സംസ്ഥാനത്ത് പലഭാ​ഗങ്ങളിലും ഡെങ്കിപ്പനിയും എലിപ്പനിയും വ്യാപിക്കുന്നുണ്ട്. വേനൽമഴയോടെയാണ് പലയിടങ്ങളിലും വ്യാപനം തുടങ്ങിയത്.

രോ​ഗലക്ഷണങ്ങൾ പ്രകടമാകുമ്പോൾ തന്നെ മതിയായ ചികിത്സ തേടേണ്ടത് അനിവാര്യമാണ്. കൊതുകുകൾ പെരുകുന്നത് തടയാനായി വീടും പരിസരവും വൃത്തിയായി സൂക്ഷിക്കാനും ശ്രദ്ധിക്കേണ്ടതുണ്ട്.

ഡെങ്കിപ്പനിയുടെ പ്രധാന കാരണക്കാരൻ കൊതുകുതന്നെയാണ്. ഈഡിസ് ഈജിപ്തി, ഈഡിസ് അൽബോപിക്ടസ് എന്നീ രണ്ടുതരം പെൺ കൊതുകുകളാണ് ഡെങ്കി വൈറസ് പരത്തുന്നത്. ആദ്യ ഇനം കൂടുതലും വീട്ടിനകത്തും രണ്ടാമത്തേത് പുറത്തുമാണ് കൂടുതലും കാണുന്നത്.

വീണ്ടുംവന്നാൽ അപകടം…

ഒരുതവണ രോഗം വന്നവർക്ക് എല്ലാക്കാലത്തേക്കും പ്രതിരോധശേഷിയുണ്ടാവുമെന്ന് തെറ്റിദ്ധരിക്കരുത്. മൂന്നുവർഷം കഴിഞ്ഞാൽ ഈ പ്രതിരോധശേഷി കുറയും. അഞ്ചുതരം വൈറസുകൾ ഡെങ്കിപരത്തുന്നുണ്ട്. ഇതിൽ രണ്ടാമത്തെ തവണ പകരുന്നത് മറ്റൊരു വൈറസാണെങ്കിൽ അത് കൂടുതൽ അപകടകരമാവാനും മരണം സംഭവിക്കാനും ഇടയുണ്ടെന്ന് മലപ്പുറം ഡെപ്യൂട്ടി ഡി.എം.ഒ.യും ജില്ലാ സർവെയലൻസ് ഓഫീസറുമായ ഡോ. സി. സുബിൻ പറയുന്നു.എലിമാത്രമല്ല എലിപ്പനി പരത്തുന്നത്

എലിപ്പനി എലിമാത്രം പരത്തുന്ന രോഗമാണെന്ന് കരുതരുത്. എലിയിൽനിന്ന് വീട്ടിൽ വളർത്തുന്ന അരുമ മൃഗങ്ങൾക്കും ഈ രോഗം വരാം. അതുവഴി വ്യാപിക്കാനും സാധ്യതയുണ്ടെന്ന് മണ്ണുത്തി വെറ്ററിനറി സർവകലാശാല നടത്തിയ പഠനത്തിൽ പറയുന്നു.

അവർക്കുള്ള ഭക്ഷണത്തിൽ എലി മൂത്രമൊഴിക്കാനുള്ള സാധ്യതയുണ്ട്. എലി വരാനുള്ള സാഹചര്യം ഇല്ലാതാക്കുകയാണ് പോംവഴി. വെള്ളം കെട്ടിനിൽക്കുന്ന സ്ഥലങ്ങളിൽ പെരുമാറുന്ന ആർക്കും രോഗംപകരാം. മുൻപ് വൈറസ് ബാധിച്ച് ഒരാഴ്ച കഴിഞ്ഞാണ് രോഗലക്ഷണങ്ങൾ കാണുന്നതെങ്കിൽ ഇപ്പോൾ മൂന്നുദിവസത്തിനുള്ളിൽ രോഗം മൂർച്ഛിക്കുന്ന അവസ്ഥയുണ്ടെന്ന് ഡി.എം.ഒ. ഡോ.കെ. രേണുക പറയുന്നു.

ഫ്രിഡ്ജ് ഒന്നു നോക്കണേ…

വീട്ടിലെ ഫ്രിഡ്ജ് ആഴ്ചയിലൊരു തവണയെങ്കിലും പരിശോധിക്കണം. വെള്ളം ശേഖരിക്കുന്ന ട്രേയിൽ ഇവ മുട്ടയിടും. ഒരാഴ്ചയാണ് വിരിഞ്ഞുവരാനുള്ള സമയം. അതിനുള്ളിൽ നശിപ്പിക്കാൻ കഴിയണം.

വീടിനുള്ളിൽ വളർത്തുന്ന ചെടികൾക്കിടയിൽ വെള്ളംകെട്ടിനിൽക്കാം. സാധാരണ പകൽമാത്രമാണ് ഈ കൊതുകുകൾ കടിക്കുന്നതെങ്കിലും രാത്രി പകൽവെളിച്ചത്തിന് സമാനമായ അന്തരീക്ഷമുണ്ടെങ്കിലും ഇവ കടിക്കാം.

എന്താണ് ഡെങ്കിപ്പനി ?

ശുദ്ധജലത്തിൽ വളരുന്ന ഈഡിസ് കൊതുകുകളാണ് ഡെങ്കിപ്പനി പകർത്തുന്നത്. ഈഡിസ് കൊതുകുകൾ സാധാരണ പകലാണ് മനുഷ്യരെ കടിക്കുന്നത്. വൈറസ് ശരീരത്തിൽ പ്രവേശിച്ച് മൂന്നുമുതൽ 14 ദിവസങ്ങൾക്കുള്ളിൽ രോഗലക്ഷണങ്ങൾ കണ്ടുതുടങ്ങും.

രോഗലക്ഷണങ്ങൾ

പെട്ടെന്നുണ്ടാകുന്ന തീവ്രമായ പനി, കടുത്ത തലവേദന, കണ്ണുകൾക്ക് പിന്നിലും പേശികളിലും സന്ധികളിലും വേദന, നെഞ്ചിലും മുഖത്തും ചുവന്ന തടിപ്പുകൾ, ഓക്കാനവും ഛർദിയും എന്നിവയാണ് തുടക്കത്തിൽ കാണുന്ന ലക്ഷണങ്ങൾ.

അപകടസൂചനകൾ

പനി കുറയുമ്പോൾ തുടർച്ചയായ ഛർദി, വയറുവേദന, ഏതെങ്കിലും ശരീരഭാഗത്തുനിന്ന് രക്തസ്രാവം, കറുത്ത മലം, പെട്ടെന്നുണ്ടാകുന്ന ശ്വാസംമുട്ട്, ശരീരം ചുവന്നുതടിക്കൽ, ശരീരം തണുത്ത് മരവിക്കുന്ന അവസ്ഥ, വലി തോതിലുള്ള തളർച്ച, ശ്വസിക്കാൻ പ്രയാസം, രക്തസമ്മർദം വല്ലാതെ താഴുന്ന അവസ്ഥ, കുട്ടികളിൽ തുടർച്ചയായ കരച്ചിൽ എന്നീ

സൂചനകൾ ഉണ്ടാകുന്നുവെങ്കിൽ എത്രയുംവേഗം രോഗിയെ വിദഗ്ധ ചികിത്സ കിട്ടുന്ന ആശുപത്രിയിൽ എത്തിക്കണം.

ചികിത്സ പ്രധാനം

എത്രയുംവേഗം ചികിത്സിക്കുകയാണ് പ്രധാനം. രോഗബാധിതർ പൂർണ വിശ്രമം എടുക്കണം. പനി മാറിയാലും മൂന്നു നാലു ദിവസംകൂടി ശ്രദ്ധിക്കണം. ഉപ്പിട്ട കഞ്ഞിവെള്ളം, കരിക്കിൻവെള്ളം, പഴച്ചാറുകൾ, മറ്റു പാനീയങ്ങൾ എന്നിവ ധാരാളം കുടിക്കണം. പനി ബാധിച്ചവർ വിശ്രമിക്കുന്നതും, ഉറങ്ങുന്നതും കൊതുകുവലയ്ക്കുള്ളിൽ ആയിരിക്കണം.

തുരത്താം, കൊതുകിനെ

.കൊതുക് വളരാതിരിക്കാൻ വെള്ളം കെട്ടിനിൽക്കുന്നത് ഒഴിവാക്കാം.
.ഉപയോഗശൂന്യമായ ചിരട്ട, വലിച്ചെറിഞ്ഞ പ്ലാസ്റ്റിക് പാത്രങ്ങൾ, ദ്രവിക്കാത്ത മാലിന്യം, ഉപയോഗമില്ലാത്ത ടയറുകൾ, ബക്കറ്റുകൾ മുതലായ പറമ്പിൽ അലക്ഷ്യമായിക്കിടക്കുന്ന വസ്തുക്കൾ ആഴ്ചയിലൊരിക്കൽ നീക്കംചെയ്ത് സുരക്ഷിതമായി സംസ്കരിക്കുക.
.ജലസംഭരണികൾ കൊതുക് കടക്കാത്തരീതിയിൽ വലയോ, തുണിയോ ഉപയോഗിച്ച് പൂർണമായി മൂടിവെക്കുക.
.കൊതുകുകടി ഏൽക്കാതിരിക്കാൻ കൊതുകിനെ അകറ്റുന്ന ലേപനങ്ങൾ ഉപയോഗിക്കുക.
.ശരീരം മൂടുന്നവിധത്തിലുള്ള വസ്ത്രങ്ങൾ ധരിക്കുക.
.ആഴ്ചയിലൊരിക്കൽ കൊതുകിന്റെ ഉറവിടം നശിപ്പിച്ച് ഡ്രൈഡേ ആചരിക്കുക.