ഒരു തരത്തില്‍ വാട്‌സാപ്പിനേക്കാള്‍ പതിന്മടങ്ങ് ആകര്‍ഷകവും ഉപയോഗപ്രദവുമായ സൗകര്യങ്ങളോടെയാണ് ടെലഗ്രാം സേവനം നല്‍കിവരുന്നത്.

മെസേജിങ് ആപ്ലിക്കേഷനായ ടെലഗ്രാമില്‍ പുതിയ പ്രീമിയം സബ്‌സ്‌ക്രിപ്ഷന്‍ ഫീച്ചര്‍ വരുന്നു. പണം നല്‍കിയുള്ള സബ്‌സ്‌ക്രിപ്ഷന്‍ സേവനമാണിത്. ഈ മാസം അവസാനത്തോടെ പ്രീമിയം പതിപ്പ് പുറത്തിറക്കുമെന്നാണ് ടെലഗ്രാം സ്ഥാപകന്‍ പാവേല്‍ ദുരോവ് തന്റെ ടെലഗ്രാം ചാനലിലുടെ വെളിപ്പെടുത്തിയത്. പരസ്യക്കാരില്‍ നിന്നല്ലാതെ ഉപഭോക്താക്കളില്‍ നിന്ന് തന്നെ വരുമാനം കണ്ടെത്താന്‍ ഇത് ടെലഗ്രാമിനെ സഹായിക്കുമെന്നും ദുരോവ് പറഞ്ഞു.

ഒരു തരത്തില്‍ വാട്‌സാപ്പിനേക്കാള്‍ പതിന്മടങ്ങ് ആകര്‍ഷകവും ഉപയോഗപ്രദവുമായ സൗകര്യങ്ങളോടെയാണ് ടെലഗ്രാം സേവനം നല്‍കിവരുന്നത്. വോയ്‌സ് കോള്‍, വീഡിയോകോള്‍, വലിയ ഫയലുകള്‍ അയക്കാനുള്ള സൗകര്യം, ആകര്‍ഷകമായ സ്റ്റിക്കറുകള്‍, ഇമോജികള്‍, പതിനായിരങ്ങളെ ഉള്‍ക്കൊള്ളാനാവുന്ന ഗ്രൂപ്പുകള്‍, ചാനലുകള്‍, അവ കൈകാര്യം ചെയ്യുന്ന അഡ്മിന്മാര്‍ക്ക് വേണ്ടിയുള്ള കണ്‍ട്രോള്‍ സൗകര്യങ്ങള്‍ അങ്ങനെ അനവധി സൗകര്യങ്ങള്‍ ടെലഗ്രാമിലുണ്ട്. ഈ സൗകര്യങ്ങള്‍ക്ക് പുറമെ കൂടുതല്‍ ഫീച്ചറുകളും മറ്റ് അധിക ആനുകൂല്യങ്ങളും ലഭിക്കുന്നതിന് വേണ്ടി ഉപഭോക്താവിന് ടെലഗ്രാം പ്രീമിയത്തിന് പണം നല്‍കാം.

നിലവിലുള്ള എല്ലാ സൗകര്യങ്ങളും സൗജന്യമായി തന്നെ ലഭിക്കുമെന്ന് ദുരോവ് വ്യക്തമാക്കി. എന്നാല്‍ നിരവധി പുതിയ ഫീച്ചറുകള്‍ വരുന്നുണ്ട്. അക്കൂട്ടത്തില്‍ പ്രീമിയം വരിക്കാരല്ലാത്തവര്‍ക്കുള്ള ഫീച്ചറുകളുമുണ്ട്. പ്രീമിയം ഉപഭോക്താക്കള്‍ അയക്കുന്ന വലിയ ഡോക്യുമെന്റ് ഫയലുകള്‍, മീഡിയാ ഫയലുകള്‍, സ്റ്റിക്കറുകള്‍ എന്നിവ കാണാനും പ്രീമിയം റിയാക്ഷനുകള്‍ പിന്‍ ചെയ്ത് വെച്ച് തിരിച്ചയക്കാനുമെല്ലാം സൗജന്യ ഉപഭോക്താവിന് സാധിക്കും.

2013 ല്‍ തുടക്കമിട്ട ടെലഗ്രാം കഴിഞ്ഞ ഒമ്പത് വര്‍ഷമായി സൗജന്യ സേവനമാണ് നല്‍കിവരുന്നത്. കൂടുതല്‍ ഫീച്ചറുകളും കഴിവുകളും അവതരിപ്പിക്കുമ്പോള്‍ അതിന് വേണ്ടിയുള്ള സെര്‍വര്‍വര്‍, ട്രാഫിക് ചിലവുകള്‍ കൈകാര്യം ചെയ്യാനാവാതെ വരുമെന്ന് ദുരോവ് പറഞ്ഞു.

നിലവിലുള്ള ആപ്പില്‍ തന്നെയാണ് ടെലഗ്രാം പ്രീമിയം ലഭിക്കുക. പ്രീമിയം സൗകര്യങ്ങള്‍ ഉപയോഗിക്കണമെങ്കില്‍ പണം നല്‍കേണ്ടതായിവരും.

സവിശേഷമായ ആനിമേറ്റഡ് സ്റ്റിക്കറുകള്‍, ഇമോജികള്‍, കൂടുതല്‍ വലിയ ഫയലുകള്‍ അയക്കാനുള്ള സൗകര്യം പോലുള്ള സൗകര്യങ്ങള്‍ പ്രീമിയം സൗകര്യങ്ങളായി എത്തും. ടെലഗ്രാമിലെ പുതിയ ഫീച്ചറുകള്‍ ആദ്യം ഉപയോഗിക്കാനും പ്രീമിയം ഉപഭോക്താക്കള്‍ക്ക് സാധിക്കും.