Local News
മട്ടന്നൂരിൽ ട്രാഫിക് പരിഷ്കരണം 25 മുതൽ; തീരുമാനങ്ങൾ ഇങ്ങനെ

മട്ടന്നൂർ: നഗരത്തിൽ വാഹന ഗതാഗത കുരുക്ക് ഒഴിവാക്കുന്നതിനു സമഗ്രമായ ട്രാഫിക് പരിഷ്കാരം ഏർപ്പെടുത്താൻ തീരുമാനം. നഗരസഭയും പൊലീസും വിളിച്ചു ചേർത്ത യോഗത്തിൽ ചർച്ച ചെയ്ത ശേഷമാണ് ഇതു സംബന്ധിച്ചു തീരുമാനമെടുത്തത്.
പരീക്ഷണാടിസ്ഥാനത്തിൽ 25 മുതലാണു ട്രാഫിക് പരിഷ്കാരം നടപ്പാക്കുക. പ്രശ്നങ്ങൾ പരിഹരിച്ച് സ്ഥിരം സംവിധാനം ഏർപ്പെടുത്തും. അസിസ്റ്റന്റ് കമ്മിഷണർ മൂസ വള്ളിക്കാടന്റെ അധ്യക്ഷതയിലാണ് യോഗം ചേർന്നത്.
നഗരസഭാധ്യക്ഷൻ എൻ.ഷാജിത്ത്, ഉപാധ്യക്ഷ ഒ.പ്രീത, സ്ഥിരം സമിതി അധ്യക്ഷരായ വി.കെ.സുഗതൻ, പി.ശ്രീനാഥ്, കെ.മജീദ്, പി.പ്രസീന, കൗൺസിലർമാരായ കെ.വി. പ്രശാന്ത്, വി.എൻ.മുഹമ്മദ്, പൊലീസ് ഇൻസ്പെക്ടർ കെ.വി.പ്രമോദൻ, എസ്ഐ കെ.പി.അബ്ദുൽനാസർ, അസിസ്റ്റന്റ് മോട്ടർ വെഹിക്കിൾ ഇൻസ്പെക്ടർ ശ്രീനാഥ് എന്നിവർ നേതൃത്വം നൽകി.
വിവിധ രാഷ്ട്രീയ പാർട്ടി പ്രതിനിധികളുടെയും മോട്ടർ തൊഴിലാളി സംഘടന പ്രതിനിധികളുടെയും വ്യാപാരി സംഘടന പ്രതിനിധികളുടെയും നിർദേശങ്ങൾ യോഗത്തിൽ ചർച്ച ചെയ്തു.
സ്കൂൾ തുറക്കുന്ന സാഹചര്യത്തിലും വിമാനത്താവള നഗരമെന്ന നിലയ്ക്ക് ഹജ് യാത്രക്കാരുടെ തിരക്കും ഉൾപ്പെടെ വാഹന ഗതാഗതക്കുരുക്ക് ഉണ്ടാകാനുള്ള സാധ്യത കൂടി കണക്കിലെടുത്താണ് പരിഷ്കാരം ഏർപ്പെടുത്തുന്നത്.
ഗതാഗതക്കുരുക്കും പാർക്കിങ് സ്ഥല ലഭ്യതക്കുറവും കാരണം ആളുകൾ മട്ടന്നൂർ നഗരത്തെ ഉപേക്ഷിക്കുന്ന സാഹചര്യമാണുള്ളതെന്ന് നഗരസഭാ ചെയർമാൻ എൻ.ഷാജിത്ത് പറഞ്ഞു. ആസൂത്രിത നഗരമല്ല മട്ടന്നൂർ.
സ്വാവാഭികമായി ഉണ്ടായ നഗര പ്രദേശമാണ്. കെട്ടി നിർമാണ ചട്ടം ഉണ്ടാകുന്നതിനു മുൻപ് നിർമിച്ച കെട്ടിടങ്ങൾ നഗരത്തിൽ ഏറെയുണ്ട്. നല്ല ഇടപെടലിലൂടെ ഗതാഗത പരിഷ്കാരം ഏർപ്പെടുത്തണം. ബസ് സ്റ്റാൻഡിനെ ചുറ്റിയാണ് മട്ടന്നൂർ നഗരം ഉള്ളത്.
സ്വകാര്യ വാഹനങ്ങളുടെ പാർക്കിങ് ആണ് പ്രധാന വിഷയമെന്നും എങ്ങനെ പരിഹാരിക്കാമെന്നു കൂട്ടായ തീരുമാനം വേണമെന്നും ചെയർമാൻ പറഞ്ഞു. മുൻപ് പല തവണ ട്രാഫിക് പരിഷ്കാരം ഏർപ്പെടുത്താൻ തീരുമാനിച്ചുവെങ്കിലും പൂർണമായി നടപ്പാക്കാൻ കഴിഞ്ഞിരുന്നില്ല.
വൺവേ സംവിധാനം ഏർപ്പെടുത്തിയതു പോലും പിന്നീട് പരാജയപ്പെട്ട അവസ്ഥയായിരുന്നു. എന്നാൽ ഇത്തവണ ബഹുജനങ്ങളുടെയും വ്യാപാരികളുടെയും നിർദേശം പരിഗണിച്ച് എല്ലാവർക്കും സൗകര്യപ്രദമാകുന്ന വിധത്തിലാണ് ഗതാഗത പരിഷ്കാരം ഏർപ്പെടുത്തുന്നത്. സ്വാകര്യ വ്യക്തികളുടെ സ്ഥലത്ത് പേ പാർക്കിങ് ഏർപ്പെടുത്താൻ നഗരസഭ അനുമതി നൽകുമെന്ന് ചെയർമാൻ പറഞ്ഞു.
സി.എച്ച്.സക്കറിയ (വ്യാപാരി ഏകോപന സമിതി), പി.കെ.നാരായണൻ (വ്യാപാരി സമിതി), സി.വി.സിറാജ് (ചുമട്ട് തൊഴിലാളി യൂണിയൻ), സി.വി.രഘുരാജൻ, ടി.ദിനേശൻ, കെ.വി.ജയചന്ദ്രൻ (മോട്ടർ തൊഴിലാളി യൂണിയനുകൾ), എ.പ്രദീപ്കുമാർ (ഹോട്ടൽ അസോസിയേഷൻ), എ.സുധാകരൻ (സിപിഐ), എ.കെ.രാജേഷ് (കോൺ), ഇ.പി.ഷംസുദ്ദീൻ (മുസ്ലിം ലീഗ്), കെ.പി.രമേശൻ (എൽജെഡി), അണിയേരി അച്യുതൻ (കോൺ. എസ്), എം.കെ.കുഞ്ഞിക്കണ്ണൻ (സിഎംപി), ഷിനോജ് കാഞ്ഞിലേരി (പഴശ്ശി ജെസിഐ) എന്നിവർ ചർച്ചയിൽ നിർദേശങ്ങൾ അവതരിപ്പിച്ചു.
തീരുമാനങ്ങൾ :
∙ ബസ് സ്റ്റാൻഡ് പരിസരത്ത് ലോറികൾക്കു കയറ്റിറക്ക് സമയത്തിൽ നിയന്ത്രണം ഏർപ്പെടുത്തും.
∙ മാർക്കറ്റ് റോഡിൽ വൺവേ കർശനമാക്കും.
∙ തലശ്ശേരി റോഡിൽ ഒരു വശത്തു മാത്രം പാർക്കിങ്.
∙ ആംബുലൻസ് പാർക്കിങ് ലയൺസ് പാർക്കിനു സമീപം.
∙ ക്യാമറകളും സൈൻ ബോർഡുകളും ഡിവൈഡറുകളും സ്ഥാപിക്കും.
∙ എയർപോർട്ട് റോഡിൽ വാഹന പാർക്കിങ് നിയന്ത്രിക്കും.
∙ ഇരിട്ടി റോഡിൽ ഒരു വശത്ത് മാത്രം കാർ പാർക്കിങ്.
∙ സ്വകാര്യ വ്യക്തികളുടെ സ്ഥലത്ത് പേ പാർക്കിങ്ങിന് നഗരസഭ അനുമതി നൽകും.
∙ ട്രാഫിക് നിയന്ത്രിക്കാൻ പൊലീസുകാരുടെ എണ്ണം കൂട്ടാനും ട്രാഫിക് വാർഡൻമാരെ ചുമതലപ്പെടുത്താനും തീരുമാനം.
MATTANNOOR
കണ്ണൂരിൽ നിന്ന് ഹജ്ജ് സർവീസിന് എയർ ഇന്ത്യ എക്സ്പ്രസ്


മട്ടന്നൂർ: കണ്ണൂർ വിമാന താവളത്തിൽ നിന്ന് ഹജ്ജ് സർവീസിന് ഇത്തവണ വൈഡ് ബോഡി വിമാനങ്ങളില്ല. എയർ ഇന്ത്യ എക്സ്പ്രസാണ് ഈവർഷം കണ്ണൂരിൽ നിന്ന് ഹജ്ജ് സർവീസ് നടത്തുക.കഴിഞ്ഞ വർഷം സൗദി എയർലൈൻസിന്റെ വൈഡ് ബോഡി വിമാനങ്ങൾ സർവീസ് നടത്തിയിരുന്നു. ഇത്തവണ കൊച്ചിയിൽ നിന്നാണ് സൗദി എയർലൈൻസ് ഹജ്ജ് സർവീസ് നടത്തുക.
മേയ് 15 മുതലായിരിക്കും കണ്ണൂരിൽ നിന്നുള്ള ഹജ്ജ് സർവീസുകൾ. സർവീസുകളുടെ സമയക്രമം അനുസരിച്ച് തീയതിയിൽ മാറ്റം വന്നേക്കും. 4105 പേരാണ് ഇത്തവണ കണ്ണൂരിൽ നിന്ന് ഹജ്ജിന് പോകാൻ രജിസ്റ്റർ ചെയ്തിരിക്കുന്നത്.കഴിഞ്ഞ വർഷം 3218 പേരാണ് കണ്ണൂർ വിമാനത്താവളം വഴി ഹജ്ജിന് പോയത്.ഹജ്ജ് ക്യാമ്പ് ഒരുക്കുന്നതിന് പ്രാരംഭ പ്രവർത്തനങ്ങൾ തുടങ്ങിയിട്ടുണ്ട്. അന്താരാഷ്ട്ര കാർഗോ കോംപ്ലക്സിൽ തന്നെ ഹജ്ജ് ക്യാമ്പിന് വേണ്ട സൗകര്യം ഒരുക്കാനാണ് ലക്ഷ്യമിടുന്നത്.വിമാനത്താവള പരിസരത്ത് ഹജ്ജ് ഹൗസ് നിർമിക്കാനുള്ള നടപടികളും വേഗത്തിൽ പുരോഗമിക്കുകയാണ്.
THALASSERRY
കൈക്കൂലി വാങ്ങിയ കേസ്; വാണിജ്യ നികുതി റിട്ട. ഓഫിസർക്ക് മൂന്ന് വർഷം കഠിനതടവും 50,000 രൂപ പിഴയും


തലശ്ശേരി: സ്ഥാപനത്തിന്റെ രജിസ്ട്രേഷൻ പുന:സ്ഥാപിക്കാൻ 5000 രൂപ കൈക്കൂലി വാങ്ങിയ സംഭവത്തിൽ പ്രതിക്ക് മൂന്ന് വർഷം കഠിനതടവും 50,000 രൂപ പിഴയും. വാണിജ്യ നികുതി റിട്ട. ഓഫിസർ കാസർകോട് പിലിക്കോട് ആയില്യത്തിൽ എം.പി. രാധാകൃഷ്ണനെയാണ് (64) തലശ്ശേരി വിജിലൻസ് കോടതി ജഡ്ജി കെ. രാമകൃഷ്ണൻ ശിക്ഷിച്ചത്. രണ്ടു വകുപ്പുകളിലായാണ് ശിക്ഷ വിധിച്ചത്. പിഴയടച്ചില്ലെങ്കിൽ ആറ് മാസം കഠിനതടവ് അനുഭവിക്കണം. 2011 മേയിലാണ് കേസിനാസ്പദമായ സംഭവം.
പ്രതി തളിപ്പറമ്പ് വാണിജ്യ നികുതി ഓഫിസറായിരിക്കുമ്പോഴാണ് സംഭവം. സ്ഥാപനത്തിന്റെ രജിസ്ട്രേഷൻ പുന:സ്ഥാപിച്ചു കിട്ടാൻ കണക്കുകൾ പരിശോധിച്ച് നികുതി സ്വീകരിക്കാൻ 25,000 രൂപ കൈക്കൂലി ആവശ്യപ്പെട്ടതായാണ് പരാതി. അപ്പീൽ അതോറിറ്റി ഉത്തരവുമായി ചെന്നപ്പോൾ 5000 രൂപ ആവശ്യപ്പെട്ട് വാങ്ങി. വിജിലൻസ് കണ്ണൂർ ഡിവൈ.എസ്.പി എം.സി. ദേവസ്യ രജിസ്റ്റർ ചെയ്ത കേസിൽ ഡിവൈ.എസ്.പി സുനിൽ ബാബു കേളോത്തും കണ്ടിയാണ് കുറ്റപത്രം നൽകിയത്. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടർ കെ. ഉഷാകുമാരി ഹാജരായി
MATTANNOOR
പഴശ്ശി വീണ്ടും ഒഴുകുന്നു; ഡിസംബറോടെ ശാഖാ കനാലുകളിൽ വെള്ളം ഒഴുക്കാമെന്നു പ്രതീക്ഷ


മട്ടന്നൂർ : പഴശ്ശി ജലസേചന പദ്ധതിയുടെ കനാലുകളിൽ വെള്ളമൊഴുകുമ്പോൾ ആശ്വാസത്തിന്റെ കുളിരുപടരുന്നത് കർഷക മനസ്സുകളിലാണ്. രണ്ടു പതിറ്റാണ്ടായി വരണ്ടുണങ്ങിക്കിടക്കുകയായിരുന്നു കനാലുകൾ. ജലസേചനം സാധ്യമാകാതെ, ഉപേക്ഷിക്കേണ്ടി വരുമെന്ന ഘട്ടത്തിൽ നിന്നാണ് പഴശ്ശി പദ്ധതിക്കു മോചനമുണ്ടായത്. തകർന്ന കനാലുകൾ പുനർനിർമിച്ചും നീർപാലങ്ങൾ പുതുക്കിപ്പണിതും പദ്ധതിക്കു പുതുജീവൻ നൽകുകയായിരുന്നു. അണക്കെട്ട് ജലസമൃദ്ധമായതും നേട്ടമായി. പ്രധാന കനാലിലൂടെ കഴിഞ്ഞ വർഷം ജനുവരി ഒന്നിനു പരീക്ഷണാടിസ്ഥാനത്തിൽ വെള്ളം തുറന്നു വിട്ടിരുന്നു. പഴശ്ശി അണക്കെട്ട് മുതൽ പറശ്ശിനിക്കടവ് പാലം വരെ 42 കിലോമീറ്റർ ദൂരം വെള്ളം ഒഴുകിയെത്തി.
പഴശ്ശി പദ്ധതി
വളപട്ടണം പുഴയിൽ കുയിലൂരിൽ അണ കെട്ടി പുഴവെള്ളം കനാൽ വഴി കൃഷിയിടങ്ങളിൽ എത്തിക്കാനാണ് പഴശ്ശി ജലസേചന പദ്ധതി ആരംഭിച്ചത്. 11525 ഹെക്ടർ സ്ഥലത്ത് രണ്ടും മൂന്നും വിളകൾക്ക് ജലസേചനം നൽകുകയായിരുന്നു ലക്ഷ്യം. ഇരിട്ടി, തലശ്ശേരി, കണ്ണൂർ, തളിപ്പറമ്പ് താലൂക്കുകളിലായി 46.26 കിലോ മീറ്റർ പ്രധാന കനാലും 78 കിലോ മീറ്റർ ഉപ കനാലുമുണ്ട്. വിതരണ ശൃംഖലകളും നീർച്ചാലുകളും അടക്കം 440 കിലോമീറ്റർ കനാൽ ഉണ്ടെന്നാണ് കണക്ക്.ജില്ലയിലെ ഏറ്റവും വലിയ ജലസേചന പദ്ധതിയും 12 ശുദ്ധജല വിതരണ പദ്ധതികളുടെ ജലസ്രോതസ്സുമാണ്. പഴശ്ശി സാഗർ ജല വൈദ്യുത പദ്ധതി വരുന്നതും പഴശ്ശി അണക്കെട്ടിനോടു ചേർന്നാണ്. 1998ൽ കമ്മിഷൻ ചെയ്തു. 100 കോടി രൂപ ചെലവിൽ പദ്ധതി പൂർത്തിയാക്കാൻ ലക്ഷ്യമിട്ടുവെങ്കിലും ആയിരത്തിലേറെ കോടികൾ ഇതിനകം ചെലവിട്ടു കഴിഞ്ഞു.
പ്രളയം തകർത്ത കനാൽ
2012 ഡിസംബറിൽ കാലവർഷം കനത്തു പെയ്തപ്പോൾ പഴശ്ശി അണക്കെട്ടിന്റെ ഷട്ടറുകൾ തുറക്കാൻ കഴിയാത്തതിനെ തുടർന്നു അണക്കെട്ട് കവിഞ്ഞൊഴുകിയാണ് കനാൽ ഭിത്തികൾ തകർന്നത്. കനാലിന്റെ കുറെ ഭാഗം ഒഴുകിപ്പോയതോടെ കനാൽ തന്നെ കാണാതായി. 2018, 19 വർഷങ്ങളിലെ വെള്ളപ്പൊക്കത്തിലും കനാൽ ഭിത്തികളിൽ വിള്ളൽ ഉണ്ടായി. കനാലിലൂടെ കൃഷി ആവശ്യത്തിന് അവസാനമായി വെള്ളം ലഭിച്ചത് 2008ൽ ആണ്. കനാലുകളിൽ അറ്റകുറ്റപ്പണി നടത്തേണ്ടതുകൊണ്ട് തുടർന്നുള്ള വർഷങ്ങളിൽ വെള്ളം തുറന്നുവിട്ടില്ല.
ദുരിതാശ്വാസമായ് പുനർ നിർമാണം
സംസ്ഥാന ദുരിതാശ്വാസ ഫണ്ടിൽ നിന്ന് 17 കോടി രൂപ ചെലവിട്ടാണ് പുനർനിർമാണം നടത്തിയത്. 2019ലെ വെള്ളപ്പൊക്കത്തിൽ പ്രധാന കനാലിലെ അണ്ടർ ടണൽ 110 മീറ്ററോളം നീളത്തിൽ കനാൽ ഭിത്തി ഉൾപ്പെടെ തകർന്നിരുന്നു. മട്ടന്നൂർ, കാര, വളയാൽ എന്നിവിടങ്ങളിൽ കനാൽ ഭിത്തിയും റോഡും 5 കോടി രൂപ ചെലവിട്ടാണ് പുനർനിർമിച്ചത്.
മാഹി ഉപ കനാലിൽ നിന്നു കീഴല്ലൂർ, വേങ്ങാട്, മാങ്ങാട്ടിടം, കോട്ടയം, പിണറായി, മൊകേരി, കതിരൂർ, എരഞ്ഞോളി, തൃപ്പങ്ങോട്ടൂർ, ചൊക്ലി, കുന്നോത്തുപറമ്പ്, ന്യൂമാഹി പഞ്ചായത്തുകളിലും കൂത്തുപറമ്പ്, തലശ്ശേരി, പാനൂർ നഗരസഭകളിലുമായി 2476 ഹെക്ടർ വയലും ഇരിട്ടി, മട്ടന്നൂർ, ആന്തൂർ നഗരസഭകളിലും അഞ്ചരക്കണ്ടി, മുണ്ടേരി, കൂടാളി, കുറ്റ്യാട്ടൂർ, മയ്യിൽ, കൊളച്ചേരി, മുണ്ടേരി പഞ്ചായത്തുകളിലുമായി 569 ഹെക്ടർ കൃഷിക്കും ജലസേചനം നടത്താമെന്നാണ് കണക്കു കൂട്ടൽ.
2025 ഡിസംബറോടെ കാട്ടാമ്പള്ളി, തളിപ്പറമ്പ്, മൊറാഴ ശാഖാ കനാലുകളിൽ പരീക്ഷണാടിസ്ഥാനത്തിൽ വെള്ളം ഒഴുക്കാൻ കഴിയും. ഇതു വിജയിച്ചാൽ പഴശ്ശി ജലസേചന പദ്ധതിയെ പൂർണതോതിൽ പ്രവർത്തന സജ്ജമാക്കാൻ സാധിക്കുമെന്ന് ജലവിഭവ വകുപ്പ് പ്രതീക്ഷിക്കുന്നു. ജില്ലയിലെ പ്രധാന ശുദ്ധജല പദ്ധതികൾക്കെല്ലാം വെള്ളം പമ്പ് ചെയ്യുന്നത് പഴശ്ശി അണക്കെട്ടിൽ നിന്നാണ്.
-
Local News2 years ago
പേരാവൂർ സ്വദേശിനിയായ അധ്യാപിക തീപ്പൊള്ളലേറ്റ് മരിച്ച നിലയിൽ
-
Breaking News2 years ago
ലാപ്ടോപ്പിൽ 80 സ്ത്രീകളുടെ അശ്ലീല ദൃശ്യങ്ങൾ; വയനാട്ടിൽ നിന്ന് മടങ്ങും വഴി പള്ളി വികാരി പിടിയിൽ,
-
PERAVOOR2 years ago
പേരാവൂർ സ്വദേശിനിയായ യുവതി സെർബിയയിൽ അന്തരിച്ചു
-
KOLAYAD2 years ago
കോളയാട് മേനച്ചോടിയിൽ അമ്മയ്ക്കും രണ്ട് മക്കൾക്കും വെട്ടേറ്റ് ഗുരുതര പരിക്ക്
-
Kannur1 year ago
പേരാവൂരിലെ ട്രസ്റ്റിന്റെ ഫാമിൽ വൻ വ്യാജവാറ്റ്; 1200 ലിറ്റർ വാഷും 40 ലിറ്റർ ചാരായവും പിടികൂടി
-
Kannur2 years ago
വിദ്യാർത്ഥികളെ പ്രകൃതി വിരുദ്ധ പീഡനത്തിനിരയാക്കിയ മദ്രസ അധ്യാപകനെതിരെ കണ്ണവം പോലീസ് കേസെടുത്തു
-
Breaking News11 months ago
പേരാവൂരിൽ ഭാര്യയെ ഭർത്താവ് വെട്ടിക്കൊന്നു
-
Breaking News2 years ago
പേരാവൂര് കുനിത്തലയില് പടക്കവില്പന ശാലക്ക് സമീപത്തെ സംഘര്ഷം;നാലു പേര്ക്കെതിരെ കേസ്