പെരിങ്ങോം : കുട്ടികളെ കിട്ടിയില്ല, 14.7 കോടി രൂപ മുടക്കി മോഡൽ റസിഡൻഷ്യൽ സ്കൂളിനായി നിർമിച്ച കെട്ടിടം കാടുകയറി. കിഫ്ബി വഴി അനുവദിച്ച പണം ഉപയോഗിച്ച് പട്ടികജാതി വികസന വകുപ്പ് പെരിങ്ങോം വില്ലേജിൽ എസ്ടി വകുപ്പിന്റെ 10 ഏക്കർ ഭൂമിയിൽ നിർമിച്ച കെട്ടിട സമുച്ചയങ്ങളാണ് പൂട്ടിയിട്ടിരിക്കുന്നത്. രണ്ടു മന്ത്രിമാരുടെ സാന്നിധ്യത്തിൽ 2021 ഫെബ്രുവരി 11നു മുഖ്യമന്ത്രി പിണറായി വിജയൻ ഓൺലൈനായാണ് ഉദ്ഘാടനം നിർവഹിച്ചത്. രണ്ട് അധ്യയന വർഷാരംഭങ്ങൾ പിന്നിട്ടിട്ടും കുട്ടികൾ ഇല്ലാത്തതിനാൽ ക്ലാസ് തുടങ്ങാൻ സാധിച്ചിട്ടില്ല.

കെട്ടിട സൗകര്യവും തസ്തികകളും സൃഷ്ടിച്ചിട്ടും ക്ലാസ് തുടങ്ങാൻ കഴിയാത്തതു സംബന്ധിച്ച് ടി.വി.മധുസൂദനൻ എംഎൽഎ നിയമസഭയിൽ രണ്ടു തവണ നിയമസഭയിൽ ചോദ്യമുയർത്തിയപ്പോഴും കുട്ടികളെ കിട്ടിയില്ലെന്ന മറുപടിയാണു പട്ടികവിഭാഗ മന്ത്രി കെ.രാധാകൃഷ്ണൻ ആവർത്തിച്ചത്. മാധ്യമങ്ങൾ വഴിയും പട്ടികജാതി വികസന ഓഫിസർമാർ, എസ്‌സി പ്രമോട്ടർമാർ എന്നിവർ വഴിയും വിദ്യാർഥികളെ കണ്ടെത്താൻ ശ്രമം നടത്തിയെങ്കിലും 3 വിദ്യാർഥികൾ മാത്രമാണ് അപേക്ഷിച്ചത്. കാസർകോട് ജില്ലയിലെ വെള്ളച്ചാലിലും തളിപ്പറമ്പ് പട്ടുവത്തും 2 മോഡൽ റസിഡൻഷ്യൽ സ്കൂളുകൾ പ്രവർത്തിക്കുന്നതിനാൽ കുട്ടികളെ കിട്ടാൻ പ്രയാസമാണെന്നും മന്ത്രി നിയമസഭയിൽ നൽകിയ മറുപടിയിൽ പറയുന്നു.

തൊട്ടടുത്ത് 2 റസി‍ഡൻഷ്യൽ സ്കൂളുകൾ പ്രവർത്തിക്കുമ്പോൾ പിന്നെ എന്തിനാണു കോടികൾ മുടക്കി കെട്ടിടം നിർമിച്ച് പൂട്ടിയിട്ടിരിക്കുന്നതെന്ന ചോദ്യത്തിനു മാത്രം കൃത്യമായ മറുപടിയില്ല. പട്ടികവർഗ വകുപ്പിനു കീഴിൽ കിഫ്ബി വഴി തന്നെ 17.39 കോടി രൂപ ചെലവിട്ട് മാസങ്ങൾക്കു മുൻപ് നിർമാണം പൂർത്തിയാക്കിയ ആറളം ഫാമിലെ മറ്റൊരു റസിഡൻഷ്യൽ സ്കൂൾ കെട്ടിടം കൂടി ഉദ്ഘാടകനെ കാത്തു അടഞ്ഞുകിടപ്പുണ്ട്.

210 വിദ്യാർഥികൾക്ക് പഠിക്കാൻ സൗകര്യം

11 ക്ലാസ് മുറികളുള്ള കെട്ടിടത്തിൽ 210 കുട്ടികൾക്ക് പഠിക്കാൻ സൗകര്യമുണ്ട്. 2,342 ചതുരശ്രമീറ്റർ വിസ്തീർണമുള്ള രണ്ടുനില കെട്ടിടത്തിൽ ഹോസ്റ്റൽ, 210 പേർക്ക് ഇരിക്കാവുന്ന കന്റീൻ, 6 കുടുംബങ്ങൾക്കു താമസിക്കാവുന്ന സ്റ്റാഫ് ക്വാർട്ടേഴ്‌സ് എന്നിവയുമുണ്ട്.