പ്രായപൂര്‍ത്തിയാകാത്ത മകന് കാര്‍ ഓടിക്കാന്‍ കൊടുത്ത പിതാവിന് 30,250 രൂപ പിഴ
പ്രായപൂര്‍ത്തിയാകാത്ത മകന് കാര്‍ ഓടിക്കാന്‍ നല്‍കിയതിന് ആര്‍.സി. ഉടമയായ പിതാവിന് 30,250 രൂപ കോടതി പിഴ ചുമത്തി.
പുളിക്കല്‍ വലിയപറമ്പ് നെടിയറത്തില്‍ ഷാഹിനാണ് മഞ്ചേരി ചീഫ് ജുഡീഷ്യല്‍ മജിസ്ട്രേറ്റ് കോടതി പിഴയിട്ടത്. കഴിഞ്ഞ സെപ്റ്റംബര്‍ 24-നായിരുന്നു കേസിനാസ്പദമായ സംഭവം.
വിമാനത്താവള റോഡില്‍ കാലിക്കറ്റ് എയര്‍പോര്‍ട്ട് പ്ലാസ ജങ്ഷനില്‍ പരിശോധന നടത്തുന്നതിനിടെ കരിപ്പൂര്‍ പോലീസാണ് പ്രായപൂര്‍ത്തിയാകാത്തയാള്‍ കാര്‍ ഓടിക്കുന്നത് പിടികൂടിയത്. ഷാഹിന്റെ പതിനേഴുകാരനായ മകനായിരുന്നു കാര്‍ ഓടിച്ചിരുന്നത്.
കാര്‍ തടഞ്ഞുനിര്‍ത്തിയ എസ്.ഐ. അബ്ദുള്‍നാസര്‍ പട്ടര്‍ക്കടവന്‍ ആര്‍.സി. ഉടമയായ ഷാഹിന്റെ പേരില്‍ കേസെടുക്കുകയായിരുന്നു. ഷാഹിന്‍ പിഴയൊടുക്കി കേസില്‍ നിന്നൊഴിവായി.
