തൃശ്ശൂര്‍: ബെംഗളൂരുവിലെ സാറ്റലൈറ്റ് ബസ്സ്റ്റാന്‍ഡില്‍ നിര്‍ത്തിയിട്ടിരുന്ന കെ.എസ്.ആര്‍.ടി.സി. ഡീലക്‌സ് ബസില്‍ നിന്ന് ചില സാധനങ്ങളെടുക്കാന്‍ ചെന്നതായിരുന്നു മായനും ജോസഫും. അന്ന് രാത്രി 11-ന് പുറപ്പെടേണ്ട ബസില്‍ തൃശ്ശൂര്‍ ബോര്‍ഡ് വെച്ച് തിരിച്ചിറങ്ങുമ്പോള്‍ രണ്ട് ആണ്‍കുട്ടികള്‍ വന്ന് ചോദിച്ചു- ഇത് തൃശ്ശൂര്‍ക്ക് പോകുമോ ചേട്ടാ…?

”ഇത് രാത്രി പുറപ്പെടുന്ന ബസാണ്. ഇപ്പോള്‍ മണി രണ്ടല്ലേ ആയുള്ളൂ. ഇതിന് മുന്നേ തൃശ്ശൂര്‍ക്ക് പോകുന്ന ബസുണ്ടാകും. കൗണ്ടറില്‍ ചോദിച്ചോളൂ.” ഉത്തരം കേട്ട് മടങ്ങുന്ന കുട്ടികളുടെ മുഖത്തെ നൈരാശ്യം കലര്‍ന്ന ആശങ്ക ഇരുവരും ശ്രദ്ധിച്ചു. ആ ശ്രദ്ധ ചെന്നെത്തിയത്, തൃശ്ശൂരില്‍ നിന്ന് ഒളിച്ചോടി ബെംഗളൂരുവിലെത്തി പകച്ചുപോയ രണ്ട് സ്‌കൂള്‍ വിദ്യാര്‍ഥികളെ നാട്ടിലെത്തിച്ച നന്മയിലേക്കാണ്. തൃശ്ശൂര്‍ കെ.എസ്.ആര്‍.ടി.സി. ഡിപ്പോയിലെ ഡ്രൈവര്‍ കം കണ്ടക്ടര്‍മാരായ ചാലക്കുടിയിലെ എസ്. മായനും കുന്നംകുളത്തെ ജോസഫ് ഐസക്കുമാണ് കുട്ടികള്‍ക്ക് തുണയായത്.

തൃശ്ശൂരിലേക്ക് വേറെ ബസുണ്ടോയെന്ന് ചോദിക്കാന്‍ കൗണ്ടറിലേക്ക് പോയ കുട്ടികളെ മായനും ജോസഫും നിരീക്ഷിച്ചു. കൗണ്ടറില്‍നിന്ന് മറുപടി കിട്ടി മടങ്ങിയ കുട്ടികള്‍ കസേരയിലിരുന്ന് പഴ്‌സ് തുറന്ന് ചില്ലറപ്പൈസ എണ്ണുന്നതാണ് കണ്ടത്. തൃശ്ശൂര്‍ ഏനാമാവില്‍ നിന്ന് 12-ന് കാണാതായ രണ്ട് പത്താംക്ലാസ് വിദ്യാര്‍ഥികള്‍ തന്നെയാണ് ഇവരെന്ന് ഉറപ്പിക്കാന്‍ വാട്‌സാപ്പ് ഗ്രൂപ്പില്‍ വന്ന ചിത്രങ്ങള്‍ നോക്കി.

തൃശ്ശൂര്‍ ഡിപ്പോയുമായി ബന്ധപ്പെട്ട് പാവറട്ടി പോലീസ് സ്റ്റേഷന്‍ ഇന്‍സ്പെക്ടര്‍ രമേഷിന്റെ നമ്പറെടുത്തു. അദ്ദേഹത്തോട് കാര്യം പറഞ്ഞു. കുട്ടികള്‍ മറ്റെവിടേയും പോകാതെ നോക്കണമെന്ന് അദ്ദേഹം ആവശ്യപ്പെട്ടു. കുട്ടികളെ കണ്ടെത്തിയെന്നറിഞ്ഞ് ബന്ധുക്കളുടെ നിര്‍ത്താത്ത വിളിയായിരുന്നു മായന്റേയും ജോസഫിന്റേയും ഫോണുകളിലേക്ക്.

ബെംഗളൂരു മലയാളിസമാജം പ്രവര്‍ത്തകര്‍ സഹായിച്ചു. 13-ന് രാത്രി 11-ന് പുറപ്പെട്ട ബസില്‍ കുട്ടികളെ നാട്ടിലെത്തിച്ചു. എല്ലാ സീറ്റുകളും ബുക്കിങ് ആയിരുന്നതിനാല്‍ കുട്ടികളില്‍ ഒരാള്‍ക്ക് കണ്ടക്ടറുടെ സീറ്റും മറ്റൊരാള്‍ക്ക് ഡ്രൈവറുടെ സമീപമുള്ള പെട്ടി സീറ്റും നല്‍കി. ഫുട്‌ബോള്‍ ഭ്രമം മൂത്ത് ഗോവന്‍ ടീമില്‍ ചേരാനായി േപായതാണെന്നാണ് കുട്ടികള്‍ നല്‍കിയ മൊഴി.