കിഫ്ബി ഫണ്ടിൽ 17.39 കോടി രൂപ ചെലവിട്ട് നിർമിച്ച സ്കൂൾ കെട്ടിടസമുച്ചയം എങ്ങനെ ഉപയോഗിക്കണമെന്ന കാര്യത്തിൽ ഇതുവരെ വ്യക്തതയില്ല. കോളേജ് കാമ്പസിന് സമാനമായ കെട്ടിടങ്ങളും മറ്റു സൗകര്യങ്ങളുമെല്ലാം അനാഥമായി കിടക്കുകയാണ്. ആറളത്ത് പുതിയ എം.ആർ.എസ്. തുറക്കുന്നതിന് പകരം വകുപ്പിന് കീഴിൽ ഇപ്പോൾ പ്രവർത്തിക്കുന്ന തിരുവനന്തപുരത്തെ ജി. കാർത്തികേയൻ മെമ്മോറിൽ മോഡൽ റസിഡൻഷ്യൽ സ്കൂൾ ആറളത്തേക്ക് മാറ്റുന്ന കാര്യം വകുപ്പിന്റെ പരിഗണനയിലാണ്. സി.ബി.എസ്.ഇ. സിലബസിൽ പ്രവർത്തിക്കുന്ന സ്കൂളിൽ ഇപ്പോൾ ഏഴാം ക്ലാസുവരെയാണുള്ളത്. ഹൈസ്കൂൾ, എച്ച്.എസ്.എസ്. പഠനം ഇവിടെയുള്ള വിദ്യാർഥികൾക്ക് ഇപ്പോൾ വാടക കെട്ടിടത്തിലുള്ള ഈ സ്കൂളിൽ സാധ്യമാകില്ല. പുതിയ കെട്ടിടം നിർമിക്കാൻ കണ്ടെത്തിയ 15 ഏക്കറോളം സ്ഥലം ‍പരിസ്ഥിതിലോല മേഖലയായതിനാൽ നിർമാണ പ്രവർത്തനങ്ങളൊന്നും സാധ്യമാകില്ല. അതിനാൽ, ഈ റസിഡൻഷ്യൽ സ്കൂൾ ആറളത്തേക്ക് മാറ്റി സി.ബി.എസ്.ഇ.ക്ക് പകരം കേരള സിസബസിലേക്ക് മാറുന്ന കാര്യമാണ് വകുപ്പിന്റെ പരിഗണനയിലുള്ളത്. തിരുവനന്തപുരത്തെ സ്കൂൾ മാറ്റുന്നതിൽ നിലനില്ക്കുന്ന പ്രതിഷേധം കാരണം തീരുമാനം നീണ്ടുപോവുകയാണ്.

ആറളം പുനരധിവാസ മേഖലയിലെ കുട്ടികളുടെ സ്കൂളിൽനിന്നുള്ള കൊഴിഞ്ഞുപോക്ക് തടയുന്നതിനും വീടുകളിൽ പഠിക്കാനുള്ള സാഹചര്യം ഇല്ലാത്ത കുട്ടികളെ റസിഡൻഷ്യൽ സ്കൂളിലേക്ക് മാറ്റി പഠനനിലവാരം മെച്ചപ്പെടുത്തുന്നതിനും വേണ്ട നബാർഡ് പദ്ധതിയിൽ വർഷങ്ങൾക്കുമുമ്പ് ഉൾപ്പെട്ട പദ്ധതിയായിരുന്നു ഇത്.

ആറളം ഫാം ആദിവാസി പുനരധിവാസമേഖലയിൽ 3500 കുടുംബങ്ങൾക്ക് ഒരേക്കർ വീതം ഭൂമിയും വീട് നിർമിക്കാൻ 10 സെന്റ്‌ സ്ഥലവുമാണ് ലഭിച്ചത്. രണ്ടായിരത്തോളം കുടുംബങ്ങൾ ഇവിടെ വീടുവെച്ച് താമസം തുടങ്ങി. പുനരധിവാസമേഖലയിൽ ആറളം ഫാം ഗവ. ഹയർ സെക്കൻഡറി സ്കൂൾ നിലവിലുള്ളതിന് പുറമെയാണ് മോഡൽ റസിഡൻഷ്യൽ സ്കൂൾ. 350 പേർക്ക് താമസിച്ചുപഠിക്കാനാണ് സൗകര്യമുണ്ടാവുക. യു.പി. ക്ലാസ് മുതൽ ഹയർ സെക്കൻഡറിവരെയുള്ള പഠനസംവിധാനം എം.ആർ.എസിൽ ഒരുക്കാനാവും.