തിരുവനന്തപുരം: ഓണത്തിന് സൗജന്യ കിറ്റിനുപുറമേ എല്ലാ റേഷൻ കാർഡ് ഉടമകൾക്കും സബ്സിഡിനിരക്കിൽ പത്തുകിലോ അരിയും ഒരു കിലോ പഞ്ചസാരയും നൽകുമെന്ന് മന്ത്രി ജി.ആർ. അനിൽ അറിയിച്ചു. അരിയിൽ അഞ്ചുകിലോ പച്ചരിയും അഞ്ചുകിലോ കുത്തരിയുമായിരിക്കും.
14 ഇനം സാധനങ്ങളടങ്ങിയ സൗജന്യ ഓണക്കിറ്റ് 10 മുതൽ വിതരണം ചെയ്യാനുള്ള ഒരുക്കത്തിലാണ്. വിലക്കയറ്റം നിയന്ത്രിക്കാൻ ശക്തമായ വിപണി ഇടപെടലുകളുണ്ടാവും. വെട്ടിക്കുറച്ച ഗോതമ്പിന് പകരം റാഗി, വെള്ളക്കടല എന്നിവ നൽകണമെന്ന സംസ്ഥാനത്തിന്റെ ആവശ്യം പരിഗണിക്കാമെന്ന് കേന്ദ്രം അറിയിച്ചതായും മന്ത്രി പറഞ്ഞു.
