സ്ഥിരമായി കടയിൽ നിന്നും പണം മോഷ്ടിക്കുന്ന പോലീസുകാരന്‍ പിടിയില്‍
നെടുങ്കണ്ടം: കടയില്‍ നിന്ന് സ്ഥിരമായി പണം മോഷ്ടിച്ചിരുന്ന പൊലീസുകാരന്‍ പിടിയില്‍.എന്നാല്‍ കടയുടമ അറിയിച്ചതനുസരിച്ച്‌ എത്തിയവര്‍ ഇദ്ദേഹത്തെ പിടിച്ചു നിര്‍ത്തിയതോടെ 40,000 രൂപ നഷ്ടപരിഹാരം നല്‍കി രക്ഷപ്പെട്ടു.
പാമ്പനാർ ടൗണിലെ വ്യാപാര സ്ഥാപനത്തില്‍നിന്നാണ് പൊലീസുകാരന്‍ 1000രൂപ മോഷ്ടിച്ചത്. പൊലീസ് അസോ. ജില്ല ഭാരവാഹിയാണ് കടയിലെ പണപ്പെട്ടിയില്‍നിന്ന് കൈയിട്ടുവാരിയത്. സ്പെഷല്‍ ബ്രാഞ്ച് വിവരമറിഞ്ഞെങ്കിലും അവരും കേസ് ഒതുക്കിയതായി പറയുന്നു. ‘കള്ളനായ’ പൊലീസുകാരന്‍ ഇപ്പോള്‍ ശബരിമല സ്പെഷല്‍ ഡ്യൂട്ടിയിലാണ്.
കഴിഞ്ഞ 24നാണ് സംഭവം. ഒരിക്കല്‍ നിരോധിത പുകയില ഉല്‍പന്നങ്ങള്‍ ഈ കടയില്‍നിന്ന് പിടിച്ചെടുത്തിരുന്നു. അന്നുമുതലാണ് ഇയാള്‍ സ്ഥിരം സന്ദര്‍ശകനായത്. പൊലീസുകാരന്‍ വന്നു പോയിക്കഴിഞ്ഞാല്‍ പണപ്പെട്ടിയില്‍ പണം കുറയുന്നതായി സംശയം തോന്നിയ കടയുടമ ഇയാളെ രഹസ്യമായി നിരീക്ഷിക്കാന്‍ തുടങ്ങി. പതിവുപോലെ പണപ്പെട്ടിയില്‍നിന്ന് 1000 രൂപ മോഷ്ടിക്കുകയായിരുന്നു. തുടര്‍ന്നാണ് കൈയോടെ പിടികൂടിയത്.
