കോഴിക്കോട്: മോട്ടോർ വാഹന വകുപ്പ് എൻഫോഴ്സ്മെന്റ് നേതൃത്വത്തിൽ 5 ദിവസമായി ജില്ലയിൽ നടക്കുന്ന വാഹന പരിശോധനയിൽ കെ എസ് ആർ ടി സി ബസുകൾക്കെതിരെയും നടപടി. വേഗപ്പൂട്ടിൽ കൃത്രിമം കാണിച്ചും വേഗപ്പൂട്ടില്ലാതെയുമാണ് ചില കെ എസ് ആർ ടി സി ബസുകൾ സർവീസ് നടത്തുന്നതെന്നു എൻഫോഴ്സ്മെന്റ് ഉദ്യോഗസ്ഥർ കണ്ടെത്തി. പരിശോധിച്ച 10 ബസുകളിൽ 5 എണ്ണവും നിയമം ലംഘിച്ചാണ് സർവീസ് നടത്തുന്നത്. എൻഫോഴ്സ്മെന്റ് ഉദ്യോഗസ്ഥർ കെ എസ് ആർ ടി സി ബസ് ജീവനക്കാർക്ക് നോട്ടിസ് നൽകി. ഇന്നലെ മൊഫ്യുസൽ ബസ് സ്റ്റാൻഡിൽ 9 ബസുകൾക്കെതിരെ നടപടി എടുത്തു. സ്വകാര്യ ബസ് തൊഴിലാളികളും ഉടമകളും പരിശോധന തടസ്സപ്പെടുത്തുകയും കെ എസ് ആർ ടി സി ബസുകൾ പരിശോധിക്കണമെന്ന് ആവശ്യപ്പെടുകയും ചെയ്തു.

ഉച്ചയോടെ കെ എസ് ആർ ടി സി സ്റ്റാൻഡിൽ നടത്തിയ പരിശോധനയിലാണ് നിയമ ലംഘനം കണ്ടെത്തിയത്. വിവിധ ഡിപ്പോയിൽ നിന്ന് എത്തിയ ദീർഘദൂര ബസുകളാണ് പരിശോധിച്ചത്. 5 ബസുകൾക്ക് വേഗപ്പൂട്ടില്ല. ചില ബസുകൾ വേഗപ്പൂട്ടിൽ കൃത്രിമം കാണിച്ചു. വേഗപ്പൂട്ടില്ലാത്ത ബസുകൾക്ക് നോട്ടിസ് നൽകി. 2 ദിവസത്തിനകം വേഗപ്പൂട്ട് ഘടിപ്പിക്കാനും ശേഷം അതത് ആർ ടി ഒ മുന്നിൽ ഹാജരായി ഫിറ്റ്നസ് സർട്ടിഫിക്കറ്റ് എൻഫോഴ്സ്മെന്റ് ഉദ്യോഗസ്ഥർക്ക് മുന്നിൽ ഹാജരാക്കാനും നിർദേശിച്ചു. വേഗപ്പൂട്ടില്ലാത്തതിനു 5 ബസുകൾക്കെതിരെയും കൃത്രിമം കാണിച്ചതിനു ഒരു സ്വിഫ്റ്റ് ബസിനെതിരെയും പിഴ ചുമത്തി.

വേഗപ്പൂട്ടിൽ കൃത്രിമം കാണിച്ച സംഭവത്തിൽ വിശദീകരണം നൽകാൻ ഡിപ്പോ ഉദ്യോഗസ്ഥർക്കും നോട്ടിസ് നൽകിയിട്ടുണ്ട്. മൊഫ്യുസൽ ബസ് സ്റ്റാൻഡിൽ 11 സ്വകാര്യ ബസുകൾ പരിശോധിച്ചു. വേഗപ്പൂട്ട് വിഷയത്തിൽ ബസുകൾക്കെതിരെ പിഴ ഈടാക്കി. കൂടാതെ ചക്രത്തിൽ റബർ ഫ്ലാപ് പൊട്ടിയ ഒരു ബസിന് 2,000 രൂപ പിഴ ചുമത്തി. തെളിച്ചമില്ലാത്ത ലൈറ്റ്, പിൻവശത്തെ ബ്രേക്ക് ലൈറ്റ്, അമിത ലൈറ്റുകൾ എന്നിവ കണ്ടെത്തിയ സ്വകാര്യ ബസുകൾക്കെതിരെയും നടപടി എടുത്തു. വേഗപ്പൂട്ടില്ലാത്ത ബസുകൾ 2 ദിവസത്തിനകം വേഗപ്പൂട്ട് ഘടിപ്പിച്ച് ആർ ടി ഒ എൻഫോഴ്സ്മെന്റ് മുൻപാകെ ഹാജരാകണം. ഇന്നും ബസ് സ്റ്റാൻഡിലും റോഡിലും ബസുകൾ പരിശോധിക്കുമെന്നു എൻഫോഴ്സ്മെന്റ് എ എം വി ഐ എം. ഷുക്കൂർ അറിയിച്ചു.