കേളകം : മന്ത്രിമാരും ഉദ്യോഗസ്ഥരും വരുമ്പോൾ കൂടെനിന്ന് ഫോട്ടോയെടുത്ത് സോഷ്യൽ മീഡിയയിൽ പോസ്റ്റ് ചെയ്യാനല്ലാതെ പഞ്ചായത്ത് പ്രസിഡന്റ് ആന്റണി സെബാസ്റ്റ്യന് ജനങ്ങളുടെ ദുരിതം അവസാനിപ്പിക്കുന്നതിന് യാതൊരുവിധ താല്പര്യവുമില്ലെന്ന് കോൺഗ്രസ് കണിച്ചാർ മണ്ഡലം കമ്മിറ്റി കുറ്റപ്പെടുത്തി.

കണിച്ചാർ, കോളയാട് പഞ്ചായത്തുകളുടെ ഭാഗമായ പൂളക്കുറ്റി, നെടുംപുറംചാൽ പ്രദേശങ്ങളിൽ 2022 ഓഗസ്റ്റ് ഒന്നിനുണ്ടായ ഉരുൾപൊട്ടലിൽ നാശനഷ്ടമുണ്ടായവർക്ക് എത്രയും വേഗം നഷ്ടപരിഹാരം നൽകണമെന്നും കോൺഗ്രസ് ആവശ്യപ്പെട്ടു.ഇക്കാര്യമാവശ്യപ്പെട്ട് വെള്ളിയാഴ്ച കണിച്ചാർ വില്ലേജ് ഓഫീസിന് മുൻപിൽ ധർണ്ണ നടത്തുമെന്നും നേതാക്കൾ പത്രസമ്മേളനത്തിൽ പറഞ്ഞു.

സർക്കാർ കണക്കിൽ 38 കോടിയും പഞ്ചായത്ത് കണക്കിൽ 65 കോടിയുമാണ് നാശനഷ്ടം കണക്കാക്കിയിരിക്കുന്നത്.കണക്കുകളിലെ അന്തരം പോലും പഞ്ചായത്തും സർക്കാർ വകുപ്പുകളും തമ്മിലുള്ള ഏകോപനമില്ലായ്മയാണ് വെളിവാക്കുന്നത്. നഷ്ടപരിഹാര തുകയുടെ ഒരു ശതമാനം പോലും വിതരണം ചെയ്യാൻ വകുപ്പുകൾക്ക് സാധിച്ചിട്ടില്ല. കണിച്ചാർ മണ്ഡലം പ്രസിഡന്റ് ചാക്കോ തൈക്കുന്നേൽ, മുൻ മണ്ഡലം പ്രസിഡന്റ് മൈക്കിൾ .ടി .മാലത്ത്, വാർഡ് മെമ്പർ ജിഷ സജി, ജോജൻ എടത്താഴെ, ജോർജ് നെടുമാട്ടുംകര, ജിബിൻ ജെയ്‌സൺ തുടങ്ങിയവർ പത്രസമ്മേളനത്തിൽ പങ്കെടുത്തു.