ശ്രീകണ്ഠപുരം: വർധിച്ചുവരുന്ന ലഹരി ഉപയോഗം തടയാൻ ജാതി, മത, രാഷ്ട്രീയ ഭേദമന്യേ എല്ലാവരും ഒറ്റക്കെട്ടായി പ്രവർത്തിക്കണമെന്ന് നിയമസഭാ സ്പീക്കർ എ.എൻ.ഷംസീർ. പയ്യാവൂർ  പഞ്ചായത്തിന്റെ ‘ലഹരിമുക്ത ക്യാമ്പസ് സമൂഹം’ കർമപദ്ധതി ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാന സർക്കാരിന്റെ നേതൃത്വത്തിൽ ലഹരിക്കെതിരെ അതിതീവ്ര പോരാട്ടം നടത്തുകയാണ്. വിദ്യാലയങ്ങൾ കേന്ദ്രീകരിച്ച് ലഹരിവസ്തുക്കളുടെ വിൽപ്പന അനിയന്ത്രിതമായി ഉയരുന്ന സാഹചര്യത്തിൽ കൂടുതൽ  മുൻകരുതലെടുക്കണം.  വിദ്യാഭ്യാസ സ്ഥാപനങ്ങൾക്ക് ചീത്തപ്പേരാകുമെന്ന് കരുതി ഇത്തരക്കാരെ മറച്ചുവയ്‌ക്കുന്ന  പ്രവണത ഒഴിവാക്കണമെന്നും  സ്പീക്കർ പറഞ്ഞു.

പഞ്ചായത്തിലെ വിദ്യാർഥികളെയും യുവജനങ്ങളെയും അതുവഴി സമൂഹത്തെയും ലഹരിമുക്തമാക്കുകയെന്ന ലക്ഷ്യത്തോടെയാണ്  പദ്ധതി ആവിഷ്‌കരിച്ചത്. ഇതിന്റെ ഭാഗമായി വിദ്യാലയങ്ങൾ കേന്ദ്രീകരിച്ച് ഫാൻ-ഫൈറ്റേഴ്സ് എഗൈൻസ്റ്റ് നാർക്കോട്ടിസം എന്ന സംഘടന രൂപീകരിക്കും. സ്‌കൂളുകൾ, ക്യാമ്പസുകൾ, വീടുകൾ, പൊതുയിടങ്ങൾ എന്നിങ്ങനെ നാല് തലങ്ങളിലാണ് സംഘടന പ്രവർത്തിക്കുക. നാർക്കോട്ടിക് സെൽ, പൊലീസ്, എക്സൈസ്, സൈക്യാട്രി വിഭാഗം ഡോക്ടർമാർ, ജനപ്രതിനിധികൾ എന്നിവർ ഉൾപ്പെട്ട സമിതികളുടെ നിയന്ത്രണത്തിലാണ് ദീർഘകാല അടിസ്ഥാനത്തിലുള്ള സംഘടനയുടെ പ്രവർത്തനം.