12 കിലോ കഞ്ചാവുമായി രണ്ടു പേർ പിടിയിൽ
കോഴിക്കോട്: ജില്ലയിലെ വിവിധ ഭാഗങ്ങളിൽ കഞ്ചാവ് എത്തിച്ചു നൽകുന്ന സംഘത്തിലെ രണ്ടുപേർ പിടിയിൽ. ചക്കുംകടവ് സ്വദേശി ചെന്നലേരി പറമ്പ് വീട്ടിൽ സലീം എന്ന വെംബ്ലി സലീം (42), മീഞ്ചന്ത ചെമ്മലശ്ശേരി വയൽ നൗഫൽ (44) എന്നിവരാണ് പന്ത്രണ്ട് കിലോഗ്രാം കഞ്ചാവുമായി കണ്ണംപറമ്പിൽ പിടിയിലായത്.
പോലീസ് വളരെ കാലമായി ഇയാളെ നിരീക്ഷിച്ചുവരികയായിരുന്നു. അതിനിടയ്ക്ക് ഇയാൾ ആന്ധ്രയിൽ നിന്നും വൻതോതിൽ കഞ്ചാവ് ജില്ലയിലേക്ക് എത്തിക്കുന്നതായി പോലീസിന് വിവരം ലഭിച്ചു. പോലീസിനെ കബളിപ്പിക്കാൻ ഫോണുമായി ട്രെയിനുകൾ മാറിക്കയറിയും ഫോൺ ഓഫാക്കിയും അന്വേഷണം വഴിതെറ്റിക്കാൻ ശ്രമിച്ചെങ്കിലും കണ്ണംപറമ്പിൽ വെച്ച് പിടിയിലാവുകയായിരുന്നു.
കൂടെയുണ്ടായിരുന്ന നൗഫൽ പുഴയിൽ ചാടി രക്ഷപ്പെടാൻ ശ്രമിച്ചെങ്കിലും നാട്ടുകാരുടെ സഹായത്തോടെ പിടികൂടി. പിടിയിലായ സലീം വിവിധ സ്റ്റേഷനുകളിൽ ബ്രൗൺഷുഗർ, കഞ്ചാവ് മുതലായ വിവിധ നിരോധിത ലഹരി ഉത്പ്പന്നങ്ങൾ കടത്തിക്കൊണ്ടുവന്ന മൂന്നോളം ലഹരിമരുന്ന് നിരോധന നിയമ പ്രകാരമുള്ള കേസുകളിലും, എട്ടോളം മാല പിടിച്ചുപറി കേസുകളിലും മോഷണ കേസുകളിലും അടിപിടികേസുകളിലും പ്രതിയാണ്.
