കണ്ണൂർ: വിമാനതാവളത്തിൻ്റെ ഒന്നാം ഗേറ്റായ കല്ലേരിക്കരയില്‍ ഭാരത് പെട്രോളിയം കോർപറേഷൻ ലിമിറ്റഡിൻ്റെ പെട്രോള്‍ പമ്പ് പ്രവർത്തന സജ്ജമായി. കിയാലും ബി.പി. സി എല്ലും സംയുക്തമായാണ് പെട്രോള്‍ പമ്പ് സ്ഥാപിച്ചത്.പമ്പ് പ്രവർത്തനം തുടങ്ങിയാല്‍ വിമാനതാവളത്തില്‍ വന്നു പോകുന്നവർക്ക് മാത്രമല്ല പൊതുജനങ്ങള്‍ക്കും ഇന്ധനം നിറയ്ക്കാൻ കഴിയും. ഒരു വർഷം മുൻപാണ് ഒന്നാം ഗേറ്റിന് സമീപം പെട്രോള്‍ പമ്ബിൻ്റെ നിർമ്മാണം തുടങ്ങിയത്.നിർമ്മാണം പൂർത്തിയായ സാഹചര്യത്തില്‍ പമ്ബിൻ്റെ ഉദ്ഘാടനം ഉടൻ നടത്തും. അഞ്ചരക്കണ്ടിയില്‍ നിന്നും എയർപോർട്ട് റോഡ് വഴി പോകുന്ന വാഹനങ്ങള്‍ക്ക് തിരക്കില്ലാതെ ഇന്ധനം നിറയ്ക്കാൻ കഴിയുന്നതിന് സൗകര്യപ്രദമാണ് പുതിയ പമ്പ്.

മട്ടന്നൂർ: ബങ്കണപറമ്പിൽ വാടക വീട്ടിൽ അണ്ടിപരിപ്പ് കച്ചവടം നടത്തുന്ന എടയന്നൂർ സ്വദേശി അഷ്‌റഫ്‌ എം.ഡി.എം.എയുമായി പിടിയിലായി. ഇയാള് എം.ഡി.എം.എ കൈവശം വച്ചതായി മട്ടന്നൂർ പോലീസിന് വിവരം ലഭിച്ചതിനെ തുടർന്ന് എസ് ഐ ലിനേഷ്,സജീവൻ സിവിൽ പോലീസ് ഓഫീസർ വിനീഷ് എന്നിവരുടെ നേതൃത്വത്തിൽ രാത്രി വാടക വീട്ടിൽ പരിശോധന നടത്തുകയും 3.05ഗ്രാം എം ഡി എം എ പിടിച്ചെടുക്കുകയും പ്രതിയെ അറസ്റ്റ് ചെയ്യുകയും ഉണ്ടായി. രണ്ട് വർഷത്തോളമായി ഇയാൾ ബങ്കണപറമ്പിലെ വാടക വീട്ടിൽ അണ്ടിപരിപ്പ് വിൽപ്പന നടത്തി വരികയാണ്. അണ്ടിപരിപ്പ് വിൽപ്പനയുടെ മറവിലാണ് ലഹരി ഇടപാടുകൾ നടത്തിവന്നത്. നാടിന്റെ സമാധാനം തകർക്കുന്ന ഇത്തരം ആളുകൾക്ക് എതിരായി ജനങ്ങളും ജാഗ്രത പുലർത്തണമെന്ന് പോലീസ് അറിയിച്ചു.

മട്ടന്നൂർ: മട്ടന്നൂർ സബ്ബ് രജിസ്ട്രാർ ഓഫീസിൽ രജിസ്റ്റർ ചെയ്തിട്ടുളള ആധാരങ്ങളിൽ വില കുറച്ചു കാണിച്ചതിനാൽ അണ്ടർവാല്വേഷൻ നടപടി നേരിടുന്ന കേസുകൾ നാമമാത്ര തുക അടച്ച് തീർപ്പാക്കുന്നതിനായി മാർച്ച് 6 ന് ജില്ലാ രജിസ്ട്രാർ, മട്ടന്നൂർ സബ്ബ് രജിസ്ട്രാർ ഓഫീസിൽ അദാലത്ത് സംഘടിപ്പിക്കും.അന്നേദിവസം ആവശ്യമായ രേഖകൾ സഹിതം ഓഫീസിൽ ഹാജരായി ആനുകൂല്യം പ്രയോജനപ്പെടുത്തി തുടർ നടപടികളിൽ നിന്ന് ഒഴിവാകണമെന്ന് മട്ടന്നൂർ സബ്ബ് രജിസ്ട്രാർ അറിയിച്ചു.