ഇരിട്ടി : റോഡ് യാത്ര സുരക്ഷിതമാക്കാൻ കർശന പരിശോധനയുമായി രംഗത്തിറങ്ങിയ മോട്ടർ വാഹന വകുപ്പ് സംഘത്തിനു മുന്നിൽ എത്തിയത് 2 വർഷം ആയി ടാക്സ്, ഇൻഷുറൻസ്, ഫിറ്റ്നസ് എന്നിവ ഇല്ലാതെ സർവീസ് നടത്തിയ ടൂറിസ്റ്റ് ബസ്. മട്ടന്നൂർ ഭാഗത്തു നിന്ന് ഇരിട്ടിയിലേക്ക് ഓടുകയായിരുന്ന ടൂറിസ്റ്റ് ബസ് അസിസ്റ്റന്റ് മോട്ടർ വെഹിക്കിൾ ഇൻസ്പെക്ടർ വി.ആർ. ഷനിൽകുമാറിന്റെ നേതൃത്വത്തിലു ള്ള സംഘം അണു പിടികൂടിയത്. ഉടമയിൽ നിന്ന് 14500 രൂപ പിഴ ഈടാക്കി.

‘ഓപ്പറേഷൻ ഫോക്കസി’ന്റെ ഭാഗമായി കഴിഞ്ഞ 3 ദിവസം ആയി നടത്തിവരുന്ന പരിശോധനയിൽ ഇരിട്ടി ജോയിന്റ് ആർടിഒ പരിധിയിൽ വാഹന നിയമ ലംഘകരിൽ നിന്ന് 2 ലക്ഷം രൂപയോളം പിഴ ഈടാക്കി. ഹെൽമറ്റ് ധരിക്കാതെ ഇരുചക്ര വാഹനത്തിൽ യാത്ര ചെയ്തവരെ പിടികൂടി. പെർമിറ്റ് എടുക്കാതെ നിരത്തിലിറങ്ങിയ 5 വാഹനങ്ങളും ടാക്സ് അടക്കാതെ ഓടിയ 15 വാഹനങ്ങളും റജിസ്ട്രേഷൻ ഇല്ലാതെ ഓടിയ 6 വാഹനങ്ങളും എക്സ്ട്രാ ലൈറ്റുകൾ ഘടിപ്പിച്ച 15 ഓളം വാഹനങ്ങളും ലൈസൻസില്ലാതെ വാഹനവുമായി ഇറങ്ങിയ 5 പേരെയും മോട്ടർ വാഹന വകുപ്പ് പിടികൂടി. ഇരിട്ടി ജോയിന്റ് ആർടിഒ ബി.സാജു, മോട്ടർ വെഹിക്കിൾ ഇൻസ്പെക്ടർ ടി.വൈകുണ്ഠൻ, അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർമാരായ വി.ആർ.ഷനൽ കുമാർ, ഡി.കെ.ഷീജി എന്നിവരുടെ നേതൃത്വത്തിലാണ് പരിശോധന നടത്തിയത്.

ടാക്സ് ഇളവിനു വേണ്ടി എന്ന നിലയിൽ കയറ്റിയിട്ട വണ്ടിയാണ് റോഡിൽ സർവീസ് നടത്തുന്നതു കണ്ടെത്തിയത്. ഇത്തരത്തിൽ കയറ്റി ഇടുന്ന വണ്ടി മോട്ടർ വാഹന വകുപ്പിന്റെ അനുമതിയോടെ കെട്ടി വലിച്ചോ മറ്റൊരു വാഹനത്തിലോ മാത്രമേ റോഡിലൂടെ കൊണ്ടു പോകാൻ പാടുള്ളൂ എന്നാണു നിയമം എന്നു അധികൃതർ പറഞ്ഞു. അതിനാൽ ഇരട്ട നികുതി സർക്കാരിലേക്കു അടപ്പിക്കേണ്ട കുറ്റകൃത്യം ആണെന്നും മോട്ടർ വാഹന വകുപ്പ് ചൂണ്ടിക്കാട്ടി. മേഖലയിൽ വരും ദിവസങ്ങളിലും വാഹന പരിശോധന ശക്തമായി തുടരും.