കണ്ണൂർ : ജില്ലാ ആശുപത്രി സൂപ്പർ സ്‌പെഷ്യാലിറ്റി ബ്ലോക്ക്‌ നിർമാണം ജൂലൈ പകുതിയോടെ പൂർത്തിയാകും. 72 കോടിയുടെ കിഫ്‌ബി ഫണ്ട്‌ ഉപയോഗിച്ച്‌ മാസ്‌റ്റർപ്ലാൻ പ്രകാരമാണ്‌ സൂപ്പർ സ്‌പെഷ്യാലിറ്റി ബ്ലോക്ക്‌ നിർമിക്കുന്നത്‌. നാല്‌ നിലകളുള്ള കെട്ടിടത്തിന്റെ നിലം പണി പൂർത്തിയായി. വൈദ്യുതീകരണ പ്രവർത്തനങ്ങൾ പുരോഗമിക്കുകയാണ്‌. നിലവിലെ കെട്ടിടത്തിന്റെ നവീകരണവും മാസ്‌റ്റർ പ്ലാനിലുണ്ട്‌. 

 കാർഡിയോളജി, നെഫ്രോളജി, ന്യൂറോളജി, യൂറോളജി ഒ.പി.കൾ സൂപ്പർ സ്‌പെഷ്യാലിറ്റി ബ്ലോക്കിലുണ്ടാകും. വൻകിട ആശുപത്രികളിലേതിനു സമാനമായ അത്യാധുനിക ഓപ്പറേഷൻ തീയറ്റർ സജ്ജീകരിക്കും. ഏറ്റവും പുതിയ സാങ്കേതിക വിദ്യയിൽ ഒരുക്കുന്ന തീയറ്റർ മുറിയിൽ വായു മലിനീകരണം തടയാനുള്ള നെഗറ്റീവ് റൂം പ്രഷർ സംവിധാനവും അണുവിമുക്തമായി നിലർത്താനുള്ള സംവിധാനവുമുണ്ടാകും. ന്യൂറോളജി, യൂറോളജി വിഭാഗങ്ങൾക്കായി ശസ്‌ത്രക്രിയാനന്തര ഐ.സി.യു.വുമുണ്ടാകും. ആധുനിക മെഡിക്കൽ ഐ.സി.യു.വും സജ്ജീകരിക്കും. എയർ കണ്ടീഷണറും ടി.വി.യുമുൾപ്പടെയുള്ള 12 മുറികളുമായി ലക്ഷ്വറി പേ വാർഡ്‌, എയർകണ്ടീഷനില്ലാത്ത പേവാർഡും ഉണ്ടാകും. 

 സൂപ്പർ സ്‌പെഷ്യാലിറ്റി ബ്ലോക്കിന്റെ പണി പൂർത്തിയാകുന്നതോടെ നിലവിലെ കെട്ടിടത്തിന്റെ നവീകരണം തുടങ്ങും. അഡ്‌മിനിസ്ട്രേറ്റീവ്‌ ബ്ലോക്കും ഒ.പി.യുമുൾപ്പെടെയുള്ളവ താൽക്കാലികമായി സൂപ്പർ സ്‌പെഷ്യാലിറ്റി കെട്ടിടത്തിലേക്ക്‌ മാറ്റും. പഴക്കം ചെന്ന ടോയ്‌ലറ്റുകളും കെട്ടിടങ്ങളും പൊളിച്ചുമാറ്റും. ബി.എസ്‌.എൻ.എല്ലിനാണ്‌ നിർമാണച്ചുമതല.

 അടിമുടിയുള്ള മാറ്റങ്ങളോടെ മികവുയർത്താനുള്ള പാതയിലാണ്‌ ജില്ലാ ആശുപത്രിയെന്ന്‌ ജില്ലാ പഞ്ചായത്ത്‌ പ്രസിഡന്റ്‌ പി.പി. ദിവ്യ പറഞ്ഞു. കൂടുതൽ രോഗീസൗഹൃദമാകുന്നതിന്റെ ഭാഗമായി 24 മണിക്കൂറും പ്രവർത്തിക്കുന്ന ഹെൽപ്‌ ഡെസ്‌ക്‌ ജില്ലാ പഞ്ചായത്ത്‌ സ്ഥാപിക്കും. എല്ലാ വാർഡുകളിലും ടെലഫോൺ സൗകര്യം ഏർപ്പെടുത്തുമെന്നും പി.പി ദിവ്യ പറഞ്ഞു.