കണ്ണൂർ: കണ്ണൂർ യൂണിവേഴ്സിറ്റി എംപ്ലോയ്‌മെന്റ് ഇൻഫർമേഷൻ ആൻഡ് ഗൈഡൻസ് ബ്യൂറോ ആൻഡ് മോഡൽ കരിയർ സെന്റർ‍ വിവിധ സ്വകാര്യ സ്ഥാപങ്ങളിലെ ജോലി ഒഴിവുകളിലേക്ക് 30-ന് രാവിലെ പത്ത് മുതൽ ഒന്ന് വരെ ‘പ്രയുക്തി’ സൗജന്യ പ്ലേസ്‌മെന്റ് ഡ്രൈവ് സംഘടിപ്പിക്കും.ഇലക്ട്രീഷ്യൻ, ബിസിനസ് എക്സിക്യൂട്ടീവ്, ഓഫീസ് അഡ്മിനിസ്ട്രേറ്റർ, സോളാർ ടെക്നീഷ്യൻ, സബ് ഓഫീസ് അസിസ്റ്റൻ്റ്, സെയിൽസ് അസിസ്റ്റൻ്റ്, അസിസ്റ്റൻ്റ് അഡ്മിനിസ്ട്രേഷൻ, സ്റ്റാഫ് അക്കൗണ്ടൻ്റ്, സൈറ്റ് എൻജിനീയർ, സൈറ്റ് സൂപ്പർ വൈസർ, ഡ്രോട്ട് മാൻ, ത്രീഡി ഡിസൈനർ, ആർക്കിടെക്ട്‌, എൽ പി സെക്ഷൻ ടീച്ചർ, അറബിക് ടീച്ചർ, ഇന്റേണൽ ഓഡിറ്റർ (ഫിനാൻസ്, ഇൻഷുറൻസ്, അക്കൗണ്ടിങ് സർവീസ്), ബ്രാഞ്ച് റിലേഷൻസ് മാനേജർ, ഫീൽഡ് ഓഫീസർ, റിലേഷൻഷിപ്പ് ഓഫീസർ തസ്തികകളിലായി ഒഴിവുകൾ റിപ്പോർട്ട് ചെയ്തിട്ടുണ്ട്.അന്നേ ദിവസം രാവിലെ 9.30-ന് താവക്കര ആസ്ഥാനത്തെ എംപ്ലോയ്‌മെന്റ് ഇൻഫർമേഷൻ ആൻഡ് ഗൈഡൻസ് ബ്യൂറോയിൽ എല്ലാ അസ്സൽ സർട്ടിഫിക്കറ്റുകളും മൂന്ന് സെറ്റ് ബയോഡേറ്റയും സഹിതം എത്തിച്ചേരണം.

ലോക ഭിന്നശേഷി ദിനാഘോഷം ഉണർവ് -2024ന്റെ ഭാഗമായി കണ്ണൂർ ജില്ലയിലെ ബഡ്സ് സ്‌കൂൾ/ബി.ആർ.സി/സ്പെഷ്യൽ സ്‌കൂൾ, മറ്റ് ഭിന്നശേഷി വിഭാഗക്കാർ എന്നിവരെ പങ്കെടുപ്പിച്ച് കായിക മത്സരങ്ങൾ നടത്തുന്നു. കണ്ണൂർ ഡി.എസ്‌.സി ഗ്രൗണ്ടിൽ ഡിസംബർ മൂന്നിന് രാവിലെ 8.30 മുതൽ സബ് ജൂനിയർ, ജൂനിയർ, സീനിയർ വിഭാഗങ്ങളിൽ മത്സരങ്ങൾ നടക്കും. നവംബർ 30 ന് വൈകീട്ട് അഞ്ച് വരെ രജിസ്ട്രേഷൻ നടത്താം. സ്പോട്ട് രജിസ്ട്രേഷൻ ഉണ്ടായിരിക്കില്ല. ആൺകുട്ടികൾക്കും പെൺകുട്ടികൾക്കും വെവ്വേറെ മത്സരം നടത്തും. ഒരു മത്സരാർഥിക്ക് രണ്ട് മത്സരയിനങ്ങളിൽ പങ്കെടുക്കാം. മത്സരയിനങ്ങളിൽ പേര് രജിസ്റ്റർ ചെയ്യുന്നതിന് സ്പെഷ്യൽ സ്‌കൂളുകൾ, മറ്റ് ഭിന്നശേഷി വിഭാഗക്കാർ എന്നിവർ കണ്ണൂർ സിവിൽസ്റ്റേഷൻ എഫ് ബ്ലോക്കിലെ ജില്ലാ സാമൂഹ്യ നീതി ഓഫീസുമായി നേരിട്ടോ, dsjokannur@gmail.com ഇ-മെയിൽ വിലാസത്തിലോ ബന്ധപ്പെടണം. പേര്, പങ്കെടുക്കുന്ന മത്സരയിനം, ഫോൺ നമ്പർ എന്നിവ സഹിതം വിശദ വിവരങ്ങൾ സമർപ്പിക്കണം. ഫോൺ: 8281999015.

സമ്പൂർണ ശുചിത്വ ജില്ല എന്ന ലക്ഷ്യം കൈവരിക്കുന്നതിന് ആറ് മേഖലകളിൽ കർമ്മപദ്ധതിയുമായി ഹരിതകേരള മിഷൻ സംഘടിപ്പിച്ച ദ്വിദിന ശിൽപശാല. ഹരിത ടൗണുകൾ, ഹരിത പൊതുസ്ഥലങ്ങൾ, ഹരിത വിദ്യാലയങ്ങൾ, ഹരിത സ്ഥാപനങ്ങൾ, ഹരിത ടൂറിസം കേന്ദ്രങ്ങൾ, ഹരിത കലാലയങ്ങൾ എന്നിങ്ങനെ വിവിധ ഘടകങ്ങളുടെ ഏകോപനത്തിലൂടെയാണ് കർമ്മ പദ്ധതി തയ്യാറാക്കിയിട്ടുള്ളത്. ജില്ലയിലെ 243 ടൗണുകളെയും 2025 ജനവരി 26നകം ഹരിത ടൗണുകളാക്കി മാറ്റും. ഹരിത പദവി ലഭിക്കാത്ത 441 മാർക്കറ്റുകളും പൊതുസ്ഥലങ്ങളും 2024 ഡിസംബർ 31നകം ഹരിത പദവിയിലേക്ക് എത്താനുള്ള ശ്രമങ്ങളും കർമ്മപദ്ധതിയിൽ ഉൾപ്പെടുത്തിയിട്ടുണ്ട്. ജില്ലയിലെ 39 ടൂറിസം കേന്ദ്രങ്ങളെയും 2025 ജനവരി 26 നകം ഹരിത ടൂറിസം കേന്ദ്രങ്ങളായി മാറ്റാൻ തദ്ദേശ ഭരണ സ്ഥാപനങ്ങൾ കർമ്മപദ്ധതി തയ്യാറാക്കിയിട്ടുണ്ട്.

കുടുംബശ്രീ, അയൽകൂട്ടങ്ങൾക്കു ഹരിത പദവി നൽകുന്ന കാര്യത്തിൽ വിപുലമായ ഇടപെടൽ നടത്തും. ജില്ലയിൽ ആകെയുള്ള 20,000 കുടുംബശ്രീ അയൽക്കൂട്ടങ്ങളിൽ 4947 എണ്ണം ഇതിനകം ഹരിത പദവി നേടിയിട്ടുണ്ട്. ഡിസംബർ 31നകം ജില്ലയിലെ കലാലയങ്ങളെ ഹരിത കലാലയങ്ങളായി മാറ്റും. ജില്ലയിലെ 1629 വിദ്യാലയങ്ങളിൽ ഹരിത പദവി ലഭിക്കാത്തവക്ക് ഡിസംബർ 31നകം ഹരിത പദവി നേടുന്നതിനുള്ള പദ്ധതി പ്രവർത്തനങ്ങൾക്കും രൂപം നൽകി. കണക്ക് പ്രകാരം ജില്ലയിലുള്ള 4659 സ്ഥാപനങ്ങളിൽ 1391 എണ്ണത്തിന് ഇതിനകം ഹരിത സ്ഥാപന പദവി ലഭിച്ചിട്ടുണ്ട്. ബാക്കിയുള്ളവ ജനവരി 26 നകം ലക്ഷ്യത്തെത്താനുള്ള വിപുലമായ പ്രവർത്തനങ്ങൾക്കും ശില്പശാല രൂപം നല്കി. മാലിന്യമുക്ത നവകേരളം ക്യാമ്പയിനിന്റെ പ്രവർത്തനങ്ങൾക്ക് ജനകീയ പിന്തുണ ഉറപ്പു വരുത്താനുള്ള ശ്രമങ്ങളും ശക്തിപ്പെടുത്തും.

ജില്ലാ ആസൂത്രണ സമിതി ഹാളിൽ നടന്ന ശിൽപശാലയുടെ രണ്ടാം ദിവസം തദ്ദേശ സ്വയംഭരണ വകുപ്പ് അഡീഷണൽ ഡയറക്ടർ ബി.കെ ബലരാജ് ഉദ്ഘാടനം ചെയ്തു. തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ ടി.ജെ അരുൺ അധ്യക്ഷത വഹിച്ചു. ശുചിത്വമിഷൻ സംസ്ഥാന പ്രതിനിധികളായ മെൽവിൻ ഡാനിയൽ, പൂജാ മേനോൻ, കെ.എസ്.ഡബ്ല്യു. എം.പി. എഞ്ചിനീയർ ശ്യാമ പ്രസാദ്, ഹരിത കേരളം ജില്ലാ മിഷൻ ജില്ലാ കോ ഓർഡിനേറ്റർ ഇ.കെ. സോമശേഖരൻ, ശുചിത്വ മിഷൻ ജില്ലാ കോ- ഓഡിനേറ്റർ കെ.എം സുനിൽ കുമാർ എന്നിവർ ക്ലാസുകൾക്ക് നേതൃത്വം നല്കി.