പേരാവൂർ : ബിജെപി പേരാവൂർ മണ്ഡലം പ്രസിഡന്റായി ബേബി സോജ ചുമതലയേറ്റു. സ്ഥാനാരോഹണ ചടങ്ങ് ജില്ല ജനറൽ സെക്രട്ടറി എം.ആർ. സുരേഷ് ഉദ്ഘാടനം ചെയ്തു. മുൻ മണ്ഡലം പ്രസിഡന്റ് പി. ജി. സുരേഷ് അധ്യക്ഷനായി. സംസ്ഥാന സമിതി അംഗം വി . വി.ചന്ദ്രൻ, സംസ്ഥാന കൗൺസിൽ അംഗം കൂട്ട ജയപ്രകാശ്, മണ്ഡലം ജനറൽ സെക്രട്ടറി ആദർശ് മുരിങ്ങോടി, യുവ മോർച്ച ജില്ലാ അധ്യക്ഷൻ അരുൺ ഭരത്, കർഷക മോർച്ച ജില്ലാ അധ്യക്ഷൻ ശ്രീകുമാർ കൂട്ടത്തിൽ ,ബി. വി. വി. എസ് കേളകം യൂണിറ്റ് വൈസ് പ്രസിഡൻറ് ഷാജി പാമ്പാടി, അജിത്ത്, സി.രാമചന്ദ്രൻ എന്നിവർ സംസാരിച്ചു.

പേരാവൂർ : മാലിന്യമുക്തം നവകേരളം ജനകീയ ക്യാമ്പയിന്റെ ഭാഗമായി പേരാവൂർ ബ്ലോക്ക് പരിധിയിലെ ഏഴ് ഗ്രാമ പഞ്ചായത്തുകളിലെ മുഴുവൻ കുടുബശ്രീ അയൽകൂട്ടങ്ങളും ഹരിതമായി പ്രഖ്യാപിച്ചു. സംസ്ഥാനത്ത് ആദ്യമായാണ് ഒരു ബ്ലോക്ക് പഞ്ചായത്തിലെ മുഴുവൻ അയൽക്കൂട്ടങ്ങളെയും ഹരിതമായി പ്രഖ്യാപിക്കുന്നത്.

മാലൂർ – 240, മുഴക്കുന്ന് – 215, കണിച്ചാർ – 144, കേളകം – 183, കോളയാട് – 199, പേരാവൂർ – 205, കൊട്ടിയൂർ – 199 എന്നിങ്ങനെ 1382 അയൽക്കൂട്ടങ്ങളാണ് ബ്ലോക്ക്‌ തലത്തിൽ ഹരിതമായി പ്രഖ്യാപനം നടത്തിയത്.

അയൽക്കൂട്ട അംഗങ്ങളുടെ വീടുകളിൽ സുരക്ഷിത ജൈവമാലിന്യ സംസ്കരണ സംവിധാനങ്ങൾ ഒരുക്കിയും അജൈവ മാലിന്യങ്ങൾ തരം തിരിച്ചു യൂസർ ഫീ നൽകി ഹരിതകർമസേനക്ക് കൈമാറിയും ഒറ്റതവണ ഉപയോഗ പ്ലാസ്റ്റിക്കിന്റെ അളവ് കുറച്ചും മലിനജലം തുറസായി ഒഴുക്കാതെ സംസ്‌കരിച്ചും അയൽക്കൂട്ടം അംഗങ്ങളുടെ വീടുകളിലും മറ്റും നടക്കുന്ന ചടങ്ങുകൾ ഹരിതചട്ടം പാലിച്ചുമാണ് “ഹരിത അയൽക്കൂട്ടങ്ങൾ” ആയി മാറിയത്.

നേരത്തെ പേരാവൂർ ബ്ലോക്കിൽ ഹരിതവിദ്യാലയങ്ങളും ഹരിതകലാലയങ്ങളും ഇതേ രീതിയിൽ പ്രഖ്യാപിച്ചിരുന്നു.

ജില്ലാ കളക്ടർ അരുൺ.കെ. വിജയൻ ഉദ്ഘാടനം ചെയ്തു. ഏഴ് ഗ്രാമ പഞ്ചായത്ത് സി.ഡി.എസുകൾക്കുമുള്ള ഉപഹാരവും മുഴുവൻ അയൽക്കൂട്ടങ്ങൾക്കുള്ള സർട്ടിഫിക്കറ്റ് വിതരണവും കളക്ടർ നിർവഹിച്ചു. ബ്ലോക്ക്‌ പഞ്ചായത്ത് പ്രസിഡന്റ് കെ. സുധാകരൻ അധ്യക്ഷനായി. ഹരിതകേരളം മിഷൻ ജില്ലാ റിസോഴ്സ് പേഴ്സൺ നിഷാദ് മണത്തണ പദ്ധതി വിശദീകരിച്ചു. പഞ്ചായത്ത് പ്രസിഡന്റുമാരായ സി.ടി. അനീഷ്, പി. പി. വേണുഗോപാലൻ, ടി.ബിന്ദു, ജില്ലാ പഞ്ചായത്ത് അംഗം വി. ഗീത, എ.ടി.കെ.മുഹമ്മദ്‌, പ്രേമി പ്രേമൻ ബ്ലോക്ക് പഞ്ചായത്ത് സെക്രട്ടറി ആർ. സജീവൻ, ശുചിത്വ ഓഫീസർ സങ്കേത്. കെ. തടത്തിൽ എന്നിവർ സംസാരിച്ചു.

പേരാവൂർ : സംസ്ഥാന സർക്കാരിന്റെ ഗ്രാമീണ റോഡ് പദ്ധതിയിൽ ഉൾപ്പെടുത്തി അഡ്വ: സണ്ണി ജോസഫ് എം.എൽ.എ നിർദ്ദേശിച്ച പ്രകാരം പേരാവൂർ മണ്ഡലത്തിൽ അനുവദിച്ചത് നാല് കോടി 35 ലക്ഷം രൂപ. മൂന്നു പദ്ധതികൾ വീതം ഓരോ പഞ്ചായത്തിലും സമർപ്പിച്ചെങ്കിലും അതിൽ ഓരോ പഞ്ചായത്തിലും ഓരോ പദ്ധതിക്കാണ് അംഗീകാരം കിട്ടിയതെന്നും അഡ്വ. സണ്ണി ജോസഫ് എം എൽ എ വ്യക്തമാക്കി.

റോഡ് പദ്ധതികൾ ഇവയാണ്.

1-പെരുമ്പുന്ന അർച്ചന ആശുപത്രി- പെരുമ്പുന്ന റോഡ്- 25 ലക്ഷം രൂപ.

2- വിളക്കോട് – പാറക്കണ്ടം – കായിപ്പനച്ചി റോഡ്- 40 ലക്ഷം രൂപ.

3- പൂളക്കുറ്റി – ഇരുപത്തി എട്ടാം മൈൽ റോഡ് -25 ലക്ഷം രൂപ

4-ചുങ്കക്കുന്ന് – പൊട്ടൻതോട് – കുറിച്ച്യനഗർ റോഡ് – 45 ലക്ഷം രൂപ. 5-ഐ.ടി.സി – മാടത്തിൻകാവ് – വെള്ളൂന്നി -റോഡ്- 35 ലക്ഷം രൂപ.

എന്നിങ്ങനെയാണ് റോഡുകൾക്കായി സംസ്ഥാന സർക്കാർ തുക അനുവദിച്ചിട്ടുള്ളതെന്ന് എം.എൽ.എ അറിയിച്ചു.