പയ്യന്നൂർ: നവതി ആഘോഷിക്കാൻ ഒരുങ്ങുന്ന ശ്രീ നാരായണ ആശ്രമത്തിൽ (ശ്രീ നാരായണ വിദ്യാലയo) സ്ഥാപിക്കുന്ന മൂന്നു പ്രതിമകളിൽ ഗാന്ധിജിയുടെ വെങ്കല ശിൽപം, ശിൽപി ഉണ്ണികാനായിയുടെ ശിൽപശാലയിൽ ഒരുങ്ങി.ശ്രീ നാരായണ ഗുരുദേവ ശിഷ്യനും നവോത്ഥാന നായകനുമായ സ്വാമി ആനന്ദ തീർത്ഥ‌ർ 1931ൽ പയ്യന്നൂരിൽ സ്ഥാപിച്ചശ്രീ നാരായണ ആശ്രമത്തിൽ 1934 ൽ ഗാന്ധിജി സന്ദർശനം നടത്തിയപ്പോൾ ആശ്രമ വളപ്പിൽ നട്ട മാവിൻതൈ വളർന്ന് പന്തലിക്കുകയും പിന്നീട് ‘ഗാന്ധി മാവ്’ എന്ന പേരിൽ പ്രസിദ്ധിയാർജിക്കുകയും ചെയ്ത മാവിൽ ചുവട്ടിൽ സ്ഥാപിക്കുന്നതിനാണ് 5 അടി ഉയരമുള്ള ഗാന്ധിജിയുടെ വെങ്കല ശിൽപം ഒരുങ്ങിയത്. ഇതേ മാവിൻ ചുവട്ടിലാണ് ഗാന്ധിജിയുടെ ചിതാഭസ്മകലശം അടക്കം ചെയ്ത സ്മൃതിമണ്ഡപവും ഉള്ളത്.

ഒൻപത് പതിറ്റാണ്ട് കാലം മുൻപ് നിർമ്മിച്ച ആശ്രമ കെട്ടിടം കാലപ്പഴക്കത്താൽ ജീർണ്ണാവസ്ഥയിലായതിനെ തുടർന്ന്, സ്വാമി ആനന്ദ തീർത്ഥ ട്രസ്റ്റിന്റെ നേതൃത്വത്തിൽ പഴയ തനിമ നിലനിർത്തി അടുത്തിടെ നവീകരിച്ചിരുന്നു. കഴിഞ്ഞ ജൂലായ് 14ന് ശിവഗിരി മഠാധിപതി സച്ചിദാനന്ദ സ്വാമികളാണ് ഇതിന്റെ ഉദ്ഘാടനം നിർവ്വഹിച്ചത്.ഗാന്ധി സ്മൃതി, ഗാന്ധിജിയുടെ വെങ്കല പ്രതിമ, സ്വാമി ആനന്ദ തീർത്ഥന്റെ സമാധിമണ്ഡപവും പ്രതിമയും, ശ്രീനാരായണ ഗുരുവിന്റെ പ്രതിമ, ചരിത്ര മുഹൂർത്തങ്ങൾ ആലേഖനം ചെയ്യുന്ന ചുമർചിത്രങ്ങൾ തുടങ്ങി 50 ലക്ഷത്തോളം രൂപ ചെലവ് പ്രതീക്ഷിക്കുന്ന പദ്ധതികൾ നവീകരണത്തിന്റെ ഭാഗമായി ഒരുക്കുന്നുണ്ട്.

ഗാന്ധി മാവിൻ ചുവട്ടിൽ കരിങ്കല്ലിൽ നിർമ്മിച്ച തീർത്ഥപീഠത്തിൽ ഗാന്ധിജിയുടെ ചിതാഭസ്മo സൂക്ഷിച്ച പേടകം സുരക്ഷിതമായുo സൂക്ഷ്മമായും സന്ദർശകർക്ക് കാണാവുന്ന വിധത്തിൽ ഒരുക്കുന്ന പ്രവൃത്തിയും ഉണ്ണി കാനായിയുടെ നേതൃത്വത്തിൽ പുരോഗമിക്കുന്നുണ്ട്. സ്വാമി ആനന്ദതീർത്ഥന്റെ വെങ്കലശില്പവും ഉണ്ണിയുടെ പണിപ്പുരയിൽ പൂർത്തിയാകുന്നുണ്ട്. ശ്രീ നാരായണ ഗുരുദേവന്റെ ശിൽപം നിർമ്മിക്കുന്നത് ശിൽപി ചിത്രൻ കുഞ്ഞിമംഗലമാണ്.ചരിത്രസംഭവങ്ങൾക്ക് ചുമർചിത്രങ്ങളിലൂടെ ചിത്രഭാഷ്യം ഒരുക്കുന്നത്, ചിത്രകലാ പരിഷത്തിന്റെ ആഭിമുഖ്യത്തിൽ സംസ്ഥാനത്തെ 20 ലേറെ കലാകാരന്മാർ ഒത്തുചേർന്നാണ്. ഇതിന്റെ പ്രവർത്തനങ്ങൾ ശനി, ഞായർ ദിവസങ്ങളിലായി നടക്കും.