കണ്ണൂർ: പപ്പായയും കാരറ്റും ഷമാമും കട്ടപ്പാലും അലിഞ്ഞൊന്നാവുന്ന സ്‌മൂത്തിയിൽ മേമ്പൊടിക്കായി അനാറും മുന്തിരിയും കശുവണ്ടിയും ബദാമും ഈത്തപ്പഴവും. കണ്ടാൽതന്നെ ഫുഡീസിന്റെ നാവിൽ കപ്പലോട്ടുന്ന കോക്‌ടെയിൽ കഴിച്ചുകഴിഞ്ഞാൽ വയറും മനസും നിറയ്‌ക്കുമെന്നുറപ്പ്‌.
രുചിവിപണിയിൽ ട്രെൻഡുകൾ മാറി മറഞ്ഞിട്ടും മാറ്റമില്ലാതെ തുടരുകയാണ്‌ കോക്‌ടെയിലിന്റെ രാജയോഗം. വെയിലായാലും മഴയായാലും കണ്ണൂരിലെ ജ്യൂസ് വിപണിയിൽ കോക്‌ടെയിൽ തന്നെയാണ്‌ താരം. പ്രായഭേദമന്യേ കോക്‌ടെയിലിന്റെ രുചിതേടി എത്തുന്നവർ നഗരത്തിലെ ജ്യൂസ് കോർണറുകളെ എന്നും തിരക്കുള്ളതാക്കുന്നു. കാൽടെക്സിലെയും പ്രസ് ക്ലബ്‌ റോഡിലെയും ജ്യൂസ് കടകളിൽ രാവിലെ മുതൽ രാത്രി കട അടക്കുന്നതുവരെ വൻതിരക്കാണ്.
സ്ഥിരം കസ്റ്റമേഴ്സിനെ കൂടാതെ ദിനംപ്രതി ഒട്ടനവധിപേരാണ് കോക്‌ടെയിൽ മധുരം നുണയാൻ കണ്ണൂരിലെത്തുന്നത്. കണ്ണൂർ കോക്‌ടെയിലിന്റെ പെരുമ കേട്ടറിഞ്ഞ്‌ ഇതര ജില്ലക്കാരും എത്താറുണ്ട്. വൈകുന്നരേങ്ങളിലും അവധിദിനങ്ങളിലും കോക്‌ടെയിൽ കുടിക്കാൻ എത്തുന്നവരുടെ എണ്ണം സാധാരണ ദിവസങ്ങളിലേക്കാളും ഇരട്ടിയാകും.
60 രൂപയാണ് കോക്‌ടെയിലിന്റെ വില. ഓരോ കടക്കാർക്കും കോക്‌ടെയ്‌ലിന്‌ രുചികൂട്ടാൻ പ്രത്യേകം ചേരുവകളുണ്ട്‌. പാൽ, അണ്ടിപ്പരിപ്പ്, ബദാം, ഉണക്കുമുന്തിരി തുടങ്ങിയവ ചേർത്തുണ്ടാക്കുന്ന ‘കടി’ഷെയ്ക്കാണ്‌ കോക്‌ടെയിലിനൊപ്പം രുചിമത്സരത്തിനുള്ളത്‌.