പേരാവൂർ: ചൊവ്വാഴ്ച പേരാവൂരിൽ നടന്ന സംഘർഷത്തിൽ കോൺഗ്രസ് മണ്ഡലം പ്രസിഡന്റുമാർക്ക് മർദ്ദനമേറ്റതിൽ പ്രതിഷേധിച്ച് കോൺഗ്രസ് ബ്ലോക്ക് കമ്മിറ്റി നടത്തിയ പ്രകടനം അലങ്കോലപ്പെട്ടു.പുതിയ സ്റ്റാൻഡിൽ നിന്ന് പുറപ്പെട്ട പ്രകടനം തലശേരി റോഡിലൂടെ കടന്നുപോകവെയാണ് അനിഷ്ട സംഭവങ്ങൾ അരങ്ങേറിയത്.

കൊട്ടിയൂർ റോഡിൽ നിന്ന് സി.പി.എമ്മുകാരുടെ മർദ്ദനമേറ്റ യൂത്ത് ലീഗ് നിയോജകമണ്ഡലം പ്രസിഡന്റ് സിറാജ് പൂക്കോത്ത് കോൺഗ്രസ് പ്രകടനത്തിലേക്ക് ഓടിക്കയറിയതോടെ കനറാ ബാങ്കിനു സമീപം പ്രകടനം നിർത്തിവെച്ചു.സിറാജിനെ ആസ്പത്രിയിലേക്ക് മാറ്റിയ ശേഷം പ്രകടനക്കാർ റോഡിൽ കുത്തിയിരുന്ന് മുദ്രാവാക്യം വിളി തുടങ്ങി.

ഇതിനിടെ സംഘടിച്ചെത്തിയ ഡി.വൈ.എഫ്.ഐ പ്രവർത്തകർ ടൗൺ ജംഗ്ഷനിൽ നിലയുറപ്പിച്ച് മുദ്രാവാക്യം വിളി തുടങ്ങിയതോടെ ടൗൺ സംഘർഷാവസ്ഥയിലായി.ഇരു ഭാഗത്തും പോലീസ് നിലയുറപ്പിച്ചതോടെ മുൻകൂട്ടി നിശ്ചയിച്ച പൊതുയോഗ വേദി ഒഴിവാക്കി നടുറോഡിൽ തന്നെ കോൺഗ്രസ് പ്രതിഷേധ യോഗം ചേർന്നു.ഡി.സി.സി ജനറൽ സെക്രട്ടറി ലിസി ജോസഫ് ഉദ്ഘാടനം ചെയ്തു.ബ്ലോക്ക് പ്രസിഡന്റ് സുരേഷ് ചാലാറത്ത് അധ്യക്ഷത വഹിച്ചു.

തുടർന്ന് പ്രകടനക്കാർ പോലീസ് സ്റ്റേഷനിലേക്ക് മാർച്ച് നടത്തി.സ്റ്റേഷനു മുന്നിൽ പോലീസ് തടഞ്ഞതോടെ പ്രകടനക്കാർ കുത്തിയിരുന്ന് പ്രതിഷേധം തുടങ്ങി.ഡി.സി.സി ജനറൽ സെക്രട്ടറിമാരായ മുഹമ്മദ് ഫൈസൽ,ബൈജു വർഗീസ് എന്നിവർ സംസാരിച്ചു.സ്റ്റേഷനിൽ നിന്നും കനത്ത പോലീസ് സുരക്ഷയിലാണ് പ്രകടനമായി കോൺഗ്രസ് പ്രവർത്തകർ ഇന്ദിരാഭവനിലേക്ക്പോയത്.