കണിച്ചാർ: പൂളക്കുറ്റി മേഖലയിലുണ്ടായ ഉരുൾപൊട്ടലിനെത്തുടർന്ന് വിവിധ വകുപ്പുകൾ നടത്തിയദുരന്ത നിവാരണ പ്രവർത്തനങ്ങളുടെ അവലോകന യോഗം പഞ്ചായത്തിൽ നടന്നു.സംസ്ഥാന ദുരന്ത നിവാരണ അതോറിറ്റി സമർപ്പിച്ച റിപ്പോർട്ട് യോഗത്തിൽ ചർച്ച ചെയ്തു.റിപ്പോർട്ടിലെ ഇരുപതിന നിർദേശങ്ങൾ മുഴുവനും നടപ്പിലാക്കാൻ യോഗത്തിൽ തീരുമാനമായി.

ദുരന്ത നിവാരണ അതോറിറ്റി പ്രധാനമായും ചൂണ്ടിക്കാട്ടിയ പാറമടകളുമായി ബന്ധപ്പെട്ട ഏഴ് നിർദേശങ്ങൾ അടിയന്തരമായി നടപ്പിലാക്കും.ഇതുമായി ബന്ധപ്പെട്ട വകുപ്പ് മേധാവികൾക്ക് തുടർ നടപടികൾ സ്വീകരിക്കാൻ എ.ഡി.എം.കെ.കെ.ദിവാകരൻ നിർദേശം നല്കി.പാറമടകൾക്ക് ഏർപ്പെടുത്തിയ നിരോധനം തുടരും.രണ്ട് പാറമടകളിലും അംഗീകൃത ഏജൻസിയെക്കൊണ്ട് ബ്ലാസ്റ്റിംഗ് ടെസ്റ്റ് നടത്തിക്കും.പാറമടയിലെ അനധികൃത നിർമിതികൾ പൊളിച്ചുമാറ്റി ഒഴുക്ക് തടസ്സപ്പെടുത്തിയ നീർച്ചാൽ അടിയന്തരമായി പൂർവസ്ഥിതിയിലാക്കും.

പ്രദേശത്ത് പഞ്ചായത്ത് സ്ഥലം ലഭ്യമാക്കുന്ന മുറക്ക് മഴമാപിനി,സ്വയം പ്രവർത്തിക്കുന്ന കാലാവസ്ഥാ നിരീക്ഷണ സംവിധാനം,നദിയിൽ വെള്ളത്തിന്റെ നില രേഖപ്പെടുത്തുന്ന സ്വയം നിയന്ത്രിത യന്ത്രങ്ങൾ എന്നിവ സ്ഥാപിക്കും.ആവശ്യമായ സ്ഥലസൗകര്യം ലഭ്യമാക്കുമെന്ന് പഞ്ചായത്ത് പ്രസിഡന്റ് ആന്റണി സെബാസ്റ്റ്യൻ യോഗത്തിൽ ഉറപ്പ് നല്കി.

പ്രദേശത്തെ തോടുകൾക്കും നദികൾക്കും ജൈവവേലികൾ നിർമിക്കാനും കയർഭൂവസ്ത്രം സ്ഥാപിക്കാനും തീരുമാനമായി.ഉരുൾപൊട്ടൽ മേഖലയിലെ കുന്നിൻ ചെരിവുകളിലുള്ള വഴികളിൽ അടിഞ്ഞുകൂടിയ വലിയ പാറകൾ ഉടൻ നീക്കം ചെയ്യും.പ്രദേശത്ത് ജീവിക്കുന്നതിൽ ആശങ്കയുണ്ടാക്കുന്ന തരത്തിൽ കാലാവസ്ഥാ പ്രവാചകർ നടത്തിയ പ്രസ്താവനകളിൽ പ്രദേശത്തെ ജനങ്ങളിലുണ്ടായ ഭീതി കുറക്കാനാവശ്യമായ ബോധവത്കരണ ക്ലാസ് സംഘടിപ്പിക്കാനും തീരുമാനിച്ചു.ദുരന്തബാധിതരിൽ നഷ്ടപരിഹാരത്തിന് യഥാസമയം അപേക്ഷിക്കാൻ സാധിക്കാത്തവർക്കായി വീണ്ടും അവസരം നല്കാനും ഇക്കാര്യത്തിലാവശ്യമായ നടപടി സ്വീകരിക്കാനും പഞ്ചായത്തധികൃതർക്ക് എ.ഡി.എം നിർദേശം നല്കി.

പൂർണമായും തകർന്ന പൂളക്കുറ്റി കുടുംബക്ഷേമ ഉപകേന്ദ്രം പുതിയ സ്ഥലം കണ്ടെത്തി ആധുനിക സൗകര്യങ്ങളോടെ നിർമിക്കും.ഇതിനാവശ്യമായ സ്ഥലം പഞ്ചായത്ത് ഏറ്റെടുത്ത് നൽകും.യോഗത്തിൽ പേരാവൂർ ബ്ലോക്ക് പ്രസിഡന്റ് കെ.സുധാകരൻ അധ്യക്ഷത വഹിച്ചു.എ.ഡി.എം.കെ.കെ.ദിവാകരൻ,ജില്ലാ ദുരന്ത നിവാരണ അതോറിറ്റിചെയർമാനും ഡെപ്യൂട്ടി കളക്ടറുമായ ജോസഫ്,കണിച്ചാർ പഞ്ചായത്ത് പ്രസിഡന്റ് ആന്റണി സെബാസ്റ്റ്യൻ,ജില്ലാ പഞ്ചായത്തംഗം വി.ഗീത,പഞ്ചായത്ത് വൈസ്.പ്രസിഡന്റ് ഷാന്റി തോമസ് തുടങ്ങിയവർ സംസാരിച്ചു.റവന്യൂ,പി.ഡബ്ല്യു.ഡി പാലങ്ങളും കെട്ടിടങ്ങളും വിഭാഗം,മണ്ണ് സംരക്ഷണം,എൽ.എസ്.ജി.ഡി,മൈനർ ഇറിഗേഷൻ,കെ.എസ്.ഇ.ബി,ആരോഗ്യം,മൃഗസംരക്ഷണ വിഭാഗം തുടങ്ങി മുഴുവൻ വകുപ്പുകളുടെയും ഉന്നത ഉദ്യോഗസ്ഥർ യോഗത്തിൽ സംബന്ധിച്ചു.