മാവിലായി:മാവിലായി മൂന്നാംപാലത്ത് വലിയ തോടിന് സമീപത്തായി ആധുനിക സൗകര്യങ്ങളോടെ ഹെറിറ്റേജ് സ്ക്വയർ വരുന്നു. കണ്ണൂർ–- കൂത്തുപറമ്പ് സംസ്ഥാന പാതയോടുചേർന്ന്‌ എ കെ ജിയുടെ പേരിൽ നിർമിക്കുന്ന ചത്വരത്തിന് കിഫ്ബി അംഗീകാരം നൽകി.പെരളശേരി പഞ്ചായത്തിലെ മൂന്നാംപാലത്ത് തകരാറിലായ രണ്ടു പാലങ്ങൾ പുനർനിർമിക്കുന്നതിന്റെ ഭാഗമായി രണ്ടുമീറ്ററോളം റോഡ് ഉയർത്തേണ്ടി വന്നപ്പോൾ പല കച്ചവടസ്ഥാപനങ്ങളും താഴെയായിരുന്നു. ഇത്‌ ശ്രദ്ധയിൽപ്പെട്ടതിനെ തുടർന്ന്‌ മുഖ്യമന്ത്രി പിണറായി വിജയൻ സ്ഥലം സന്ദർശിച്ചിരുന്നു. ഇതിന്റെ തുടർച്ചയായാണ്‌ മാവിലായിയിൽ ആവശ്യമായ സ്ഥലം ഏറ്റെടുത്ത് വിപുലമായ സൗകര്യങ്ങളോടെ എ കെ ജി ഹെറിറ്റേജ് സ്ക്വയർ നിർമിക്കാൻ ബജറ്റിൽ 25 കോടി അനുവദിച്ചത്‌.
ഓപ്പൺ എയർ തിയറ്റർ, ഷോപ്പിങ്‌ കിയോസ്‌കുകൾ, കോഫി ഷോപ്പ്, ടോയ്‌ലെറ്റ്, കാർ പാർക്കിങ്ങ് തുടങ്ങി വിവിധ സൗകര്യങ്ങളുള്ള വിശാലമായ ടേക്ക് എ ബ്രേക്ക് സംവിധാനമാണ് ആദ്യഘട്ട പദ്ധതിയിൽ വിഭാവനം ചെയ്തിട്ടുള്ളത്. സഞ്ചാരികൾക്ക് വിശ്രമിക്കാനും സമീപ പ്രദേശങ്ങളിലെ കാഴ്ചകൾ ആസ്വദിക്കാനുംകൂടി ലക്ഷ്യമിട്ടാണ് ഹെറിറ്റേജ് സ്‌ക്വയർ രൂപകൽപ്പന ചെയ്തത്. കരകൗശല വസ്തുക്കളുടെയും കാർഷിക ഉൽപ്പന്നങ്ങളുടെയും വിൽപ്പനയും ലക്ഷ്യമിടുന്നു. ഓപ്പൺ എയർ തിയറ്ററിൽ സാംസ്കാരിക പരിപാടികൾ സംഘടിപ്പിക്കും.
പെരളശേരി എ കെ ജി മ്യൂസിയം, മക്രേരി അമ്പലം, പെരളശേരി അമ്പലം, ചെറുമാവിലായി ഡാം സൈറ്റ് പാർക്ക്, അടി ഉത്സവം നടക്കുന്ന മാവിലാക്കാവ് എന്നിവയൊക്കെ ടൂറിസത്തിന്റെ അനന്തസാധ്യതകളിലേക്കാണ് വാതിൽ തുറന്നിടുന്നത്. സ്വദേശികൾക്കും വിദേശികൾക്കും ഒന്നിച്ചൊത്തുകൂടാനും സാംസ്കാരിക പരിപാടികൾ ആസ്വദിച്ച് സായാഹ്നം ചെലവഴിക്കാനുമുള്ള പൊതുഇടമായി മാവിലായി ഹെറിറ്റേജ് സ്ക്വയർ മാറും.

കണ്ണൂര്‍: ജില്ലാ എംപ്ലോയ്മെന്റ് എക്‌സ്‌ചേഞ്ചിന്റെ കീഴിലുള്ള എംപ്ലോയബിലിറ്റി സെന്ററിന്റെ ആഭിമുഖ്യത്തില്‍ മിനി ജോബ് ഫെയര്‍ സംഘടിപ്പിക്കുന്നു. ലോണ്‍ ഓഫീസര്‍, ടെക്നിഷ്യന്‍ (ഓട്ടോമൊബൈല്‍), സര്‍വീസ് അഡൈ്വസര്‍, ഫീല്‍ഡ് സെയില്‍സ്, സെയില്‍സ് ഓഫീസര്‍, മെയിന്റ്റയിനെന്‍സ് എക്‌സിക്യൂട്ടീവ്, ഡ്രൈവര്‍ (എല്‍ എം വി), അസിസ്റ്റന്റ് സെയില്‍സ് മാനേജര്‍, മോട്ടോര്‍സൈക്കിള്‍ കണ്‍സള്‍റ്റന്റ്, സ്‌പൈര്‍ പാര്‍ട്‌സ് എക്‌സിക്യൂട്ടീവ്, കസ്റ്റമര്‍ റിലേഷന്‍ എക്‌സിക്യൂട്ടീവ്, സി സി ടി വി ടെക്നിഷ്യന്‍, പ്രോഡക്റ്റ് പ്രോക്യോറ്‌മെന്റ്, ഡിജിറ്റല്‍ മാര്‍ക്കറ്റിംഗ്, കാറ്റലോഗ് എക്‌സിക്യൂട്ടീവ്, ഗസ്റ്റ് റിലേഷന്‍ എക്‌സിക്യൂട്ടീവ്, ഫീല്‍ഡ് മാര്‍ക്കറ്റിംഗ് എക്‌സിക്യൂട്ടീവ്, പെര്‍ച്ചസ് എക്‌സിക്യൂട്ടീവ്, ഷോറൂം സെയില്‍സ് തസ്തികകളിലേക്ക് നവംബര്‍ 23ന് രാവിലെ പത്ത് മുതല്‍ ഉച്ചയ്ക്ക് ഒന്ന് വരെ അഭിമുഖം നടത്തും. പ്ലസ് ടു, ഡിഗ്രി, ബി ടെക്ക്/ഡിപ്ലോമ (ഓട്ടോമൊബൈല്‍/ മെക്കാനിക്കല്‍), ഐ ടി ഐ/ഡിപ്ലോമ (ഇലക്ട്രിക്കല്‍/ ഇലക്ട്രോണിക്‌സ്) യോഗ്യതയുള്ളവര്‍ക്ക് പങ്കെടുക്കാം.

ഉദ്യോഗാര്‍ഥികള്‍ തിരിച്ചറിയല്‍ കാര്‍ഡിന്റെ പകര്‍പ്പും 250 രൂപയും പാസ്‌പോര്‍ട്ട് സൈസ് ഫോട്ടോയും സഹിതം എംപ്ലോയബിലിറ്റി സെന്ററില്‍ പേര് രജിസ്റ്റര്‍ ചെയ്ത് അഭിമുഖത്തില്‍ പങ്കെടുക്കണം. നിലവില്‍ രജിസ്റ്റര്‍ ചെയ്ത ഉദ്യോഗാര്‍ഥികള്‍ക്കും രജിസ്ട്രേഷന്‍ സ്ലിപ് കൊണ്ടുവന്ന് പങ്കെടുക്കാം. ഫോണ്‍ : 0497 2707610, 6282942066.

പയ്യന്നൂർ: വനിതാ സിവില്‍ പോലീസ് ഓഫീസറെ ഭര്‍ത്താവ് പെട്രോളൊഴിച്ച് തീക്കൊളുത്തിയ ശേഷം വെട്ടിക്കൊന്നു. ചന്തേര പോലീസ് സ്‌റ്റേഷനിലെ സിവില്‍ പോലീസ് ഓഫീസര്‍ കരിവെള്ളൂര്‍ പലിയേരിയിലെ ദിവ്യശ്രീയെയാണ് കൊലപ്പെടുത്തിയത്. ഭര്‍ത്താവ് രാജേഷ് ഇന്ന് വൈകുന്നേരം 5.45നാണ് വീട്ടിലെത്തി കൊലപാതകം നടത്തിയത്. പരിക്കേറ്റ ദിവ്യശ്രീയുടെ പിതാവ് വാസുവിനെ കണ്ണൂര്‍ ബേബി മെമ്മോറിയൽ ആസ്പത്രിയില്‍ പ്രവേശിപ്പിച്ചു.ഏതാനും നാളുകളായി രാജേഷും ദിവ്യശ്രീയും അകല്‍ച്ചയിലായിരുന്നു. കൃത്യം നടത്തിയശേഷം ഓടിരക്ഷപ്പെട്ട ഭര്‍ത്താവ് രാജേഷിനായി തെരച്ചില്‍ തുടരുകയാണ്.