IRITTY

മലയോരത്തെ നഗരങ്ങളിൽ കാട്ടുപന്നിശല്യം രൂക്ഷം

Published

2 years ago

May 24, 2023

Share our post

ശ്രീകണ്ഠപുരം : വനമേഖലയോട് ചേർന്നുള്ള പ്രദേശങ്ങളിൽ മാത്രമുണ്ടായിരുന്ന കാട്ടുപന്നിശല്യം മലയോരത്തെ നഗരങ്ങളിലും എത്തി. കഴിഞ്ഞദിവസം ശ്രീകണ്ഠപുരം നഗരസഭയിലെ പന്ന്യാലിൽ പട്ടാപ്പകൽ വീട്ടമ്മയെ കാട്ടുപന്നി കുത്തിപ്പരിക്കേൽപ്പിച്ചു.

വാഴക്കാട്ട് ലില്ലിക്കുട്ടി(47) യെയാണ് ആക്രമിച്ചത്. വീടിന് സമീപത്ത് ആടിനെ തീറ്റാൻ പോയപ്പോഴാണ് പന്നിയുടെ കുത്തേറ്റത്. ശ്രീകണ്ഠപുരം നഗരസഭയിലെ കണിയാർവയൽ, കോട്ടൂർ തുടങ്ങിയ സ്ഥലങ്ങളിലും കാട്ടുപന്നിശല്യം രൂക്ഷമാണ്.

കർഷകരുടെ ജീവനും സ്വത്തിനും ഭീഷണിയാകുന്ന കാട്ടുപന്നികളെ വെടിവെച്ചുകൊല്ലാനുള്ള നടപടി സ്വീകരിക്കുമെന്നാണ് നഗരസഭാധികൃതർ പറയുന്നത്. ശ്രീകണ്ഠപുരം നഗരസഭ കൂടാതെ ചെങ്ങളായി, മലപ്പട്ടം, പയ്യാവുർ പഞ്ചായത്തുകളിലും പന്നിശല്യം രൂക്ഷമാണ്. നെൽക്കൃഷിയും വയലുകളിലെ പച്ചക്കറിക്കൃഷികളായ വെളളരി, പയർ, ചീര ഉൾപ്പെടെയുമാണ് ഇവ നശിപ്പിക്കുന്നത്.

വീട്ടുപറമ്പുകളിലെത്തി വാഴ, ചേമ്പ്, ചേന എന്നിവയും നശിപ്പിക്കുന്നുണ്ട്. രാപകൽ ഭേദമില്ലാതെ കൃഷിയിടങ്ങളിലെത്തുന്ന പന്നികൾ തോട്ടങ്ങൾ കുത്തിയിളക്കിയിടുകയാണ്. നഗരത്തോടു ചേർന്നുള്ള ചെറിയ കാടുകയറിയ സ്ഥലങ്ങളിൽപോലും പന്നികൾ താവളമൊരുക്കിയതായി നാട്ടുകാർ പറയുന്നു. നേരം ഇരുട്ടിയാൽ ഇവ കൃഷിയിടങ്ങളിലേക്ക് ഇറങ്ങുകയാണ്. രാത്രി കൂട്ടത്തോടെ ഇറങ്ങുന്ന പന്നികൾ പറമ്പാകെ കുത്തിയിളക്കി കൃഷി നശിപ്പിച്ചാണ് മടങ്ങുക. ഒറ്റ രാത്രി കൊണ്ട് കർഷകരുടെ മാസങ്ങളായുള്ള അധ്വാനം തന്നെ ഇല്ലാതാകുകയാണ്.

ഉത്തരവുണ്ട്, വെടിവെച്ചിട്ടില്ല : കൃഷി നശിപ്പിക്കുന്ന കാട്ടുപന്നികളെ വെടിവെക്കാൻ ചെങ്ങളായി ഗ്രാമപ്പഞ്ചായത്ത് ഉത്തരവിറക്കിയിട്ട് മൂന്നുമാസം കഴിഞ്ഞിട്ടും ഒരുപന്നിയെപ്പോലും വെടിവെച്ചില്ല. കാട്ടുപന്നികളെ നിയമാനുസൃതമായി ഇല്ലായ്മ ചെയ്യുന്നതിനുള്ള അനുമതിയും അധികാരവും ഓണററി വൈൽഡ് ലൈഫ് വാർഡൻ എന്ന നിലയിൽ പഞ്ചായത്ത് പ്രസിഡന്റിനും ഉദ്യോഗസ്ഥൻ എന്ന നിലയിൽ സെക്രട്ടറിക്കും സർക്കാർ ഉത്തരവുകളിലൂടെ ഡെലിഗേറ്റ് ചെയ്തിട്ടുണ്ട്. ഈ അധികാരം ഉപയോഗിച്ചാണ് പഞ്ചായത്തിലെ തോക്ക് ലൈസൻസുള്ള മാപ്പോത്ത് മനോഹരൻ, പി.ആർ.ഗോപകുമാർ എന്നിവരെ ചുമതലപ്പെടുത്തി ഉത്തരവിറക്കിയത്. മേയ് 27 വരെയാണ് ഉത്തരവിന്റെ കാലപരിധി. എന്നാൽ ഉത്തരവിറക്കി എന്നാൽ മൂന്ന് മാസം കഴിഞ്ഞിട്ടും ഒരു പന്നിയെപ്പോലും വെടിവെക്കാൻ സാധിച്ചില്ല. കാട്ടുപന്നിശല്യം രൂക്ഷമായ മേഖലയിലെ കർഷകർ തോക്ക് ലൈസൻസുള്ളവർക്ക് വിവരം നൽക്കുന്നില്ലെന്നാണ് പഞ്ചായത്ത് അധികൃതർ പറയുന്നത്. ശ്രീകണ്ഠപുരം നഗരസഭയും മലയോരത്തെ മറ്റ് പഞ്ചായത്തുകളും കാട്ടുപന്നികളെ വെടിവെച്ച് കൊല്ലാനുള്ള നടപടികൾ തുടങ്ങിയിട്ടുണ്ട്.

Share our post

IRITTY

കിളിയന്തറയിൽ സഹകരണ റബർ ഫാക്ടറി സജ്ജം

Published

1 day ago

November 22, 2024

NH newsdesk

Share our post

ഇരിട്ടി:ക്ഷീരസംഘം മാതൃകയിൽ റബർ പാലളന്ന്‌ കർഷകരിൽനിന്ന്‌ ശേഖരിച്ച്‌ ഗ്രേഡ് റബർ ഷീറ്റാക്കി മാറ്റുന്ന ജില്ലയിലെ ആദ്യത്തെ സഹകരണ റബർ ഫാക്ടറി കിളിയന്തറ നിരങ്ങൻചിറ്റയിൽ പ്രവർത്തനക്ഷമമായി. അടുത്തയാഴ്‌ച ഉദ്‌ഘാടനം ചെയ്യും. കിളിയന്തറ സർവീസ്‌ സഹകരണ ബാങ്കാണ്‌ നിരങ്ങൻചിറ്റയിൽ വാങ്ങിയ അരയേക്കർ സ്ഥലത്ത്‌ നിർമിച്ച ഫാക്ടറിയിൽ നൂതന സംരംഭം ആരംഭിക്കുന്നത്‌. രണ്ടുകോടി രൂപയുടേതാണ്‌ പദ്ധതി.
കർഷകരിൽനിന്ന്‌ റബർപാൽ വാങ്ങി നിരങ്ങൻചിറ്റ ഫാക്ടറിയിൽ സംഭരിക്കും. ആർഎസ്‌എസ്‌ ഗ്രേഡ്‌ നാലിനം ഷീറ്റടിക്കാനുള്ള ഉപകരണങ്ങൾ ഫാക്ടറിയിലുണ്ട്‌. പാൽ ഉറയൊഴിച്ച്‌ തത്സമയം ഷീറ്റാക്കി മാറ്റും. ഷീറ്റിന്‌ തൂക്കത്തോതിൽ മാർക്കറ്റ്‌ വില പത്തുദിവസം കൂടുമ്പോൾ നൽകും. ലാറ്റക്സ്‌ ഷീറ്റാക്കി മാറ്റുന്ന വ്യക്തിഗത ചെലവ്‌ കുറയ്‌ക്കാനും മേത്തരം ഷീറ്റ്‌ ലഭ്യമാക്കി ഉയർന്ന വില കർഷകർക്ക്‌ നൽകാനുമാണ്‌ സംരംഭം തുടങ്ങുന്നതെന്ന്‌ ബാങ്ക്‌ പ്രസിഡന്റ്‌ വി കെ ജോസഫ്‌, സെക്രട്ടറി എൻ അശോകൻ എന്നിവർ പറഞ്ഞു.ഉദ്‌ഘാടനം കഴിയുന്നതോടെ റബർ കാർഷിക മേഖലയിലെ കർഷകർക്കാകെ പ്രയോജനപ്പെടുന്ന തരത്തിൽ ഫാക്ടറി പ്രവർത്തനം വിപുലപ്പെടുത്തും. പ്രതിദിനം 2000 ലിറ്റർ ലാറ്റക്സ്‌ ഗ്രേഡ്‌ ഷീറ്റാക്കാനുള്ള ശേഷിയുണ്ട്‌ ഫാക്ടറിക്ക്‌.

Share our post

IRITTY

കാട്ടുപന്നികൾ പരക്കെ; പൊറുതിമുട്ടി പെരുമ്പറമ്പ്‌

Published

2 days ago

November 21, 2024

NH newsdesk

Share our post

ഇരിട്ടി:പെരുമ്പറമ്പിലെ ജനവാസമേഖലയിൽ രണ്ടാം ദിവസവും കാട്ടുപന്നിക്കൂട്ടമെത്തി വ്യാപകമായി കൃഷി നശിപ്പിച്ചു. മാതോളി ശ്രീനിവാസൻ, മന്നമ്പേത്ത് പ്രമോദ്കുമാർ എന്നിവരുടെ കൃഷിയിടത്തിലെ കപ്പ, ചേന, ചേമ്പ്, കൂവ എന്നിവ കഴിഞ്ഞ രാത്രിയിൽ തകർത്തു. തിങ്കൾ രാത്രിയിലും കാട്ടുപന്നികളിറങ്ങി ജോണി യോയാക്കിന്റെ 200 നേന്ത്രവാഴകളും കപ്പയും നശിപ്പിച്ചിരുന്നു.മാതോളി ശ്രീനിവാസൻ കൃഷിയിടത്തിന്ചുറ്റും സാരിവിരിച്ച്‌ തീർത്ത വേലിയും തകർത്താണ്‌ വിളവെടുപ്പിന് പാകമായ കപ്പയും കൂവയും ചേമ്പും നശിപ്പിച്ചത്‌. പ്രമോദ്കുമാറിന്റെ വീട്ടുപറമ്പിലെ ചേനയും ചേമ്പുമാണ്‌ നശിപ്പിച്ചത്‌. വനംവകുപ്പ് അധികൃതർ സ്ഥലം സന്ദർശിച്ചു. ഫോറസ്റ്റർ സുനിൽകുമാർ ചെന്നപ്പൊയിൽ, ബീറ്റ് ഫോറസ്റ്റർ ഈടൻ രാജേഷ് എന്നിവരുടെ നേതൃത്വത്തിൽ കൃഷിനഷ്ടം വിലയിരുത്തി. വനമേഖലയിൽനിന്ന്‌ കിലോമീറ്ററോളം അകലെയുള്ള ജനവാസ മേഖലയാണ് കാട്ടുപന്നികൾ താവളമാക്കിയത്‌. പന്നികളെ വെടിവച്ചുകൊല്ലാൻ നടപടി സ്വീകരിക്കുമെന്ന് പഞ്ചായത്ത് പ്രസിഡന്റ് പി രജനി പറഞ്ഞു.

Share our post

IRITTY

ഇരിട്ടി നഗരസഭാ കേരളോത്സവം ഡിസംബർ ഒന്ന് മുതൽ 15 വരെ

Published

2 days ago

November 21, 2024

NH newsdesk

Share our post

ഇരിട്ടി: ഇരിട്ടി നഗരസഭാ കേരളോത്സവം ഡിസംബർ 1 മുതൽ 15 വരെ വിവിധ വേദികളിലായി നടക്കും. ക്രിക്കറ്റ് മത്സരം ഡിസംബർ 1ന് വളള്യാട് ഗ്രൗണ്ടിലും, വോളിബോൾ മത്സരം നിടിയാഞ്ഞിരം ഗ്രൗണ്ടിലും, വടംവലി മത്സരം ഇരിട്ടി പുതിയ സ്റ്റാൻ്റ് പരിസരത്ത്ഡിസംബർ 4ന് 7 മണിക്കും, ചെസ് മത്സരം ഡിസംബർ 7 ന് നഗരസഭ ഹാളിലും, കബഡി മത്സരം മിത്തലെ പുന്നാട് നിവേദിത സ്ക്കൂൾ ഗ്രൗണ്ടിലും, അത് ലറ്റിക്ക് മത്സരങ്ങൾ ഡിസംബർ 8 ന് രാവിലെ 8 മണി മുതൽ വളള്യാട് ഗ്രൗണ്ടിലും, ഷട്ടിൽ ടൂർണമെൻ്റ്ഡിസംബർ 10 ന് വൈകുന്നേരം 5 ണി മുതൽ ഇരിട്ടി എം.എസ് ഗോൾഡ് ഇൻ്റോർ ഗ്രൗണ്ടിലും, ഫുട്ബോൾ മത്സരം ഡിസംബർ 14 ന് വളള്യാട് ഗ്രൗണ്ടിൽ വച്ചും, കലാമത്സരങ്ങൾ ഡിസംബർ 15ന് ചാവശ്ശേരി മിനി സ്റ്റേഡിയത്തിലും നടക്കും.

നഗരസഭ ഹാളിൽ നടന്ന സംഘാടക സമിതി രൂപീകരണ യോഗം ചെയർപേഴ്സൺ കെ.ശ്രിലത ഉദ്ഘാടനം ചെയ്തു. വൈസ് ചെയർമാർ പി.പി. ഉസ്മാൻ അധ്യക്ഷനായി. സ്റ്റാൻ്റിംങ്ങ് കമ്മിറ്റി ചെയർമാൻമാരായ എ.കെ. രവിന്ദ്രൻ, ടി.കെ. ഫസീല, പി.കെ. ബൾക്കീസ്, കൗൺസിലർമാരായ പി.രഘു, എ.കെ. ഷൈജു, എം.കെ. നജുമുന്നിസ്സ, ആസൂത്രണ സമിതി ഉപാധ്യക്ഷൻ കെ.ആർ. അശോകൻ, എൻ. രാജൻ, യുത്ത് കോഡിനേറ്റർ അശ്വിൻ കാരായി എന്നിവർ സംസാരിച്ചു.സംഘാടക സമിതി ഭാരവാഹികൾ : കെ.ശ്രീലത (ചെയർമാൻ), രാഗഷ് പാലേരി വീട്ടിൽ (ജനറൽ കൺവീനർ ).

Share our post