പേരാവൂർ: താലൂക്കാസ്പത്രിയിൽ ഓക്‌സിജൻ പ്ലാന്റ് സ്ഥാപിക്കുന്ന സ്ഥലത്തിന്മേൽ സ്വകാര്യ വ്യക്തികൾ ഹൈക്കോടതിയിൽ നിന്ന് സമ്പാദിച്ച സ്റ്റേ മൂന്ന് മാസത്തേക്ക് കൂടി നീട്ടി നല്കി.ഇതോടെ ലിക്വിഡ് ഓക്‌സിജൻ പ്ലാന്റ് കാടുമൂടി നശിക്കുന്ന സ്ഥിതിയായി.

ജൂലായ് ആറിനാണ് ആസ്പത്രിയുടെ സമീപവാസികളായ തളയൻകണ്ടി അഹമ്മദ് കുട്ടി,തളയൻ കണ്ടി റാബിയ എന്നിവർ ഹൈക്കോടതിയിൽ നിന്ന് ആസ്പത്രി ഭൂമിക്കെതിരെ 14 ദിവസത്തേക്ക് സ്റ്റേ വാങ്ങിയത്.ജൂലായ് 19ന് കേസ് പരിഗണിച്ചപ്പോൾ കേസിലെ ഒന്നാം എതിർകക്ഷിയായ പേരാവൂർ പഞ്ചായത്ത് ഏർപ്പെടുത്തിയ അഭിഭാഷകൻ സ്റ്റേ നീക്കാനാവശ്യമായ രേഖകൾ കോടതിയിൽ സമർപ്പിച്ചില്ലെന്നാണ് വിവരം.ഇതാണ് സ്റ്റേ മൂന്ന് മാസത്തേക്ക് കൂടി നീട്ടി നല്കാൻ കാരണമെന്നാണറിയുന്നത്.

പഞ്ചായത്ത് സെക്രട്ടറിയെക്കൂടാതെ,പേരാവൂർ ബ്ലോക്ക് പഞ്ചായത്ത് സെക്രട്ടറി,കണ്ണൂർ ജില്ലാ കലക്ടർ,താലൂക്കാസ്പത്രി സൂപ്രണ്ട് എന്നിവരാണ് കേസിലെ മറ്റ് എതിർ കക്ഷികൾ.ആസ്പത്രി റോഡിന് അവകാശമുന്നയിച്ചാണ് ഹരജി എന്നതിനാൽ, പേരാവൂർ പഞ്ചായത്ത് സെക്രട്ടറിയാണ് റോഡുമായി ബന്ധപ്പെട്ട രേഖകൾ കോടതിയിൽ ഹാജരാക്കേണ്ടത്.

താലൂക്കാസ്പത്രി ഭൂമിയിലൂടെ പഞ്ചായത്ത് ആസ്തിയിൽ ഉൾപ്പെടുന്ന റോഡില്ലെന്നിരിക്കെ,പഞ്ചായത്തധികൃതർ ഇക്കാര്യം ഹൈക്കോടതിയിൽ എതിർ സത്യവാങ്മൂലം വഴി സമർപ്പിക്കുന്നതിൽ വന്ന വീഴ്ചയാണ് ഓക്‌സിജൻ പ്ലാന്റ് സ്ഥാപിക്കുന്നത് വൈകിപ്പിക്കുന്നത്.പേരാവൂർബസ് സ്റ്റാൻഡ് വഴി ബ്ലോക്ക് പഞ്ചായത്ത് ഓഫീസിലേക്ക് ഔദ്യോഗിക റോഡുണ്ടെന്ന് കാണിച്ചാണ് ഹർജിക്കാർ സ്റ്റേ സമ്പാദിച്ചത്.എന്നാൽ,ഹർജിക്കാർ കോടതിയിൽ സമർപ്പിച്ച പ്ലാൻ പ്രകാരമുള്ള റോഡ് നിലവിലില്ല.

ഇക്കാര്യം കോടതിയിൽ ബോധിപ്പിക്കേണ്ട പേരാവൂർ പഞ്ചായത്ത് തികഞ്ഞ അലംഭാവമാണ് കാണിക്കുന്നതെന്ന് ആസ്പത്രി സംരക്ഷണ സമിതി ആരോപിച്ചു.ആയിരക്കണക്കിന് നിർധന രോഗികൾ ആശ്രയിക്കുന്ന പേരാവൂർ താലൂക്കാസ്പത്രിയുടെ വികസനം തടസ്സപ്പെടുത്തുന്നതിന് പ്രത്യേകം ഒരു ലോബി പ്രവർത്തിക്കുന്നതായി സംശയമുണ്ടെന്നും ഇത്തരക്കാരെ പൊതുജനം ജനകീയ വിചാരണ ചെയ്യുന്ന നാൾ വിദൂരമല്ലെന്നും സംരക്ഷണ സമിതി ഭാരവാഹികൾ പറഞ്ഞു.