പത്തനംതിട്ട:  ഇലന്തൂരിൽ 25 വർഷം മുൻപും ഇപ്പോഴത്തേതിനു സമാനമായ നരബലി നടന്നു. 1997 ഓഗസ്റ്റ് 21നാണ് ദുർമന്ത്രവാദത്തിനിരയായി നാലരവയസുകാരി ഇലന്തൂരിൽ കൊല്ലപ്പെട്ടത്. ഇലന്തൂർ പൂക്കോട് കണിയാംപറമ്പിൽ ശശിരാജ പണിക്കരുടെ മകൾ അശ്വിനി എന്ന കുട്ടിയെയാണ് അന്ന് ചുട്ടുപൊള്ളിച്ചു കൊന്നത്. ആർ. ശ്രീലേഖ പത്തനംതിട്ട എസ്പിയായിരിക്കെ കേസ് അന്വേഷിച്ചത് അന്നത്തെ ആറൻമുള എസ്ഐ കെ.ഹരികൃഷ്ണനാണ്. പിന്നീട് അഡീ. എസ്പിയായി അദ്ദേഹം ജോലിയിൽനിന്നു വിരമിച്ചു.നരബലി പൂജ നടക്കുന്നുവെന്ന വിവരം ലഭിച്ചതിനെ തുടർന്നാണ് ആറൻമുള സ്റ്റേഷനിൽ‌നിന്ന് പൊലീസ് ഇലന്തൂരിലേക്കെത്തിയതെന്ന് അന്ന് എസ്ഐ ആയിരുന്ന ഹരികൃഷ്ണൻ പറയുന്നു. പക്ഷേ അവിടെ എത്തിയപ്പോഴേക്കും കുട്ടി കൊല്ലപ്പെട്ടുകഴിഞ്ഞിരുന്നു. 25ൽപ്പരം മുറിപ്പാടുകൾ കുട്ടിയുടെ ശരീരത്തുണ്ടായിരുന്നുവെന്നും അദ്ദേഹം മനോരമ ന്യൂസിനോട് വെളിപ്പെടുത്തി.‘‘മുറിപ്പാടുകൾ മിക്കതും പൊള്ളലേൽപ്പിച്ചതിന്റെ ഭാഗമായി ഉണ്ടായതാണ്.

പല മുറിപ്പാടുകളും പല ദിവസങ്ങളിലായി സംഭവിച്ചതാണെന്നു വ്യക്തമായി. കുട്ടിയുടെ കാൽപ്പാദങ്ങളിൽ പപ്പടം കുത്തിയെടുക്കുന്ന കമ്പി കൊണ്ട് വലിയ ദ്വാരങ്ങൾ ഉണ്ടാക്കിയിരുന്നു. സ്വകാര്യ ഭാഗങ്ങളിലും പൊള്ളൽ ഏൽപ്പിച്ചിരുന്നു. പിൻഭാഗം ഹീറ്ററിൽ ഇരുത്തി പൊള്ളിച്ച നിലയിലും ആയിരുന്നു. അതിക്രൂരമായ, വളരെ ദുഃഖകരമായ കാഴ്ചയാണു കാണേണ്ടിവന്നത്. ഹോമിയോ ഡോക്ടറായ പിതാവും രണ്ടാം ഭാര്യയും മൂന്നാം ഭാര്യയും കൂടിയാണ് ഈ ക്രൂരകൃത്യം ചെയ്തത്. മൂന്നു പ്രതികളെയും അറസ്റ്റ് ചെയ്തു ജീവപര്യന്തം ശിക്ഷയ്ക്കു വിധിച്ചു’’– അദ്ദേഹം വ്യക്തമാക്കി.കേസിലെ ഒന്നാം പ്രതി ശശിരാജ പണിക്കരുടെ മൂന്നാം ഭാര്യ സീനയാണ്. രണ്ടാം പ്രതി ശശിരാജ പണിക്കറും മൂന്നാം പ്രതി രണ്ടാം ഭാര്യ സുകുമാരിയമ്മയുമാണ്.

ശശിരാജ പണിക്കരുടെ ഒളിഞ്ഞുകിടക്കുന്ന പിതൃസ്വത്ത് കണ്ടെത്തുന്നതിലേക്കു പിതൃക്കൾ സീനയിലൂടെ പ്രവചനം നടത്തിയെന്ന് പത്തനംതിട്ടം ഒന്നാം ക്ലാസ് മജിസ്ട്രേറ്റ് കോടതിയിൽ പൊലീസ് നൽകിയ റിമാൻഡ് റിപ്പോർട്ടിൽ പറയുന്നു. ഇതു ലഭിക്കുന്നതിനായി പൂജാദികർമങ്ങൾ നടത്തിയെങ്കിലും ഫലമുണ്ടായില്ല. ഇതിനുകാരണം അശ്വനിയുടെ ദേഹത്തു വസിക്കുന്ന ദുർഭൂതങ്ങളുടെ പ്രവർത്തിയാണെന്നും അവയെ പൊള്ളലേൽപ്പിച്ച് മാറ്റാമെന്നും സീന നിർദേശിച്ചു. ഇതേത്തുടർന്നാണ് പിഞ്ചുകുഞ്ഞിനോട് ഈ ക്രൂരത കാട്ടിയത്.അതേസമയം, കൊലപാതകങ്ങൾക്കു കാരണം സമ്പത്തിനോടുള്ള മനുഷ്യന്റെ അമിത ഭ്രമവും വഴിവിട്ട ജീവിത ബന്ധങ്ങളും ആണെന്നും അങ്ങേയറ്റം ലജ്ജാകരമാണിതെന്നും അദ്ദേഹം കൂട്ടിച്ചേർത്തു.