ഫറോക്ക് : ‘‘എനിക്ക്‌ പഠിക്കണം. സ്വന്തം കാലിൽ നിൽക്കണം. പക്ഷേ വീട്ടുകാർ സമ്മതിക്കുന്നില്ല. നാളെ എന്റെ നിക്കാഹാണ്‌. രക്ഷിക്കണം, കൂടെ നിൽക്കണം’’–ജില്ലാ കലക്ടറോട്‌  വീഡിയോകോളിൽ സംസാരിക്കവേ പെൺകുട്ടിയുടെ ശബ്‌ദത്തിൽ ഇടർച്ചയേതുമുണ്ടായിരുന്നില്ല. ഉറ്റവരൊക്കെ എതിർത്തിട്ടും, മുന്നിലെ വാതിലുകളെല്ലാം അടഞ്ഞിട്ടും അവൾ സ്വന്തം ജീവിതം മാറ്റിയെഴുതി. എട്ടുംപൊട്ടും തിരിയാത്ത പ്രായത്തിൽ പഠനം അവസാനിപ്പിച്ച്‌ പുകഞ്ഞുതീരുമായിരുന്ന ജീവിതത്തെയാണ്‌ അവൾ കീഴ്‌മേൽ മറിച്ചത്‌. ലോകത്തിന്‌ വെളിച്ചമാകാൻ കരുത്തുണ്ട്‌ കടലുണ്ടി പഞ്ചായത്തിലെ തീരദേശത്തെ പതിനേഴുകാരിയുടെ ധീരതയ്‌ക്ക്‌.

എതിർപ്പ് വകവയ്ക്കാതെ വ്യാഴാഴ്ച വിവാഹം നടത്താനായിരുന്നു  തീരുമാനം. പെൺകുട്ടി നേരിട്ട്‌ അറിയിച്ചതോടെ കലക്ടർ  വിവാഹം തടഞ്ഞു. അദ്ദേഹത്തിന്റെ നിർദേശപ്രകാരം വ്യാഴാഴ്ച രാവിലെ സബ് കലക്ടർ ചെൽസ സിനി ഉൾപ്പെടെയുള്ളവർ വീട്ടിലെത്തി രക്ഷിതാക്കളെയും പെൺകുട്ടിയെയും കൂട്ടിക്കൊണ്ടുപോയി. രക്ഷിതാക്കളെ പിന്നീട്‌ വിട്ടയച്ചു.  പെൺകുട്ടി ജില്ലാ ശിശുക്ഷേമ സമിതി സംരക്ഷണയിലാണ്.

പ്ലസ് ടു വിദ്യാർഥിനി നേരത്തേ ചൈൽഡ് ലൈൻ അധികൃതരെയും വിവരമറിയിച്ചിരുന്നു. വിവാഹം നടത്തരുതെന്നും വെള്ളിയാഴ്ച രക്ഷിതാവിനോട്‌ കോടതിയിൽ ഹാജരാകാനും നിർദേശിച്ചു. എന്നാൽ ഇത്‌ മറികടന്നാണ്‌ വിവാഹമുറപ്പിക്കൽ എന്ന വ്യാജേന വ്യാഴാഴ്ച നിക്കാഹ് നടത്താൻ തുനിഞ്ഞത്‌.  300 പേരെ ക്ഷണിച്ച്  ഭക്ഷണവും ഒരുക്കി. ഈ വിവരവും പെൺകുട്ടി ശിശുക്ഷേമ സമിതിയെ അറിയിച്ചു.

രക്ഷിതാക്കളോട് വെള്ളിയാഴ്ച കോടതിയിൽ ഹാജരാകാൻ നിർദേശിച്ചിട്ടുണ്ട്‌. പ്രായപൂർത്തിയാകാത്ത പെൺകുട്ടിയുടെ നിക്കാഹിന്  മഹല്ല് കമ്മിറ്റിയും ഖത്തീബും വിസമ്മതിച്ചതോടെയാണ്‌ വീട്ടുകാർ  ബദൽ മാർഗം തേടിയത്‌.