കെ. വിശ്വനാഥൻ

പേരാവൂർ: താലൂക്കാസ്പത്രിയുടെ നഷ്ടപ്പെട്ട സ്ഥലം റവന്യൂ വകുപ്പ് തിരിച്ചുപിടിച്ച് ആസ്പത്രിക്ക് കൈമാറിയിട്ടും സംരക്ഷിക്കുന്നതിൽ ആസ്പത്രി അധികൃതർ അനാസ്ഥ തുടരുകയാണെന്ന് ആക്ഷേപം.കയ്യേറ്റം തിരിച്ചുപിടിച്ച ഭാഗത്ത് ചുറ്റുമതിൽ കെട്ടാൻ പൊതുമരാമത്ത് വകുപ്പ് പ്ലാൻ തയ്യാറാക്കി നല്കിയിട്ടും ഭൂമി സംരക്ഷിക്കാൻ സൂപ്രണ്ട് തയ്യാറാവുന്നില്ലെന്ന് വ്യാപകമായി പരാതിയുയർന്നിട്ടുണ്ട്.

വർഷങ്ങൾ നീണ്ട നിയമനടപടികൾക്കൊടുവിൽ 2022 ഫിബ്രവരിയിലാണ് കയ്യേറ്റഭൂമി തിരിച്ചുപിടിച്ചു നല്കാൻ ജില്ലാ കലക്ടർ ഉത്തരവിട്ടത്.കയ്യേറ്റഭൂമിയിൽ സ്വകാര്യവ്യക്തി നിർമിച്ച വീടും കടകളും ഭാഗികമായി പൊളിച്ച് നീക്കി ഭൂമി ഇരിട്ടി തഹസിൽദാറുടെ നേതൃത്വത്തിൽ തിരിച്ചു പിടിക്കുകയും ചെയ്തു.

ആസ്പത്രിഭൂമി ചുറ്റുമതിൽ കെട്ടി സംരക്ഷിക്കണമെന്ന് സംസ്ഥാന ആരോഗ്യവകുപ്പ് ഡയറക്ടർ ഉത്തരവിട്ടതോടെ റവന്യൂ വകുപ്പ് ഭൂമി മുഴുവൻ അളന്ന് തിട്ടപ്പെടുത്തി അതിരുകല്ലുകൾ സ്ഥാപിച്ചു.ഇതിനുശേഷം ഒന്നാം ഘട്ടത്തിൽ കെട്ടേണ്ട ചുറ്റുമതിലിന്റെ പ്ലാനും എസ്റ്റിമേറ്റും പി.ഡബ്ല്യു.ഡി അധികൃതരെക്കൊണ്ട് തയ്യറാക്കി.ആസ്പത്രി വികസന സമിതിയിൽ നിന്ന് ഫണ്ടും ലഭ്യമാക്കി.

എന്നാൽ,ആസ്പത്രിക്ക് സമീപത്തെ ഏതാനുംസ്വകാര്യവ്യക്തികളുടെയും എച്ച്.എം.സിയിലുള്ള ചിലരുടെയും താത്പര്യങ്ങൾക്കനുസൃതമായി ചുറ്റുമതിൽ കെട്ടുന്നത് നീണ്ടുപോകുകയാണ്.ആസ്പത്രി സൂപ്രണ്ട് തികഞ്ഞ അലംഭാവമാണ് ഇക്കാര്യത്തിൽ പിന്തുടരുന്നത്.ആസ്പത്രി ഭൂമിയിലെ മുഴുവൻ നിർമാണ പ്രവർത്തികളും സൂപ്രണ്ടിന്റെ മാത്രം ഉത്തരവാദിത്വമാണെന്നും റവന്യൂ വകുപ്പിന് ഇനി യാതൊന്നും ചെയ്യാനില്ലെന്നും റവന്യൂ അധികൃതർ വ്യക്തമാക്കിയിട്ടുമുണ്ട്.

ആസ്പത്രിയുടെ കയ്യേറ്റ ഭൂമി തിരിച്ചു പിടിച്ചെങ്കിലും വീണ്ടും കയ്യേറ്റം നടക്കുന്നതായാണ് വിവരം.ഇതിനെതിരെ സൂപ്രണ്ട് യാതൊരു നടപടിയും സ്വീകരിക്കുന്നില്ല. ആസ്പത്രി ഭൂമിയുടെ പൂർണ ഉത്തരവാദിത്വം സൂപ്രണ്ടിനു മാത്രമാണെന്നിരിക്കെ,ചുറ്റുമതിൽ കെട്ടാത്തതിനു പിന്നിലും അലംഭാവമുണ്ട്.ചുറ്റുമതിൽ കെട്ടാൻ സർക്കാർ ഉത്തരവും എച്ച്.എം.സിയുടെയും സർവകക്ഷി യോഗത്തിന്റെയും അനുമതിയും കിട്ടിയിട്ടും ആസ്പത്രി അധികൃതർ നടപടികൾ വൈകിപ്പിക്കുകയാണ്.ഇതിനെതിരെ കോടതിയെ സമീപിക്കുമെന്ന് ആസ്പത്രി സംരക്ഷണ സമിതി ഭാരവാഹികൾ അറിയിച്ചു.