പേരാവൂർ : സെയ്ന്റ് ജോസഫ് ഹയർ സെക്കൻഡറി സ്‌കൂളിലെ ജിമ്മിജോർജ് സ്റ്റേഡിയം പൂർത്തീകരിക്കാൻ സർക്കാർ നടപടി തുടങ്ങി. ജിമ്മി ജോർജിന്റെ ഇരുപത്തിയഞ്ചാം ചരമ വാർഷികത്തിൽ പ്രത്യേക പരിഗണന നല്കി നിമാണമാരംഭിക്കുകയും പിന്നീട് നിർമാണം നിലക്കുകയും ചെയ്ത സ്റ്റേഡിയം പണി പൂർത്തീകരിക്കാനുള്ള നടപടികളാണ് പുനരാരംഭിച്ചത്.

2014-ൽ ഒന്നരകോടി ചിലവിട്ട് ഒന്നാം ഘട്ട നിർമാണം തുടങ്ങിയെങ്കിലും ട്രാക്കും, ജംബിങ്ങ് പിറ്റും ഗാലറിയും പൂർത്തിയാക്കിയിരുന്നില്ല. കായിക പ്രേമികളുടെയും സ്റ്റേഡിയം കമ്മിറ്റിയുടെയും ജനപ്രതിനിധികളുടെയും നിരന്തരമായ അഭ്യർത്ഥനയെ തുടർന്നാണ് സ്റ്റേഡിയം നിർമാണം പൂർത്തിയാക്കാൻ സർക്കാർ നടപടി തുടങ്ങിയത്. എസ്റ്റിമേറ്റ് തയ്യാറാക്കുന്നതിന്റെ ഭാഗമായി സംസ്ഥാന കായിക വകുപ്പിന്റെ എഞ്ചിനീയറിംഗ് വിഭാഗമായ സ്‌പോർട്‌സ് ഫൗണ്ടേഷൻ കേരളയുടെ എൻജിനിയർമാർ സ്റ്റേഡിയം സന്ദർശിച്ചു.

പേരാവൂർ പഞ്ചായത്ത് പ്രസിഡന്റ് പി.പി. വേണുഗോപാലൻ, സ്റ്റേഡിയം കമ്മിറ്റി ചെയർമാൻ ആർച്ച് പ്രീസ്റ്റ് ഡോ.തോമസ് കൊച്ചുകരോട്ട്, വർക്കിങ്ങ് ചെയർമാൻ സെബാസ്റ്റ്യൻ ജോർജ്, ഹയർ സെക്കൻഡറി പ്രിൻസിപ്പൽ കെ.വി. സെബാസ്റ്റ്യൻ, ഹൈസ്‌കൂൾ പ്രഥമധ്യാപകൻ വി.വി. തോമസ്, ട്രസ്റ്റിടോമി മാണിക്കത്താഴെ തുടങ്ങിയവർ ചർച്ചകളിൽ പങ്കെടുത്തു.

സംസ്ഥാന സ്‌പോർട്‌സ് കൗൺസിൽ പ്രസിഡന്റ് മേഴ്‌സികുട്ടൻ മൂന്നു മാസം മുൻപ് സ്റ്റേഡിയം സന്ദർശിച്ച് തുടർ നടപടികൾ ഉറപ്പ് നല്കിയിരുന്നു. കായിക വകുപ്പ് മന്ത്രി അബ്ദുൾ റഹ്മാനും, സണ്ണി ജോസഫ് എം.എൽ.എ യും സ്റ്റേഡിയം നിർമാണം പൂർത്തിയാക്കാൻ സജീവമായി ഇടപെട്ടിട്ടുണ്ട്. 2022-ഓടെ സ്റ്റേഡിയം പൂർത്തീകരിക്കാൻ കഴിയുമെന്ന പ്രതീക്ഷയിലാണ് പേരാവൂരിലെ കായിക പ്രേമികൾ.