പേരാവൂർ: ടൗൺ കേന്ദ്രീകരിച്ച് വികസനപ്രവൃത്തികൾ നടപ്പിലാക്കുന്നതിന് പഞ്ചായത്ത് വാങ്ങിയ ഭൂമിതരം മാറ്റാൻ കൃഷിവകുപ്പിന്റെ അനുമതി.ഇതോടെ ടൗണിനു സമീപം വാങ്ങിയ 2.63 ഏക്കർ ഭൂമിയിൽ വിജ്ഞാന കേന്ദ്രം,ഇൻഡോർ സ്റ്റേഡിയം,ലൈബ്രറി,പാർക്ക്,നീന്തൽക്കുളം,കൺവെൻഷൻ സെന്റർ എന്നിവ സ്ഥാപിക്കാനുള്ള തടസങ്ങൾ നീങ്ങി.തരം മാറ്റുന്നതിന് ഗ്രാമപ്പഞ്ചായത്ത് സെക്രട്ടറി നല്കിയ അപേക്ഷയിന്മേൽ സബ് കളക്ടർ അന്വേഷണം നടത്തി കൃഷി വകുപ്പിന് സമർപ്പിച്ച റിപ്പോർട്ടിന്റെ അടിസ്ഥാനത്തിലാണ് അനുമതി ലഭിച്ചത്.

ഇത്രയും സംവിധാനങ്ങൾ ടൗൺ കേന്ദ്രീകരിച്ച് വരുന്നതോടെ പേരാവൂർ ടൗണിൽ വലിയ വികസനമുണ്ടാവും.വിജ്ഞാന കേന്ദ്രത്തിന് ഡോ.വി.ശിവദാസൻ എം.പിയുടെ വികസന ഫണ്ടിൽ നിന്ന് ഇതിനകം അരക്കോടിയോളം രൂപ അനുവദിച്ചിട്ടുണ്ട്.ഇതിനു പുറമെ വിവിധ ഏജൻസികളൂടെ ഫണ്ടു കൂടി ലഭിക്കുന്നതോടെ പേരാവൂരിൽ സമഗ്ര വികസനത്തിന് തുടക്കമാവും.

കുട്ടികളുടെയും മുതിർന്നവരുടെയും പാർക്കുകൾ,പരിശീലന സംവിധാനത്തോടെയുള്ള നീന്തൽക്കുളം,പൊതുപരിപാടികളും മറ്റും നടത്തുന്നതിന് കൺവെൻഷൻ സെന്റർ,വിവിധ കായിക മത്സരങ്ങൾനടത്താനനുയോജ്യമാകും വിധമുള്ള ഇൻഡോർ സ്റ്റേഡിയം,ലൈബ്രറി എന്നിവയാണ് തുടക്കത്തിൽ സ്ഥാപിക്കുന്നത്.സ്ഥലലഭ്യതയനുസരിച്ച് പഞ്ചായത്ത് ഓഫീസടക്കം പ്രസ്തുത സ്ഥലത്ത് സ്ഥാപിക്കാനും ശ്രമിക്കുന്നുണ്ട്.സ്വകാര്യ വാഹനപേ പാർക്കിങ്ങ് സംവിധാനവും പഞ്ചായത്തിന്റെ പദ്ധതിയിലുണ്ട്.പേരാവൂർ-നിടുംപൊയിൽ റോഡിൽ ഡി.വൈ.എസ്.പി ഓഫീസിനു മുന്നിൽ നിന്നാണ് പ്രസ്തുത സ്ഥലത്തേക്ക് പ്രവേശിക്കാനുള്ള വഴി നിർമിക്കുക.പേരാവൂരിലെ വ്യാപാര സമൂഹത്തിന്റെയും പൊതുജനങ്ങളുടെയും വർഷങ്ങളായുള്ള ആവശ്യമാണ് യാഥാർഥ്യമാകാൻ പോകുന്നത്.

ഭൂമി തരം മാറ്റി ലഭിച്ചതോടെ കഴിഞ്ഞ ബജറ്റിൽ പ്രഖ്യാപിച്ച വിവിധ പദ്ധതികൾ ഉടൻ യാഥാർഥ്യമാക്കാൻ സാധിക്കുമെന്ന് പേരാവൂർ പഞ്ചായത്ത് പ്രസിഡന്റ് പി.പി.വേണുഗോപാലൻ പറഞ്ഞു.ഇതോടൊപ്പം,വ്യാപാര സംഘടനകളുടെ സഹകരണത്തോടെ പേരാവൂർ ടൗണിന്റെ സൗന്ദര്യവല്കരണവും നടപ്പിലാക്കും.