ഗൂഗിളിന്റെ ചാറ്റ് ബോട്ട് ‘ബാര്‍ഡ്’ പൊതുജനങ്ങള്‍ക്ക് ലഭ്യമാക്കി
ഓപ്പണ്‍ എ.ഐയുടെ ചാറ്റ് ജിപിടിയുമായെത്തിയ മൈക്രോസോഫ്റ്റിനെ നേരിടാനായി ഗൂഗിള്‍ അവതരിപ്പിച്ച ബാര്‍ഡ് എന്ന ചാറ്റ് ബോട്ട് ഇപ്പോള്‍ കൂടുതല്‍ ആളുകളിലേക്ക്.
ബാര്‍ഡ് ഉപയോഗിക്കാന്‍ ആഗ്രഹമുള്ളവര്‍ക്ക് ഇപ്പോള്‍ അതിന് സാധിക്കും. ചാറ്റ് ജിപിടി ചെയ്തത് പോലെ ലോഗിന്‍ ചെയ്യുന്നവരെ വെയ്റ്റ് ലിസ്റ്റില്‍ ഉള്‍പ്പെടുത്തിയാണ് ബാര്‍ഡ് സേവനം തുറന്നുകൊടുക്കുന്നത്.
എതിരാളിയായ മൈക്രോസോഫ്റ്റ് പ്രധാന നിക്ഷേപകരായ ഓപ്പണ്‍ എഐ നിര്‍മിച്ച ചാറ്റ് ജിപിടി സേവനം ഇതിനകം ജനശ്രദ്ധ പിടിച്ചുപറ്റിക്കഴിഞ്ഞിട്ടുണ്ട്. മൈക്രോസോഫ്റ്റിന്റെ എഡ്ജ് ബ്രൗസറിലും ഗൂഗിള്‍ സെര്‍ച്ചിന്റെ എതിരാളിയായ ബിങ് ബ്രൗസറിലും ജിപിടി-4 അടിസ്ഥാനമാക്കിയുള്ള ചാറ്റ് ബോട്ടുകള്‍ ഇതിനകം അവതരിപ്പിച്ചുകഴിഞ്ഞു.
ഇത് ഗൂഗിളിന്റെ പ്രധാന വരുമാന സ്രോതസ്സായ ഗൂഗിള്‍ സെര്‍ച്ച്, ക്രോം ബ്രൗസര്‍ എന്നിവയെ ബാധിച്ചേക്കാമെന്ന ഭീഷണി നിലനില്‍ക്കെയാണ് ബാര്‍ഡുമായുള്ള രംഗപ്രവേശം.
