ന് ചെന്നൈക്ക് പോകാം.
ട്രെയിന്‍ സമയം ഇങ്ങനെ
തിങ്കള്‍, ബുധന്‍, വെള്ളി ദിവസങ്ങളില്‍ ചെന്നൈയില്‍ നിന്ന് ബോഡിനായ്ക്കന്നൂരിലേക്കും ചൊവ്വ, വ്യാഴം, ഞായര്‍ ദിവസങ്ങളില്‍ ബോഡിനായ്ക്കനൂരില്‍നിന്ന് ചെന്നൈയിലേക്കും സര്‍വീസ് നടത്തും. ഉസിലംപെട്ടി, ആണ്ടിപ്പട്ടി, തേനി ഇന്നിവിടങ്ങളില്‍ സ്റ്റോപ്പുണ്ട്. എല്ലാ ദിവസവും മധുര-ബോഡി റൂട്ടില്‍ അണ്‍റിസേര്‍വഡ് എക്‌സ്പ്രസ് ട്രെയിന്‍ സര്‍വീസ് നടത്തും. മധുരയില്‍ നിന്ന് രാവിലെ 8.20-ന് ആരംഭിക്കുന്ന ട്രെയിന്‍ 9.42-ന് തേനിയിലും 10.30-ന് ബോഡിയിലും എത്തും. തിരികെ വൈകീട്ട് 5.50-ന് ബോഡിയില്‍നിന്ന് പുറപ്പെടുന്ന ട്രെയിന്‍ രാത്രി 7.50-ന് മധുരയിലെത്തും.
