തൃശൂർ : കല്യാൺ ജ്വല്ലേഴ്സിന്റെ പേരിൽ ജോലി വാഗ്ദാനം ചെയ്തു ഓൺലൈനായി വൻ തട്ടിപ്പ് നടത്തിയ മൂന്നംഗ സംഘം സിറ്റി സൈബർ പൊലീസിന്റെ പിടിയിലായി. ഈസ്റ്റ് ഡൽഹി ഷക്കർപൂർ നെഹ്റു എൻക്ലേവ് സ്വദേശി സൂരജ്  (23), ഡൽഹി ഫസൽപൂർ മാൻഡവല്ലി സ്വദേശി വരുൺ‌ (26), വിശാഖപട്ടണം മുളഗഡെ സ്വദേശി ജേക്കബ് രാജ് (22) എന്നിവരെയാണ് സൈബർ ക്രൈം എസ്ഐ കെ.എസ്. സന്തോഷും സംഘവും പിടികൂടിയത്. കല്യാൺ ജ്വല്ലേഴ്സിന്റെ വിവിധ ഷോറൂമുകളിൽ ജോലി വാഗ്ദാനം ചെയ്തു വൻതുക ഉദ്യോഗാർഥികളിൽ നിന്ന് തട്ടിയെന്നാണ് കേസ്.

കല്യാൺ ജ്വല്ലേഴ്സ് കോർപറേറ്റ് ഓഫിസ് ജനറൽ മാനേജർ കെ.ടി. ഷൈജു കമ്മിഷണർ ആർ. ആദിത്യയ്ക്ക് നൽകിയ പരാതിയാണ് അറസ്റ്റിലേക്ക് നയിച്ചത്. തട്ടിപ്പുകാരുടെ വലയിൽ വീണ ഉദ്യോഗാർഥികളിൽ ചിലർ ഗ്രൂപ്പിനെ നേരിട്ട് ബന്ധപ്പെട്ട് വിവരം അറിയിച്ചതോടെയാണ് സൈബർ ക്രൈം എസ്എച്ച്ഒ എ.എ. അഷറഫും സംഘവും അന്വേഷണം തുടങ്ങിയത്. അന്വേഷണത്തിൽ വ്യക്തമായ വിവരങ്ങൾ ഇങ്ങനെ: ഓൺലൈൻ ജോബ് പോർട്ടലുകളിൽ ജോലിക്ക് വേണ്ടി രജിസ്റ്റർ ചെയ്യുന്ന ഉദ്യോഗാർഥികളുടെ വിവരങ്ങൾ തട്ടിപ്പുകാർ ശേഖരിക്കുന്നു. രാജ്യത്തെ പ്രമുഖ ബിസിനസ് സ്ഥാപനങ്ങളുടെ ലോഗോയും മറ്റും അടിച്ചുമാറ്റി വ്യാജ വെബ്സൈറ്റുകളും ഇ-മെയിൽ വിലാസവും സൃഷ്ടിച്ചെടുക്കും. ഇത്തരം വെബ്സൈറ്റുകളിൽ നിന്ന് ജോലി വാഗ്ദാനം ചെയ്ത് ഉദ്യോഗാർഥികൾക്ക് സന്ദേശമയയ്ക്കും. തട്ടിപ്പാണെന്ന് സംശയം തോന്നാതിരിക്കാൻ ഉദ്യോഗാർഥികൾക്ക് വേണ്ടി ഇവർ ഓൺലൈൻ ഇന്റർവ്യൂ ടെസ്റ്റ് എന്നിവ നടത്തും. 

ഉദ്യോഗാർഥി വലയിൽ വീണെന്ന് ബോധ്യപ്പെട്ടാൽ അഡ്മിഷൻ ഫീസ്, ട്രെയിനിങ് ചാർജ് തുടങ്ങിയ പേരുകൾ പറഞ്ഞു പലപ്രാവശ്യമായി പണം തട്ടും. നിയമനം ലഭിച്ച് ആദ്യശമ്പളം ലഭിക്കുമ്പോൾ ഈ തുക തിരികെ നൽകുമെന്ന് കൂടി തട്ടിപ്പുകാർ പറയുമ്പോൾ ഉദ്യോഗാർഥികൾ വിശ്വസിക്കുന്നു. പ്രതികളുടെ ലാപ്ടോപ്പും മറ്റും പരിശോധിച്ചതിൽ നിന്ന് വിമാനക്കമ്പനികളുടെ പേരിൽ പോലും തട്ടിപ്പുകൾ നടത്തുന്നതായി വ്യക്തമായി.